- ‘భరోసా’ కేంద్రాన్ని ప్రారంభించిన డీజీపీ మహేందర్ రెడ్డి
- తొమ్మిది పోలీస్ స్టేషన్ల పరిధిలో సేవలు
మేడ్చల్, వెలుగు: మహిళల, చిన్నారుల కోసం షీ టీమ్స్ ఆధ్వర్యంలో నిర్వహిస్తున్న భరోసా కేంద్రాలు ఎంతో అండగా నిలుస్తున్నాయని డీజీపీ మహేందర్ రెడ్డి అన్నారు. సైబరాబాద్ కమిషనరేట్ పరిధిలోని మేడ్చల్ పోలీస్ క్వార్టర్స్ వద్ద నూతన ‘భరోసా’ కేంద్రాన్ని మంగళవారం ఆయన ప్రారంభించారు. ఈ సందర్భంగా డీజీపీ మాట్లాడుతూ.. మేడ్చల్ కేంద్రంగా బాలానగర్ జోన్ పరిధిలోని శామీర్ పేట్, జగద్గిరిగుట్ట , మేడ్చల్, ఆల్వాల్, దుండిగల్, పేట్ బషీరాబాద్, జీడిమెట్ల, బాలానగర్, సనత్ నగర్ తొమ్మిది పోలీస్ స్టేషన్ల పరిధిలో ఈ భరోసా కేంద్రం సేవలందిస్తుందని చెప్పారు. పోక్సో పరిధిలోకి వచ్చే కేసుల్లోని బాధితులను, అత్యాచారాలకు గురైన మహిళలకు న్యాయం , వైద్య పరీక్షలు, ప్రభుత్వ పరిహారం.. వంటి సేవల కోసం ఈ సెంటర్ పని చేస్తుందన్నారు. సెంటర్లో బాధితులకు నైపుణ్యాలను నేర్పించి, వారు సమాజంలో ఉన్నతంగా జీవించేలా దోహదపడతాయన్నారు. బాధితులు కోర్టుకు వెళ్లకుండానే వీడియో స్టేట్మెంట్ లు ఇచ్చే వీలును భరోసా సెంటర్లు కల్పిస్తాయన్నారు. బాధితులకు కేవలం ఒక ఫోన్ కాల్ చేరువలో భరోసా సెంటర్ ఉందనే ధైర్యం రావాలన్నారు. ఈ భరోసా సెంటర్లను జిల్లాల్లో సంబంధిత ఎస్పీలు, కమిషనర్లు పర్యవేక్షిస్తారని, అలాగే రాష్ట్ర స్థాయి లో విమెన్ ప్రొటెక్షన్ సెల్ వారు పర్యవేక్షిస్తారన్నారు. ఈ కార్యక్రమంలో విమెన్ సేఫ్టీ ఏడీజీ స్వాతీ లక్రా, సైబరాబాద్ సీపీ స్టీఫెన్ రవీంద్ర, మేడ్చల్ కలెక్టర్ హరీశ్, బాలానగర్ డీసీపీ సందీప్, విమెన్ అండ్ చిల్డ్రన్ సేఫ్టీ వింగ్ డీసీపీ కవిత పాల్గొన్నారు.
