హైదరాబాద్, వెలుగు: వచ్చే ఎన్నికల్లో కేసీఆర్, కేటీఆర్, హరీశ్ రావు ఎన్ని కుట్రలు చేసినా తెలంగాణలో బీఎస్పీ అధికారంలోకి రావడం ఖాయమని బీఎస్పీ రాష్ట్ర అధ్యక్షుడు ఆర్ఎస్ ప్రవీణ్ కుమార్ అన్నారు. బీఎస్పీ మద్దతు లేకుండా ఏ పార్టీ రాష్ట్రంలో ప్రభుత్వాన్ని ఏర్పాటు చేయబోదని తెలిపారు. కాన్షీరాం స్ఫూర్తితో బీఎస్పీ తెలంగాణలో అధికారంలోకి రావాలని, అందుకు పార్టీ శ్రేణులు నిరంతరం శ్రమించాలని కోరారు. సోమవారం పార్టీ స్టేట్ ఆఫీసులో బీఆర్ఎస్, కాంగ్రెస్, బీజేపీ పార్టీలకు చెందిన 2,500 మంది బీఎస్పీలో చేరారు. ఈ సందర్భంగా ప్రవీణ్ మాట్లాడుతూ.. వచ్చే ఎన్నికల ద్వారా కల్వకుంట్ల పాలనకు చరమగీతం పాడి, ఫామ్ హౌస్ కు పరిమితం చేయాలని పార్టీ శ్రేణులను కోరారు.
