టాలీవుడ్ రెబల్ స్టార్ ప్రభాస్ హీరోగా తెరకెక్కుతున్న పీరియడ్ వార్ యాక్షన్ మూవీ ‘ఫౌజీ’ విడుదలకు ముందే వివాదంలో చిక్కుకుంది. స్వాతంత్ర్య సమరయోధుడు నేతాజీ సుభాష్ చంద్రబోస్ చరిత్రను సినిమాలో తప్పుగా చూపించారంటూ ఆయన మునిమనవడు చంద్రకుమార్ బోస్ అభ్యంతరం వ్యక్తం చేశారు. దర్శకుడు హను రాఘవపూడి చారిత్రక వాస్తవాలను వక్రీకరించారని ఆరోపిస్తూ.. దేశ ప్రజలకు, స్వాతంత్ర్య పోరాటాన్ని గౌరవించే వారందరికీ క్షమాపణ చెప్పాలని డిమాండ్ చేశారు.
అసలు వివాదం ఏమిటంటే?
ప్రభాస్ పుట్టినరోజు సందర్భంగా అక్టోబర్ 23న ‘ఫౌజీ’ టీజర్‌ను చిత్రబృందం విడుదల చేసింది. ఇందులో నేతాజీ సుభాష్ చంద్రబోస్, నాజీ నాయకుడు అడాల్ఫ్ హిట్లర్‌తో సమావేశమయ్యే సన్నివేశం చర్చకు దారితీసింది. ఈ క్రమంలో ప్రభాస్ పోషిస్తున్న కల్పిత పాత్రను నేతాజీ హిట్లర్‌కు పరిచయం చేస్తూ, ఆ పాత్రకు ప్రాధాన్యం కల్పించినట్లు సన్నివేశం ఉందంటూ పలువురు సోషల్ మీడియాలో అభ్యంతరాలు వ్యక్తం చేస్తున్నారు. చారిత్రకంగా ఎంతో ప్రాధాన్యం ఉన్న నేతాజీ పాత్రను ఇలా చూపించడం సమంజసం కాదని విమర్శిస్తున్నారు.
వాస్తవాలను వక్రీకరించడం నేరం..
ఈ వివాదంపై ఐఏఎన్ఎస్‌తో మాట్లాడిన చంద్రకుమార్ బోస్.. భారత స్వాతంత్ర్య పోరాటం, దానికి నాయకత్వం వహించిన మహనీయుల గురించి సినిమాలు తీసే స్వేచ్ఛ దర్శకులకు ఉందని పేర్కొన్నారు. అయితే, ఆ స్వేచ్ఛ పేరుతో చారిత్రక వాస్తవాలను మార్చడం సరికాదని స్పష్టం చేశారు.
“జాతీయ నాయకుల విషయంలో వాస్తవాలను వక్రీకరించడం, కల్పిత అంశాలను జోడించడం ఒక నేరమని నేను భావిస్తున్నాను” అని ఆయన వ్యాఖ్యానించారు. ‘ఫౌజీ’లో నేతాజీ, హిట్లర్ మధ్య జరిగిన సమావేశాన్ని తప్పుగా చిత్రీకరించారని, దీనివల్ల నేతాజీ స్థాయిని తగ్గించినట్లవుతోందని ఆరోపించారు.
Grandnephew of Subhas Chandra Bose Slams the #FAUZI Glimpse & Demands an APOLOGY : “This is an INSULT TO HIS LEGACY. The Glimpse failed to portray Netaji’s stature and the way he conducted discussions with Hitler. The Director must apologise to the people of India and modify the film.”
— Rangasthalam (@RangasthalamIN) October 26, 2026
హిట్లర్‌ను నేతాజీ ఎందుకు కలిశారు?
నేతాజీ సుభాష్ చంద్రబోస్ జర్మనీ నియంత హిట్లర్‌ను కలవడం వెనుక భారతదేశానికి స్వాతంత్ర్యం సాధించాలనే లక్ష్యం ఉందని చంద్రకుమార్ బోస్ వివరించారు. ఆ సమయంలో జర్మనీకి చెందిన హిట్లర్, జపాన్ నాయకుడు హిడేకి టోజో ద్వారా భారత స్వాతంత్ర్య ఉద్యమానికి సహాయం లభించవచ్చని నేతాజీ భావించారని పేర్కొన్నారు.
అయితే, సహాయం కోరినంత మాత్రాన నేతాజీ ఫాసిజాన్ని సమర్థించినట్లు కాదని ఆయన స్పష్టం చేశారు. నేతాజీ ప్రజాస్వామ్య విలువలను, ప్రజల హక్కులను బలంగా విశ్వసించేవారని తెలిపారు. హిట్లర్‌తో సమావేశమైనప్పుడు కూడా నేతాజీ సమాన స్థాయిలో వ్యవహరించారని, తన స్వతంత్ర వైఖరిని ఏమాత్రం వదులుకోలేదని పేర్కొన్నారు. భారత స్వాతంత్ర్య సాధన కోసం నేతాజీ చేసిన ప్రయత్నాలను సరైన చారిత్రక నేపథ్యంతోనే చూపించాలని ఆయన అభిప్రాయపడ్డారు. నేతాజీని తక్కువ చేసి చూపించేలా సన్నివేశాలను రూపొందించడం తగదని అన్నారు.
దర్శకుడు క్షమాపణ చెప్పాలి: సుభాష్ చంద్రబోస్ మనవడు
సినిమాలోని సన్నివేశాన్ని చారిత్రక నేపథ్యంతో వివరించకుండా వివాదాస్పదంగా చూపించారని చంద్రకుమార్ బోస్ విమర్శించారు. ప్రేక్షకుల్లో ఆసక్తి పెంచడం కోసం జాతీయ నాయకుల ప్రతిష్ఠను దెబ్బతీసే విధంగా వ్యవహరించకూడదని హితవు పలికారు. నేతాజీ వ్యక్తిత్వం, దేశ స్వాతంత్ర్యం కోసం ఆయన చేసిన పోరాటం అపారమైనవని పేర్కొంటూ.. ఈ విషయంలో దర్శకుడు హను రాఘవపూడి దేశ ప్రజలకు క్షమాపణ చెప్పాలని డిమాండ్ చేశారు. స్వాతంత్ర్య పోరాటాన్ని గౌరవించే ప్రతి ఒక్కరి మనోభావాలను పరిగణనలోకి తీసుకోవాలని సూచించారు.
మార్చి 19, 2027న ‘ఫౌజీ’ విడుదల..
హను రాఘవపూడి రచించి, దర్శకత్వం వహిస్తున్న ‘ఫౌజీ’ ఒక పీరియడ్ వార్ యాక్షన్ చిత్రంగా తెరకెక్కుతోంది. ఇందులో ప్రభాస్ ప్రధాన పాత్రలో నటిస్తున్నారు. మైత్రీ మూవీ మేకర్స్ నిర్మాణంలో, టీ-సిరీస్ సమర్పణలో ఈ సినిమా రూపొందుతోంది. ఈ చిత్రాన్ని 2027 మార్చి 19న థియేటర్లలో విడుదల చేయాలని చిత్రబృందం ప్రకటించింది. టీజర్‌తో ప్రేక్షకుల్లో ఆసక్తి రేకెత్తించిన ‘ఫౌజీ’.. ఇప్పుడు నేతాజీ పాత్ర చిత్రీకరణపై చెలరేగిన వివాదంతో వార్తల్లో నిలిచింది. అయితే, ఈ ఆరోపణలపై చిత్రబృందం అధికారికంగా స్పందించిందా? టీజర్‌లోని సన్నివేశంపై ఎలాంటి వివరణ ఇస్తుంది? అన్నది ఆసక్తికరంగా మారింది.
