మెగా పవర్ స్టార్ రామ్ చరణ్, 'ఉప్పెన' ఫేమ్ బుచ్చిబాబు సానా దర్శకత్వంతో వస్తున్న మాస్ రూరల్ యాక్షన్ చిత్రం 'పెద్ది' . ఈ మూవీపై సినీ వర్గాలతో పాటు అభిమానుల్లో అంచనాలు భారీగానే ఉన్నాయి. బాలీవుడ్ బ్యూటీ జాన్వీ కపూర్ ఈ మూవీలో రామ్ చరణ్ సరసన సటిస్తోంది. పాన్ ఇండియా స్థాయిలో రెడీ అవుతున్న ఈ మూవీలోని 'చికిరి చికిరి ' సాంగ్ ఇటీవల విడుదలై సంచలనం సృష్టించింది. దీంతో ఈ సినిమాపై హైప్ ను మరింత పెంచింది.
'చికిరి'తో పెరిగిన అంచనాలు
ఇప్పటికే విడుదలైన చిత్ర గ్లింప్స్‌తో పాటు, ఇటీవలే విడుదలైన ఏ.ఆర్. రెహమాన్ స్వరపరిచిన 'చికిరి' పాట ప్రభంజనం సృష్టించింది. ఈ పాట అతి తక్కువ సమయంలో 100 మిలియన్ల వ్యూస్ ను సాధించి రికార్డు సృష్టించింది. సోషల్ మీడియాలో ఎక్కడ చూసినా, ఈ మాస్ బీట్సే వినిపిస్తున్నాయి. ఈ పాట సంచలనం సృష్టించడంతో 'పెద్ది'పై అంచనాలు ఆకాశాన్ని తాకాయి. ఈ సారి బాక్సాఫీస్ వద్ద రికార్డులు సృష్టించడం ఖాయమని సినీ వర్గాలు అంచనాలు వేస్తున్నాయి.
ఓటీటీ బిజినెస్‌లో రికార్డు
'పెద్ది' సినిమాపై ఉన్న అంచనాలు, రామ్ చరణ్ క్రేజ్ ఏ స్థాయిలో ఉందో నిరూపించేలా తాజాగా ఓ సంచలన వార్త బయటికొచ్చింది. ఇంకా షూటింగ్ దశలో ఉన్న 'పెద్ది' చిత్రం ఓటీటీ హక్కుల విషయంలో రికార్డు సృష్టించింది. ప్రముఖ ఓటీటీ సంస్థల మధ్య తీవ్ర పోటీ నెలకొనగా, దిగ్గజ స్ట్రీమింగ్ ప్లాట్‌ఫామ్ నెట్‌ఫ్లిక్స్ ఏకంగా రూ.130 కోట్ల భారీ ధరకు ఈ సినిమా డిజిటల్ రైట్స్‌ను కొనుగోలు చేసినట్లు ట్రేడ్ వర్గాలు వెల్లడించాయి. ఈ మొత్తం అన్ని భాషలకు కలిపి చెల్లించనున్నప్పటికీ, ఒక సినిమా షూటింగ్ పూర్తవకముందే ఈ రేంజ్‌లో బిజినెస్ జరగడం ఆల్‌టైమ్ రికార్డుగా సినీ విశ్లేషకులు చెబుతున్నారు. అయితే ఈ డీల్ పై ఇంకా అధికారికంగా ప్రకటించలేదు.
హైదరాబాద్‌లో భారీ షూటింగ్
మాస్ రూరల్ యాక్షన్ నేపథ్యంతో రూపొందుతున్న ఈ సినిమా షూటింగ్ ప్రస్తుతం శరవేగంగా హైదరాబాద్‌లో జరుగుతోంది. అల్యూమినియం ఫ్యాక్టరీలో ఏర్పాటు చేసిన భారీ సెట్‌లో ఉత్కంఠభరితమైన యాక్షన్ సీక్వెన్స్ చిత్రీకరణ జరుగుతోంది. ఈ భారీ పోరాట సన్నివేశంలో రామ్ చరణ్‌తో పాటు, కన్నడ స్టార్ శివరాజ్ కుమార్ కూడా పాల్గొన్నారని సమాచారం. ఈ ఫైట్ సీక్వెన్స్‌కు బాలీవుడ్ స్టంట్ మాస్టర్, 'దంగల్' ఫేమ్ షామ్ కౌశల్ పర్యవేక్షిస్తుండగా, నవకాంత్ స్టంట్ మాస్టర్‌గా వ్యవహరిస్తున్నారు. దర్శకుడు బుచ్చిబాబు ప్రతి ఫైట్ సీక్వెన్స్‌ను ప్రత్యేకమైన కాన్సెప్ట్‌తో డిజైన్ చేస్తున్నారని, ప్రస్తుత ఫైట్ సినిమాకే హైలైట్‌గా నిలుస్తుందని యూనిట్ సభ్యులు తెలిపారు.
ఈ మూవీని మైత్రీ మూవీ మేకర్స్, సుకుమార్ రైటింగ్స్ సమర్పణలో వెంకట సతీష్ కిలారు నిర్మిస్తున్నారు. ఈ 'పెద్ది' చిత్రం 2026 మార్చి 27న ప్రపంచవ్యాప్తంగా విడుదల కానుంది. మెగా ఫ్యాన్స్ ఇప్పటికే ఈ సినిమా రిలీజ్ కోసం ఎంతో ఆతృతగా ఎదురుచూస్తున్నారు. మరి బాక్సాఫీస్ వద్ద ఎలాంటి రికార్డు సృష్టిస్తుందో చూడాలి.
