హైదరాబాద్, వెలుగు: రాష్ట్రంలో షాపుల టైమింగ్స్కు సంబంధించి ప్రభుత్వం కొత్త విధానం అమల్లోకి తెచ్చింది. ఇకపై అన్ని షాపులూ 24 గంటలూ ఓపెన్ చేసుకునేందుకు అవకాశం కల్పించింది. తెలంగాణ షాప్స్ అండ్ ఎస్టాబ్లిష్మెంట్ యాక్ట్ 1988లోని సెక్షన్ 7 ప్రకారం లైసెన్స్ పొందిన షాపులు 24 గంటలు ఓపెన్ చేసుకోవచ్చని, ఇందుకోసం ఏడాదికి రూ.10 వేల చొప్పున అదనపు ఫీజు చెల్లించాలని ప్రభుత్వం వెల్లడించింది. ఈ మేరకు ఈ నెల 4నే కార్మిక శాఖ జీవో విడుదల చేసింది. అయితే 11 కండిషన్లు పెట్టిన సర్కార్.. అవి పాటిస్తేనే ఈ వెసులుబాటు లభిస్తుందని జీవోలో పేర్కొంది.
ఇవీ కండిషన్లు..
అదనపు పని గంటలకు గాను ఉద్యోగులకు ఓవర్ టైమ్ జీతం చెల్లించాలి. ప్రభుత్వ సెలవులు, వీక్లీ ఆఫ్ రోజు సిబ్బంది పని చేస్తే.. దానికి బదులుగా మరో రోజు సీ-ఆఫ్ తీసుకునే అవకాశం కల్పించాలి. దుకాణాల్లో పనిచేసే మహిళలకు తగిన భద్రత కల్పించాలి. మహిళల అనుమతితోనే వాళ్లకు నైట్ షిప్ట్ వేయాలి. వాళ్లకు ట్రాన్స్ పోర్టు సౌకర్యం కల్పించాలి. ప్రభుత్వ నిబంధనల ప్రకారం ఎప్పటికప్పుడు షాపు రికార్డులను మేనేజ్ మెంట్ సమర్పించాలి. పోలీసు యాక్టులోని నిబంధనలకు అనుగుణంగా దుకాణాలను నడపాలి.
