- స్విమ్మింగ్పూల్, హెలిప్యాడ్తో ‘ది అమెరికన్ డ్రీమ్’
- ప్రపంచంలోనే పొడవైన కారుకు కొత్త హంగులు
కారంటే నాలుగు చక్రాలు.. నాలుగు సీట్లు.. ఒక డిక్కీ.. 15 అడుగుల పొడవు.. సుఖూన్ జర్నీ.. అంతేనా! ఇగో ఈ కారు గురించి తెలిస్తే అంతకన్నా ఎక్కువే అంటరు. చూసేందుకు రైలు అంత పొడవున్న ప్రపంచంలోనే పొడవైన కారిది. పేరు ‘ది అమెరికన్ డ్రీమ్’. 100 అడుగుల పొడవుండే ఈ కారును రెండు భాగాలుగా తయారు చేసిన్రు. దీని స్పెషాలిటీ అక్కడితో ఆగిపోలే. ఇప్పటికే గిన్నీస్ రికార్డు కూడా ఉన్న ఈ కారులో ఈ మధ్యనే మరిన్ని హంగులను చేర్చారు. ఓ స్విమ్మింగ్పూల్ను ఏర్పాటు చేసిన్రు. హెలికాప్టర్ దిగడానికి హెలిప్యాడ్ను పెట్టిన్రు. జర్నీ సుఖూన్గానే కాదు.. ఎంజాయ్ చేస్కుంట పోవచ్చు. బోర్ కొడితే ఈత కొట్టొచ్చు.. కార్ల పెట్టిన బాత్ టబ్లలో జలకాలాడొచ్చు. గోల్ఫ్ ఆడుకోవచ్చు. అలసిపోతే హాయిగా పండుకుని రెస్ట్ తీసుకోవచ్చు. టీవీల్లో సినిమాలు చూడొచ్చు. రెండు తలకాయల పాము లెక్క ముందల్కెల్లి.. ఎన్కలకెల్లి ఎటంటే అటు తోల్కుంట పోవచ్చు. చెప్పుకుంట పోతే ఇంక మస్తుమస్తు స్పెషాలిటీలున్నయి ఈ కార్ల. 1986లో మొదటిసారి అమెరికాలోని కాలిఫోర్నియాలో ఉన్న బర్బాంక్లోని జే ఓర్బర్గ్ అనే సంస్థ.. 1976 నాటి కాడిలాక్ ఎల్డొరాడో లిమెజీన్ఆధారంగా ఈ కారుకు రూపమిచ్చింది. అప్పట్లో జస్ట్ 60 అడుగుల పొడవు, 26 గిల్లలతోటి దానిని తయారు చేసింది. ముందల, ఎన్కల రెండు వీ8 ఇంజన్లను పెట్టింది.
ఇట్ల రీస్టోర్ అయింది
ఓ ఆన్లైన్ సైట్లో దానిని కార్ఓనర్ అమ్మకానికి పెట్టడంతో.. ఆటోసియమ్ అనే మ్యూజియం ఓనర్ మైకేల్ మ్యానింగ్ దానిని కొన్నడు. వాస్తవానికి అతడు చాలా తక్కువ పైసలు ఇస్తననే సరికి ముందుగాల వాళ్లు ఇవ్వమన్నరు. తర్వాత డెజర్లాండ్ పార్క్ కార్ మ్యూజియంతో కలిసి మంచి ధరనే ఇచ్చి సొంతం చేస్కున్నరు. అప్పట్నుంచి ఆ కారును మళ్లా కొత్తదానిలా తయారు చేయడానికి కష్టపడ్డరు. 100 అడుగులకు పెంచి రీస్టోర్ చేసిన్రు. దాదాపు మూడేండ్లు సుమారు రూ.1.91 కోట్లు (2.5 లక్షల డాలర్లు) ఖర్చు పెట్టి సకల సౌకర్యాలతో దానికి జీవం పోసిన్రు. అంత పొడవైన కారును మూలల్లో మలపాలంటే కష్టం కదా. అందుకనే రెండు భాగాలుగా తయారు చేసి.. రైలు పెట్టెల్లాగా జాయింట్ చేసిన్రు. ఈ కార్ల 75 మంది ప్రయాణం చేయొచ్చు. అలాగని ఈ కారు రోడ్డు మీద రయ్యుమని దూస్కపోతదని.. ఎక్కాలని అనుకున్నా కుదిరే పని కాదు. ఎందుకంటే దానిని డెజర్లాండ్ పార్క్లోని కార్ల మ్యూజియంలోనే జనం చూసేందుకు షో కేస్లా మాత్రమే పెడ్తున్నరు మరి.
