రెండో రోజూ ఏకగ్రీవాల జోరు..సర్పంచ్ పదవులకు జోరుగా వేలం పాటలు

• అభివృద్ధి పనుల కోసం యునానమస్​వైపు జనం మొగ్గు
• రూ.50 లక్షల నుంచి రూ.60 లక్షలు డిపాజిట్‌‌ చేసేందుకు ముందుకొస్తున్న ఆశావహులు
• బేరసారాలు, ప్రలోభాలు, బెదిరింపులతో జరిగే ఏకగ్రీవాలు చెల్లవంటున్న అధికారులు

నెట్‌‌వర్క్‌‌, వెలుగు : రాష్ట్రంలో సర్పంచ్ పదవులకు వేలం పాటలు జోరుగా కొనసాగుతున్నాయి. అభివృద్ధి పనుల కోసమంటూ  జనం కూడా ఏకగ్రీవాల వైపే మొగ్గు చూపుతున్నారు. ఆశావహులు ఎంతయినా ఖర్చు చేసేందుకు సిద్ధపడుతున్నారు. కొన్ని చోట్ల గ్రామ ఉమ్మడి అవసరాలను తీర్చేందుకు ముందుకు వస్తుండగా.. మరికొన్ని చోట్ల గ్రామస్తులే అభివృద్ధి పనుల కోసం ఎంత ఖర్చు చేస్తారని బేరాసారాలు చేస్తున్నారు. పెద్ద పంచాయతీల్లో రూ.50 లక్షల నుంచి రూ.60 లక్షలు డిపాజిట్‌‌ చేసేందుకు కూడా ఆశావహులు వెనుకాడడం లేదు. 

అభివృద్ధి పనులకు డబ్బులు ఖర్చు చేసేలా...

జోగులాంబ గద్వాల జిల్లాలో శుక్రవారం ఒక్కరోజే 13 గ్రామాల్లో సర్పంచ్ స్థానాలకు ఏకగ్రీవ తీర్మానాలు చేశారు. గట్టు మండలం మిరుదొడ్డి సర్పంచ్ పదవికి రూ.90 లక్షలు, తారాపురం రూ.16 లక్షలు, ఆరగిద్ద రూ.31 లక్షలు, ముచ్చోనిపల్లి రూ.16 లక్షలు, తుమ్మలపల్లి రూ.30 లక్షలు, పెంచికల్‌‌పహాడ్‌‌ సర్పంచ్ పదవితో పాటు ఉప సర్పంచ్ పదవులు రూ. 40.5 లక్షలకు వేలం పాడుకున్నారు.

 అలాగే గద్వాల మండలం వీరాపురం సర్పంచ్ పదవికి రూ.50 లక్షలు, ఏడుకొండపల్లి రూ.10 లక్షలు, కురువపల్లి రూ.45 లక్షలు, పూటాన్‌‌పల్లి రూ.15 లక్షలు, ధరూర్ మండలం కొత్తపాలెం సర్పంచ్ పదవికి రూ.20.5 లక్షలు, కేటి దొడ్డి మండలంలోని ఉమెచ్చలతండా సర్పంచ్ పదవికి రూ. 12 లక్షలు, రంగాపురం గ్రామపంచాయతీ సర్పంచ్ పదవికి రూ.15 లక్షలు ఇచ్చేందుకు సిద్ధపడ్డారు. ఈ గ్రామాల్లో వార్డ్ మెంబర్ల పోస్టులు కూడా ఏకగ్రీవం కానున్నాయి. గుడుల డెవలప్‌‌మెంట్‌‌, గ్రామాల అభివృద్ధి కోసమే ఈ డబ్బులు ఉపయోగించేలా బాండ్ రాయించుకొని... అడ్వాన్స్‌‌గా రూ.5 లక్షల వరకు చెల్లించినట్టు తెలిసింది.

 రెండో విడత ఎన్నికలు జరిగే మండలాల్లోనూ ఏకగ్రీవాలు మొదలయ్యాయి. మల్దకల్ మండలం లోనిపల్లిలో శ్మశానవాటికకు రెండు ఎకరాల స్థలం ఇచ్చేందుకు ముందుకొచ్చిన వ్యక్తిని ఏకగ్రీవంగా ఎన్నుకున్నారు. అయిజ మండలంలోని కురువపల్లిలో 7.50 లక్షలు, కిష్టాపురంలో 10.5 లక్షలు చెల్లించి సర్పంచ్ పదవులను కైవసం చేసుకున్నారు. మహబూబ్‌‌నగర్‌‌ జిల్లా నవాబుపేట మండలంలోని దొడ్డిపల్లి సర్పంచ్‌‌గా వల్లూరు సువర్ణను, ఉపసర్పంచ్‌‌గా దేపల్లి రాములును ఏకగ్రీవంగా ఎన్నుకోవాలని తీర్మానం చేశారు.

సీఎం సొంతూరిలో ఏకగ్రీవ సర్పంచ్ ?

నాగర్‌‌కర్నూల్‌‌ జిల్లాలోని సీఎం రేవంత్‌‌రెడ్డి స్వగ్రామం కొండారెడ్డిపల్లిలో సర్పంచ్‌‌ను ఏకగ్రీవంగా ఎన్నుకునేందుకు చర్చలు నడుస్తున్నాయి. ఇక్కడ సర్పంచ్‌‌ పదవి ఎస్సీ జనరల్‌‌కు రిజర్వ్‌‌ కాగా దాదాపు 15 మంది పోటీ పడుతున్నారు. అందరితో మాట్లాడి ఏకగ్రీవం చేయాలని భావిస్తున్నారు.  

మరికొన్ని  పంచాయతీల్లో...

జయశంకర్‌‌ భూపాలపల్లి జిల్లా కొత్తపల్లిగోరి మండలం బాలయ్యపల్లిలో జీపీ బిల్డింగ్ నిర్మాణానికి ఐదు గుంటల స్థలం ఇచ్చేందుకు కె. తిరుపతి ముందుకు రావడంతో అతన్ని సర్పంచ్‌‌గా ఏకగ్రీవంగా ఎన్నుకోవాలని నిర్ణయించారు. రేగొండ మండలం పెద్దంపల్లిలో రూ. 7.50 లక్షలు ఇచ్చేందుకు ఓ వ్యక్తి ముందుకు రాగా.. మరెవరూ నామినేషన్లు వేయొద్దని గ్రామస్తులు ప్రకటించారు. మొగుళ్లపల్లి మండలం గుడిపాడు బీఆర్‌‌ఎస్‌‌ గ్రామ​అధ్యక్షుడు కుమ్మరి సాంబయ్య శుక్రవారం కాంగ్రెస్‌‌లో చేరారు. ఇప్పటికే నామినేషన్‌‌ వేసిన ఆయనను ఏకగ్రీవంగా ఎన్నుకునేందుకు కాంగ్రెస్​ నేతలు కసరత్తు చేస్తున్నారు. 

సూర్యాపేట జిల్లా ఆత్మకూరు(ఎస్) మండలం కొత్త తండాలో సర్పంచ్, ఉప సర్పంచ్‌‌ పదవులకు వేలం నిర్వహించారు. సర్పంచ్ పదవిని ధరావత్‌‌ వెన్నెల రూ. 21 లక్షలకు, ఉప సర్పంచ్ పదవిని రూ.3 లక్షలకు దక్కించుకున్నారు. మోతె మండలం రాయకుంటతండాలో గ్రామాభివృద్ధికి రూ. 20 లక్షలు ఇచ్చేందుకు ముందుకొచ్చిన కాంగ్రెస్​నేత భూక్య ఉప్పయ్యను ఏకగ్రీవంగా ఎన్నుకోవాలని గ్రామస్తులు నిర్ణయం తీసుకున్నారు. 

బీఆర్ఎస్‌‌కు చెందిన వ్యక్తికి ఉప సర్పంచ్‌‌ ఇవ్వాలని భావిస్తున్నారు. నల్గొండ జిల్లా నార్కట్‌‌పల్లి మండలం దాసరిగూడెం సర్పంచ్‌‌గా ఉప్పల వెంకట్‌‌రెడ్డిని ఏకగ్రీవంగా ఎన్నుకున్నారు. కాంగ్రెస్‌‌కు చెందిన వెంకటరెడ్డి గ్రామాభివృద్ధి కోసం రూ.20 లక్షలు ఇచ్చేందుకు ఒప్పందం కుదుర్చుకున్నారు. 

సిద్దిపేట జిల్లా జగదేవ్‌‌పూర్‌‌ మండలం పలుగుగడ్డలో ఆరు నెలల కిందటే గుడికి స్థలం ఇచ్చిన వారినే సర్పంచ్, ఉప సర్పంచ్‌‌గా ఏకగ్రీవంగా ఎన్నుకోవాలని నిర్ణయం తీసుకున్నారు. గుడి కోసం 12 గుంటల స్థలం ఇస్తానన్న నర్ర కనకయ్యను సర్పంచ్‌‌గా, నర్రా రాజ్‌‌కుమార్‌‌ను ఉప సర్పంచ్‌‌గా ఎన్నుకునేందుకు తీర్మానం చేశారు. 

జనగామ జిల్లా తరిగొప్పుల మండలం మాన్‌‌సింగ్‌‌ తండాలో కత్తుల కొమురయ్యను సర్పంచ్‌‌గా శుక్రవారం ఏకగ్రీవంగా ఎన్నుకున్నారు. దుర్గమ్మ గుడి నిర్మాణానికి రెండు గుంటల భూమితో పాటు రూ.10 లక్షలు ఇచ్చేందుకు కొమురయ్య ఒప్పందం కుదుర్చుకున్నారు. అలాగే, ఆరు వార్డులకు కూడా సభ్యులను ఏకగ్రీవం చేసుకున్నారు. 

ఏకగ్రీవ ఎన్నికపై విచారణ

ఇంద్రవెల్లి, వెలుగు : ఆదిలాబాద్‌‌ జిల్లా ఇంద్రవెల్లి మండలంలోని మెండపల్లి గ్రామంతో పాటు తేజాపూర్ గ్రామ సర్పంచ్ ఏకగ్రీవ తీర్మానాలపై ఆఫీసర్లు విచారణ చేపట్టారు. శుక్రవారం ఆయా గ్రామస్తులతో సమావేశమై ఏకగ్రీవ సర్పంచ్ తీర్మానాల వివరాలను ఆరా తీశారు. ప్రజలు ప్రలోభాలకు లొంగవద్దని, ఎవరైనా బలవంతపు తీర్మానాలు చేసి ఎన్నికలకు భంగం కలిగిస్తే వారిపై చర్యలు తీసుకుంటామని హెచ్చరించారు. తహసీల్దార్ ప్రవీణ్, ఎంపీడీవో జీవన్‌‌రెడ్డి  పాల్గొన్నారు. 

ప్రలోభాలతో జరిగే ఏకగ్రీవాలు చెల్లయ్‌‌...

గ్రామ పంచాయతీ ఎన్నికల్లో వేలంపాటలు, బేరసారాలు, బెదిరింపులు తదితర  ప్రలోభాలతో జరిగే ఏకగ్రీవాలు చెల్లవని ఆఫీసర్లు చెప్తున్నారు. ఈ మేరకు ఎన్నికల సంఘం జారీ చేసిన సర్క్యులర్‌‌ను గుర్తు చేస్తున్నారు. ఈ సారి నామినేషన్లు విత్ డ్రా చేసుకున్న వెంటనే రిటర్నింగ్ ఆఫీసర్​(ఆర్వో) ఫలితాన్ని ప్రకటించకుండా హోల్డ్‌‌లో పెట్టి, తర్వాత ఆఫీసర్లు గ్రామానికి వెళ్లి ఎన్నిక మోసపూరితంగా, ప్రలోభాలతో జరిగిందా ? బలవంతంగా ఒప్పుకున్నారా ? అనే విషయాలు తెలుసుకోనున్నారు. 

ఒక వేళ గ్రామంలో వేలం పాటలు జరిగినట్లు, ప్రలోభాలు ఉన్నట్లు ప్రాథమిక ఆధారాలు దొరికినా ఆ గ్రామ ఫలితాన్ని ఆపేస్తారు. ఈ విషయంపై 24 గంటల్లో ఎంక్వైరీ పూర్తి చేసి ఎన్నికల ప్రక్రియలో అక్రమాలు జరిగినట్లు తేలితే ఆ గ్రామ ఎన్నికను రద్దు చేయాలని కలెక్టర్‌‌ ఎన్నికల సంఘానికి సిఫార్సు చేసే అవకాశం ఉంటుందని ఆఫీసర్లు చెబుతున్నారు. ఎన్నికల ప్రక్రియలో అవకతవకలకు పాల్పడితే పదవి దక్కకపోగా క్రిమినల్‌‌ కేసులు నమోదు అవుతాయని ఆఫీసర్లు హెచ్చరిస్తున్నారు.