బీహార్ లోని పాట్నా బిహ్తా పట్టణంలో అక్రమ ఇసుక తవ్వకాలపై తనిఖీపై వచ్చిన మైనింగ్ శాఖకు చెందిన మహిళా అధికారిణిపై ఓ ముఠా దాడి చేశారు. ఆమెను లాగి, రాళ్లతో దాడి చేసి, తీవ్రంగా గాయపర్చారు. దీనికి సంబంధించిన ఓ వీడియో ప్రస్తుతం సోషల్ మీడియాలోనూ వైరల్ అవుతోంది. ఈ కేసులో 44 మంది అరెస్టు, 3 ఎఫ్‌ఐఆర్‌లు నమోదయ్యాయని పాట్నా ఎస్పీ రాజేష్ కుమార్ తెలిపారు. మహిళా అధికారిణిపై దాడికి సంబంధించి మరికొందర్ని అరెస్టు చేసే పనిలో ఉన్నామని స్పష్టం చేశారు.
ఇసుక తవ్వకాలపై తనిఖీ చేయడానికి వచ్చిన జిల్లా మైనింగ్ అధికారిణిపై ఓ మాఫియా ముఠా దాడి చేసింది. ట్రక్కులు ఓవర్ లోడ్‍తో వెళుతున్నాయని, అక్రమ తవ్వకాలు జరుగుతున్నాయనే సమాచారంతో తనిఖీలు చేపట్టిన మైనింగ్ శాఖ బృందం, బిహ్‍టా పోలీసు సిబ్బందిపై.. ఆ సమయంలోనే అధికారులపై ఇసుక మాఫియా సభ్యులు దాడి చేశారు. పోలీసులపై ఇసుక చల్లి, రాళ్లు, కర్రలతో దాడి చేశారు. అధికారులను వెల్లగొట్టేందుకు నానా హంగామా చేశారు. ఈ క్రమంలోనే ఇసుక మాఫియా సభ్యులు మహిళా ఆఫీసర్ వెంట పడడంతో ఆమె కిందపడి, గాయపడ్డారు. ఈ ఘటనలో జిల్లా మైనింగ్ అధికారిణి, ఇద్దరు మైనింగ్ ఇన్‌స్పెక్టర్లు సహా ముగ్గురు గాయపడ్డారని పోలీసులు స్పష్టం చేశారు.
