లింగాల, వెలుగు: తెలంగాణ ఆవిర్భావ దశాబ్ది వేడుకల ఆనందం ప్రజల్లో కనిపించడం లేదని, బీఆర్ఎస్ పాలన బాగుంటే స్వచ్ఛందంగా వారే ముందుకొచ్చి పాల్గొనేవారని సీఎల్పీ నేత భట్టి విక్రమార్క చెప్పారు. పీపుల్స్ మార్చ్ పాదయాత్ర 77వ రోజు గురువారం నాగర్కర్నూల్ జిల్లా లింగాల మండలంలో కొనసాగింది.
ఈసందర్భంగా ఆయన అవుసలికుంట గ్రామంలో మీడియాతో మాట్లాడుతూ..బీఆర్ఎస్ ప్రభుత్వం పేదల బతుకులకు భవిష్యత్తు లేకుండా చేసి పండుగ చేసుకోమంటే ఎట్లా చేసుకుంటారని విమర్శించారు. కేసీఆర్ పాలనలో దగా పడిన ప్రజలు తీవ్ర నిరాశలో ఉన్నారన్నారు. ఎన్నికలొచ్చినప్పుడే బర్లు, గొర్లు, ప్రాజెక్టులు గుర్తుకొస్తాయన్నారు.తెలంగాణ దశాబ్ది ఉత్సవాలను సోనియాగాంధీకి కృతజ్ఞతా దినోత్సవంగా నిర్వహించాలని డిమాండ్ చేశారు. కార్యక్రమంలో టీపీసీసీ సీనియర్ ఉపాధ్యక్షుడు మల్లు రవి, డీసీసీ అధ్యక్షుడు, మాజీ ఎమ్మెల్యే వంశీకృష్ణ, పార్టీ రాష్ట్ర నాయకుడు శ్రీనివాసరావు, మండల అధ్యక్షుడు నాగేశ్వరరావు, యూత్ కాంగ్రెస్ మండల అధ్యక్షుడు శ్రీనివాస్ రాథోడ్ తదితరులు పాల్గొన్నారు.
