మెదక్ (శివ్వంపేట), వెలుగు: తెలంగాణ ప్రభుత్వానికి వైన్స్ ల మీదున్న ప్రేమ స్కూళ్లపై లేదని తీన్మార్ మల్లన్న ఆగ్రహం వ్యక్తం చేశారు. మెదక్ జిల్లా శివ్వంపేట మండల కేంద్రంలో బుధవారం 7200’ కార్యాలయాన్ని ప్రారంభించారు. పదో తరగతిలో ప్రతిభ కనబరిచిన ఏడుగురు స్టూడెంట్స్ కు ప్రైజ్ మనీ బహుకరించారు. ఈ సందర్బంగా మల్లన్న మాట్లాడుతూ వర్షాలు పడుతున్నాయని స్కూళ్లు బంద్ పెట్టి వైన్స్ లు ఓపెన్గా పెట్టడంతోనే ప్రభుత్వానికి దేనిపై శ్రద్ధ ఉందో అర్థమవుతోందన్నారు. దేశంలోనే విద్యకు అతి తక్కువ ఖర్చు పెట్టే రాష్ట్రం తెలంగాణ అన్నారు. బడ్జెట్ కేటాయింపులు టీచర్ల జీతాలకు సరిపోతున్నాయి తప్ప విద్యాభివృద్ధికి అందడం లేదని చెప్పారు.
ఉన్న స్కూళ్లలో నాణ్యమైన విద్య అందించకుండా గురుకుల పాఠశాల అని పేర్లు మారుస్తూ మభ్యపెడుతోందని ధ్వజమెత్తారు. కేసీఆర్తొమ్మిదేండ్ల పాలనలో తొమ్మిదివేల స్కూళ్లు మూతపడ్డాయని ఆరోపించారు. ప్రభుత్వ యూనివర్సిటీలను అసలు పట్టించుకోకుండా ప్రైవేట్ యూనివర్సిటీలకు పెద్ద పీట వేస్తున్నారని మండిపడ్డారు. ఇప్పటి వరకు దళిత బంధు ఎంతమందికి ఇచ్చారో చెప్పాలని డిమాండ్ చేశారు. కేసీఆర్ ముఖ్యమంత్రి అయ్యాక రూ.1,800 కోట్ల బడ్జెట్ పెడితే బీసీలకు ఇచ్చింది రూ. 264 కోట్లు మాత్రమేనని చెప్పారు. కేసీఆర్ ప్రవేశపెట్టిన స్కీంలు ఓట్ల కోసమే తప్ప ప్రజలకు ఉపయోగపడేవి కావన్నారు. కార్యక్రమంలో తీన్మార్ మల్లన్న టీం మండల ఇన్చార్జి రమణ, నాయకులు నగేశ్, రవి, రమేశ్ పాల్గొన్నారు.డిమాడ్లు తీర్చాలి
మనోహరాబాద్, వెలుగు: పారిశుద్ధ కార్మికుల డిమాండ్లను ప్రభుత్వం వెంటనే తీర్చాలని తీన్మార్ మల్లన్న కోరారు. బుధవారం మనోహరాబాద్ మండల కేంద్రంలో సమ్మె చేస్తున్న గ్రామ పంచాయతీ కార్మికులను కలిసి ఆయన సంఘీభావం తెలిపారు. అనంతరం మండల కేంద్రంలో డబుల్ బెడ్ రూమ్ ఇండ్లను పరిశీలించారు. మండలంలోని కాళ్లకల్లో ఇటీవల ఎలాంటి నోటీసులు ఇవ్వకుండా కూల్చివేసిన ఇండ్ల బాధితులకు నష్టపరిహారం చెల్లించాలని మల్లన్న డిమాండ్ చేశారు.
