కాంగ్రెస్ అగ్రనేత, ప్రతిపక్ష నాయకుడు రాహుల్ గాంధీకి కోర్టులో భారీ ఊరట లభించింది. ఉత్తరప్రదేశ్‌లోని సుల్తాన్‌పూర్‌ ప్రత్యేక ఎంపీ/ఎమ్మెల్యే కోర్టు ఆయనకు ఊరటనిస్తూ కీలక తీర్పు వెలువరించింది. కేంద్ర హోంమంత్రి అమిత్ షాపై 2018లో చేసిన అనుచిత వ్యాఖ్యలకు సంబంధించి రాహుల్ గాంధీపై నమోదైన క్రిమినల్ పరువు నష్టం కేసును తాజాగా కోర్టు కొట్టివేసింది. ఈ తీర్పుతో రాహుల్ గాంధీకి పెద్ద ఊరట లభించినట్లయింది. తీర్పు వెలువడే సమయంలో రాహుల్ గాంధీ స్వయంగా కోర్టుకు హాజరయ్యారు.
అసలు ఈ కేసు ఎప్పుడు, ఎలా ప్రారంభమైందంటే.. 2018 కర్ణాటక అసెంబ్లీ ఎన్నికల ప్రచార సమయంలో బెంగళూరులో రాహుల్ గాంధీ ఓ కార్యక్రమంలో పాల్గొన్నారు. ఆ సమయంలో అప్పట్లో బీజేపీ జాతీయ అధ్యక్షుడిగా ఉన్న అమిత్ షాపై రాహుల్ గాంధీ అభ్యంతరకర వ్యాఖ్యలు చేశారని ఆరోపణలు వచ్చాయి. అమిత్ షాను ఆయన 'హత్యారామం' (హత్య చేసిన వ్యక్తి) అంటూ సంబోధించారని బీజేపీ జిల్లా ఉపాధ్యక్షుడు విజయ్ మిశ్రా కోర్టులో ఫిర్యాదు చేశారు. ఈ ఫిర్యాదును స్వీకరించిన కోర్టు విచారణ చేపట్టింది.
ఈ కేసు విచారణలో భాగంగా 2023 నవంబర్ 27న రాహుల్ గాంధీ కోర్టు ఎదుట హాజరై బెయిల్ పొందారు. అనంతరం ఫిర్యాదుదారుడు విజయ్ మిశ్రా రాహుల్ గాంధీ వాయిస్ శాంపిల్ సేకరించాలని కోర్టును కోరగా.. ట్రయల్ కోర్టు ఆ అభ్యర్థనను తోసిపుచ్చింది. దీన్ని సవాల్ చేస్తూ సెషన్స్ కోర్టులో.. ఆ తర్వాత అలహాబాద్ హైకోర్టులోనూ ఆయన వేసిన పిటిషన్లు తిరస్కరణకు గురయ్యాయి. అదనపు సివిల్ జడ్జి శుభమ్ వర్మ ఈ కేసుకు సంబంధించి అక్టోబర్ 26న తీర్పును వెలువరించారు.
ALSO READ : యూపీలో రాహుల్ గాంధీ కాన్వాయ్కి ప్రమాదం
ఈ కేసులో తగిన ఆధారాలు లభించకపోవడంతో పాటు వివిధ సాంకేతిక అంశాలను పరిగణలోకి తీసుకున్న న్యాయస్థానం పరువు నష్టం కేసుకు సంబంధించిన ఫిర్యాదును కొట్టివేసింది. ఒకవేళ నేరం రుజువైతే రాహుల్ గాంధీకి గరిష్టంగా 2 ఏళ్ల జైలు శిక్ష పడే అవకాశం ఉండేదని న్యాయవాదులు తెలిపారు. ఏది ఏమైనప్పటికీ.. సుదీర్ఘకాలంగా నడుస్తున్న ఈ కేసు నుంచి రాహుల్ గాంధీకి క్లీన్‌చిట్ లభించడం కాంగ్రెస్ శ్రేణులకు ఊరటనిచ్చే అంశం అని చెప్పుకోవాలి.
