- తెలంగాణ ప్రజలకు క్షమాపణలు చెప్పాలని డిమాండ్
హైదరాబాద్, వెలుగు: బనకచర్లపై బాగోతంతో సీఎం రేవంత్ రెడ్డి అడ్డంగా దొరికిపోయారని మాజీ మంత్రి, బీఆర్ఎస్ ఎమ్మెల్యే హరీశ్ రావు అన్నారు. ఆ చీకటి బాగోతాన్ని కప్పి పుచ్చుకునేందుకే డైవర్షన్ పాలిటిక్స్ చేస్తున్నారన్నారు. కేటీఆర్ను గంజాయి బ్యాచ్ అని అనడం దారుణమని, వాస్తవానికి రేవంత్ బ్యాచే ఓ గార్బేజ్ బ్యాచ్ అని విమర్శించారు. గురువారం ఆయన తెలంగాణ భవన్లో మీడియాతో చిట్చాట్ చేశారు.
బనకచర్లపై చర్చే జరగలేని రేవంత్ అన్నారని, కానీ.. చర్చ జరిగిందని ఏపీ మంత్రి నిమ్మల చెప్పారని పేర్కొన్నారు. సీఎం రేవంత్ నోరు తెరిస్తే అబద్ధాలే చెప్తున్నారని విమర్శించారు. అబద్ధాలు చెప్పినందుకు ప్రజలకు క్షమాపణ చెప్పాలని డిమాండ్ చేశారు. తెలంగాణకు వచ్చినప్పుడల్లా రాహుల్, ఖర్గే కూడా జై తెలంగాణ అంటారని గుర్తు చేశారు. రేవంత్కు ఇంకా బానిస మనస్తత్వం పోలేదా? అని ప్రశ్నించారు. అందుకే చంద్రబాబుకు తొత్తుగా ఉంటున్నారని విమర్శించారు.
సెక్రటేరియెట్కు ఎందుకు పోతలేవు?
‘‘రేవంత్ లాగా కేటీఆర్ బ్యాగులు మోయలేదు. మంచి ఇంగ్లీష్ మాట్లాడుతూ ప్రపంచంలో తెలంగాణ ఖ్యాతిని పెంచారు’’అని హరీశ్ అన్నారు. రేవంత్ పాలన పోలీసుల మధ్యన కమాండ్ కంట్రోల్ సెంటర్లో లేదంటే జూబ్లీహిల్స్ ప్యాలెస్ నుంచే నడుస్తున్నదని ఎద్దేవా చేశారు. సీఎం రేవంత్ సెక్రటేరియెట్కు ఎందుకు పోవడం లేదని ప్రశ్నించారు. ప్రజాదర్బార్ కార్యక్రమమం ఏమైందని నిలదీశారు. అర్ధరాత్రి గోడలు దూకడం.. కార్లలో పోవడం రేవంత్కు తప్ప ఎవరికి అలవాటుందని నిలదీశారు.
