హైదరాబాద్, వెలుగు: రాష్ట్రవ్యాప్తంగా భారీ వర్షాలు కురుస్తున్నందున స్థానిక సంస్థల ఎన్నికలకు సంబంధించి ఓటరు జాబితా సవరణ ప్రక్రియను వాయిదా వేయాలని రాష్ట్ర ఎన్నికల కమిషన్ను బీఆర్ఎస్పార్టీ కోరింది. ఈ మేరకు గురువారం బీఆర్ఎస్ వర్కింగ్ ప్రెసిడెంట్ కేటీఆర్, ఎమ్మెల్సీలు ఎల్ రమణ, దాసోజు శ్రవణ్రాష్ట్ర ఎన్నికల కమిషనర్కు లేఖ రాశారు.
భారీ వర్షాలతో ప్రజలు తమ ప్రాణాలు, ఆస్తులు, పంటలను కాపాడుకునే ప్రయత్నంలో నిమగ్నమై ఉన్నారని.. వాళ్లు ఓటర్ జాబితాలో తమ వివరాలను తెలుసుకునే అవకాశం లేదన్నారు. రాబోయే 3 నుంచి 5 రోజులు రాష్ట్రంలో భారీ నుంచి అతి భారీ వర్షాలు కురుస్తాయని వాతావరణ శాఖ హెచ్చరించిన నేపథ్యంలో, ఈ ప్రక్రియలో ప్రజలు, అధికారులు పాల్గొనడం అసాధ్యమన్నారు. ప్రభుత్వ యంత్రాంగం మొత్తం సహాయక చర్యల్లో నిమగ్నమై ఉన్నందున, వారికి ఎన్నికల విధులు అప్పగించడం సరికాదన్నారు.
