కొన్నింటిని వండుకుని తినడం కంటే పచ్చిగా తినడానికే ఇష్టపడు తుంటారు చాలామంది. అందులో క్యారెట్ ముఖ్యమైనది. ప్రతి సీజన్లోనూ ఫుల్ డిమాండ్ ఉంటుంది దీనికి. క్యారెట్తో ఇప్పటికే కర్రీ, ఫ్రై, హల్వా వంటివి టేస్ట్ చేసే ఉంటారు. అయితే ఈసారి ఇవి కూడా ట్రై చేయండి. ఆరోగ్యానికి మేలు చేసే ఈ రెసిపీలు వింటర్కి పర్ఫెక్ట్ చాయిస్.
కంజి
కావాల్సినవి:
క్యారెట్- ఒకటి
బీట్రూట్లు- మూడు
మిరియాలు- ముప్పావు టీస్పూన్, నువ్వులు- ఒక టీస్పూన్, తెల్ల ఆవాలు, పసుపు, కారం - ఒక్కోటి పావు టీస్పూన్
ఉప్పు, నీళ్లు - సరిపడా
తయారీ:
తొక్క తీసి పొడవుగా కట్ చేసిన క్యారెట్, బీట్రూట్ ముక్కల్ని ఒక గిన్నెలో వేయాలి. మిక్సీజార్లో ఆవాలు, నువ్వులు, మిరియాలు, పసుపు, ఉప్పు, కారం వేసి గ్రైండ్ చేయాలి. ఆ పొడిని క్యారెట్, బీట్రూట్ ముక్కలకు పట్టించాలి. ఆపై వాటిని ఒక గ్లాస్ జార్లో వేసి దాన్నిండా నీళ్లు పోసి మూతపెట్టాలి. చీకటి ప్రదేశంలో ఉంచాలి. మూడు రోజుల తర్వాత తీసి తాగితే ఆరోగ్యానికి చాలా మంచిది. ఇది ప్రొబయోటిక్ డ్రింక్ కాబట్టి మనదేశంలో చాలామంది దీన్ని రెగ్యులర్గా తాగుతారు.
మురబ్బా
కావాల్సినవి:
క్యారెట్- అర కిలో
చక్కెర-
పావు కిలో
నీళ్లు- సరిపడా
యాలకుల పొడి- అర టీస్పూన్
కుంకుమ పువ్వు-
పావు టీస్పూన్
ఉప్పు- చిటికెడు
నిమ్మరసం- ఒక టీస్పూన్
తయారీ:
క్యారెట్లు శుభ్రంగా కడిగి తొక్కతీసి కట్ చేసి పెట్టుకోవాలి. పాన్లో నీళ్లు పోసి చక్కెర వేసి కరిగేవరకు మరిగించాలి. చక్కెర నీళ్లు బాగా తెర్లాక యాలకుల పొడి, కుంకుమ పువ్వు క్యారెట్ ముక్కలు, ఉప్పు వేసి కలపాలి. మూతపెట్టి కాసేపు ఉడికించాలి. పాకం దగ్గర పడ్డాక అందులో నిమ్మరసం కలపాలి. ఆపై గాలి చొరబడని గాజు సీసాలో వేసి మూతపెట్టుకుంటే చాలారోజులు నిల్వ ఉంటాయి. ఎప్పుడు తినాలనుకుంటే అప్పుడు తీసి తినొచ్చు.
పాయసం
కావాల్సినవి:
క్యారెట్లు- పావు కిలో
పాలు- అర లీటరు
చక్కెర- సరిపడా
నెయ్యి- ఒక
టేబుల్ స్పూన్
ఎండుద్రాక్ష, బాదం-
ఒక్కోటి రెండు
టేబుల్ స్పూన్లు
యాలకుల పొడి- అర టీస్పూన్
జీడిపప్పు- వంద గ్రాములు, పచ్చి కొబ్బరి ముక్కలు- కొన్ని
తయారీ : శుభ్రంగా కడిగి, కట్ చేసి పెట్టుకున్న క్యారెట్లను ప్రెజర్ కుక్కర్లో వేయాలి. వాటితోపాటు జీడిపప్పులు కూడా వేసి నీళ్లు పోసి మూతపెట్టాలి. ఉడికిన తర్వాత మెత్తగా రుబ్బాలి లేదా మిక్సీ పట్టాలి. పాన్లో నెయ్యి వేడి చేసి బాదం తరుగు, పచ్చి కొబ్బరి ముక్కలు, ఎండుద్రాక్ష వేసి వేగించాలి. అవన్నీ వేగాక అందులో పాలు పోసి మరిగించాలి. తర్వాత ఆ మిశ్రమంలో చక్కెర, క్యారెట్ మిశ్రమం వేసి బాగా కలపాలి. కాసేపయ్యాక మిశ్రమం దగ్గరపడుతుంది. అప్పుడు స్వీట్ సరిపోయిందో లేదో చూసుకుని అవసరమైతే కొంచెం చక్కెర వేసి కలుపుకోవాలి. ఈ పాయసం వేడి వేడిగా తింటే చాలా టేస్టీగా ఉంటుంది.
