సుల్తానాబాద్, వెలుగు: పెద్దపల్లి ఎమ్మెల్యే దాసరి మనోహర్ రెడ్డి నిరంకుశ వైఖరి వల్లే బీఆర్ఎస్ పార్టీని వీడుతున్నట్టు పెద్దపల్లి మాజీ ఎమ్మెల్యే బిరుదు రాజమల్లు, మాజీ మున్సిపల్ చైర్మన్ ఎల్. రాజయ్య ఆరోపించారు. బీఆర్ఎస్ కు రాజీనామా చేసిన ఈ ఇద్దరు నేతలు కాంగ్రెస్ పార్టీలో చేరేందుకు శుక్రవారం నియోజకవర్గం నుంచి హైదరాబాద్ గాంధీభవన్ కు బయలుదేరారు. ఈ సందర్భంగా లీడర్ల కాన్వాయ్ ను రాజమల్లు కాంగ్రెస్ జెండా ఊపి ప్రారంభించారు. ఈ సందర్భంగా ఆయన మాట్లాడుతూ.. ఎమ్మెల్యే గెలుపు కోసం తాము ఎంతగానో కృషి చేసినప్పటికీ పార్టీలో సముచిత స్థానం కల్పించలేదన్నారు. టీపీసీసీ ఉపాధ్యక్షుడు, మాజీ ఎమ్మెల్యే విజయరమణారావు ఆధ్వర్యంలో కాంగ్రెస్ పార్టీలో చేరుతున్నట్టు చెప్పారు. నియోజకవర్గంలో కాంగ్రెస్ ను మరింత బలోపేతం చేసి పార్టీ విజయం కోసం పాటుపడ్తామని చెప్పారు. కార్యక్రమంలో మాజీ ఎమ్మెల్యే విజయరమణారావుతోపాటు మాజీ జడ్పీటీసీలు, మాజీ ఎంపీపీలు, సర్పంచులు, మాజీ సర్పంచులు, కార్యకర్తలు పాల్గొన్నారు.
