నల్గొండ అర్బన్, వెలుగు: నల్గొండ జిల్లా వాడపల్లి వద్ద రూ.3.04 కోట్ల నగదు సీజ్ చేశామని ఎస్పీ అపూర్వ రావు ప్రకటించారు. అసెంబ్లీ ఎన్నికల నేపథ్యంలో అన్ని చోట్ల చెక్పోస్టులు ఏర్పాటు తనిఖీలు చేపడుతున్నామని తెలిపారు. ఎస్పీ ఆఫీస్లో ఆదివారం ఏర్పాటు చేసిన మీడియా సమావేశంలో అపూర్వ రావు మాట్లాడారు. ఆదివారం ఉదయం 5.30 గంటలకు మాడుగులపల్లి టోల్గేట్ వద్ద ఎస్ఐ, సిబ్బంది వెహికల్స్ చెక్ చేస్తుండగా వైట్కలర్ కారు ఆపకుండా వెళ్లిపోయిందన్నారు.
దీంతో మాడుగులపల్లి పోలీసులు మిర్యాలగూడ డీఎస్పీకి సమాచారం ఇచ్చారని, ఆయన టు టౌన్ సీఐ నరసింహ రావును అప్రమత్తం చేశారని వివరించారు. ఈదులుగూడ సిగ్నల్ వద్ద కూడా వెహికల్ను ఆపేందుకు ప్రయత్నించగా.. తప్పించుకుని వెళ్లిపోయిందన్నారు. వాడపల్లి వద్ద బారికేడ్లు ఏర్పాటు చేసి వెహికల్ను పట్టుకున్నామని తెలిపారు. వెహికల్ లో ఉన్న ఇద్దరిని అదుపులోకి తీసుకుని.. సీట్ల కింద చెక్ చేయగా రూ.3.04 కోట్ల నగదు గుర్తించామని వివరించారు.
డ్రైవర్ను గుజరాత్లోని అహ్మదాబాద్కు చెందిన విపుల్ కుమార్గా, మరో వ్యక్తిని మహేసేనకు చెందిన అమర్ సిన్హాజాలాగా గుర్తించామన్నారు. ఇద్దరిని అదుపులోకి తీసుకుని పలు సెక్షన్ల కింద కేసు రిజిస్టర్ చేసి అరెస్ట్ చేశామని వివరించారు. అసెంబ్లీ ఎన్నికలను దృష్టిలో పెట్టుకుని జిల్లా వ్యాప్తంగా 2,800 మందిని బైండోవర్ చేశామని తెలిపారు. ఇప్పటి దాకా రూ.7.39 కోట్ల నగదు, రూ.40లక్షల విలువగల మద్యం, రూ.1.71 కోట్లు విలువ చేసే గంజాయి, రూ.80లక్షలు విలువ చేసే బంగారం పట్టుకున్నామని తెలిపారు.
