ఒక్క అహ్మదాబాద్లోనే కాదు.. పూనే, ముంబై, చెన్నై, బెంగళూరు లాంటి చాలా సిటీల్లో ఉంది ఈ సేవ కేఫ్. 2006లో ‘మానవ్ సదన్’ ఎన్జీవో ఫౌండర్స్ జాన్ సిల్లిఫాంట్, జయేష్ పటేల్ ఈ కేఫ్ని ప్రారంభించారు. అమెరికాలోని శాన్ ఫ్రాన్సిస్కో, చికాగోలో ఉన్న ‘కర్మ కిచెన్’ ఇన్స్పిరేషన్తో మన దగ్గర ఈ కేఫ్ని పెట్టారు వీళ్లు. అహ్మదాబాద్లో మొదలైన ఈ కేఫ్ ఇప్పుడు దేశంలోని చాలా ప్రాంతాల్లో ఉంది. ప్రాంతాలు వేరైనా ఒకే మోటోతో నడుస్తున్న ఈ కేఫ్స్లో స్పెషల్ అట్రాక్షన్స్ బోలెడు..
మరొకరికి గిఫ్ట్ ఇవ్వొచ్చు
ఈ కేఫ్లోకి అడుగుపెట్టగానే.. వెయిటర్ లేదా మేనేజర్ నవ్వుతూ ఎదురొస్తారు. గ్రాండ్గా వెల్కమ్ చెప్తారు. ఆ తరువాత అక్కడ ఉన్న వలంటీర్స్ వచ్చి ప్రేమగా పలకరిస్తారు. ఈ కేఫ్లోని టేబుల్స్ అన్నీ.. జాయ్, పీస్, స్మైల్, యూనిటీ, హ్యాపీనెస్ లాంటి పేర్లతోనే ఉంటాయి. అంతేకాదు ఫ్రిజ్, కిచెన్, గ్యాస్ స్టవ్ అన్నింటికీ పేర్లు ఉంటాయి ఇక్కడ. వస్తువులతో కస్టమర్స్ని కనెక్ట్ చేయడానికే ఇలా పేర్లు పెట్టారట. డబ్బులివ్వట్లేదు కదా! అని ఫుడ్ ఎలా ఉంటుందో అనే ఆలోచన అక్కర్లేదు. ఇంటి వంటల రుచికి ఏమాత్రం తీసిపోవు. అవి కడుపారా తిన్నాక‘ ఇంతకుముందు కేఫ్కి వచ్చిన కస్టమర్.. మీ బిల్లు కట్టారని చెప్తారు’ వలంటీర్స్. కావాలనుకుంటే తర్వాత వచ్చే కస్టమర్కి గిఫ్ట్గా తోచినంత డబ్బుల్ని టేబుల్ మీద ఉన్న ఎన్వలప్లో పెట్టొచ్చు. అలా తెలియని వాళ్లు ఒకరికొకరు గిఫ్ట్ ఇచ్చుకోవడం వల్ల జనాల మధ్య నమ్మకం, ప్రేమ పెరుగుతాయనేది ఈ కాన్సెప్ట్ ఉద్దేశం. చాలా సందర్భాల్లో కస్టమర్స్ తిన్నవాటికి రెట్టింపు డబ్బు ఎన్వలప్లో పెడతారని చెప్పారు అక్కడి వలంటీర్లు.
ఈ కేఫ్లో కుకింగ్ దగ్గర్నించి..క్లీనింగ్, ఆర్డర్స్ తీసుకోవడం, వడ్డించడం.. అన్నీ వలంటీర్లే చేస్తారు. ఈ పనిలో ఉన్న సంతోషాన్ని ఎక్స్పీరియెన్స్ చేయడానికి వలంటీర్లుగా చేరామని అందరూ చెప్తారు. అయితే ఈ కేఫ్లో వలంటీర్గా పనిచేయడానికి ఎలాంటి అనుభవం అవసరం లేదు. నలుగురికీ సాయం చేయాలనుకునేవాళ్లు ఎవరైనా ఇందులో భాగం కావొచ్చు. రోజుకి రెండుమూడు గంటల చొప్పున కూడా ఇక్కడ పనిచేయొచ్చు. మనుషుల మధ్య భయాలు, అనుమానాలు పెరిగిపోతున్నాయి. నమ్మకం అనేదాన్ని చాలామంది మర్చిపోతున్నారు. ఆ నమ్మకాన్ని తిరిగి బతికించడానికి, హ్యుమానిటీని పెంచడానికి ఇదొక ప్రయత్నం అనేది వలంటీర్ల మాట.
