రాజస్థాన్ అసెంబ్లీ ఎన్నికల్లో బీజేపీ.. ప్రజలను తప్పుదోవ పట్టించి గెలిచిందని ఆ రాష్ట్ర మాజీ ముఖ్యమంత్రి అశోక్ గెహ్లాట్ ఆరోపించారు. శుక్రవారం నుంచి కొత్త ప్రభుత్వం ఆధ్వర్యంలో అసెంబ్లీ సమావేశాలు ప్రారంభం కానున్నాయి. ఈ నేపథ్యంలో బుధవారం ఆయన మీడియాతో మాట్లాడారు. తమ పార్టీ (కాంగ్రెస్) బాధ్యతాయుతమైన ప్రతిపక్ష పాత్ర పోషిస్తుందని అన్నారు. ప్రజలకు సమస్యలు ఉంటే, తమ వద్దకు రావాలని, వారి సమస్యల పరిష్కారానికి ఏ ఒక్క చిన్న అవకాశాన్నీ వదిలిపెట్టమని గెహ్లాట్ చెప్పారు.
అలాగే, కొత్తగా ఏర్పడిన బీజేపీ ప్రభుత్వంపైనా ఆయన విరుచుకుపడ్డారు. "రాష్ట్రంలో బీజేపీ ప్రభుత్వాన్ని ఏర్పాటు చేసి కేవలం నెలన్నర రోజులు మాత్రమే అవుతోంది. కానీ, ఈ టైంలోనే మహిళలపై అఘాయిత్యాలు, హత్యలు అనేకం జరిగాయి. ఎన్నికలకు ముందు ఇతర రాష్ట్రాల కంటే ఇక్కడ శాంతిభద్రతలు మెరుగ్గా ఉండేవి. కొత్త ప్రభుత్వం మన పరువు తీసింది”అని ఆయన ఫైర్ అయ్యారు. ఎన్నికల టైంలో ప్రధాని మోదీ, హోం మంత్రి అమిత్ షా, ఇతర బీజేపీ నాయకులు అబద్ధాలు చెప్పి ప్రజలను తప్పుదోవ పట్టించారని గెహ్లాట్ విమర్శించారు.
ఈ విషయాన్ని ప్రజలు అర్థం చేసుకుని పశ్చాత్తాప పడుతున్నారని ఆయన అన్నారు. ఈ నెల 22న జరిగే రామమందిర శంకుస్థాపన కార్యక్రమాన్ని బీజేపీ రాజకీయ కార్యక్రమంగా మార్చిందని గెహ్లాట్ మండిపడ్డారు. తాము కూడా రామ భక్తులమేనని, బీజేపీ నేతలు సృష్టిస్తున్న వాతావరణం మంచిది కాదని గెహ్లాట్ అన్నారు.
