- మూడేళ్లలో పుష్కలంగా ఉండాలి.. స్కూళ్లకు సీబీఎస్ఈ కొత్త రూల్స్
పోయిన ఎండాకాలంలో చెన్నై సహా దేశంలోని వివిధ ప్రాంతాల్లో నీటి కరువు ఎంతలా భయపెట్టిందో అందరికీ తెలిసిందే. బిందెడు నీళ్ల కోసం తండ్లాడాల్సిన పరిస్థితి ఉంది. సరైన నిర్వహణ లేకపోవడమే దానికి కారణమన్నది నిపుణుల వాదన. అయితే, ఇప్పుడు స్కూళ్లకు సీబీఎస్ఈ ఓ కొత్త నిబంధన పెట్టింది. నీటి సమస్యను అధిగమించాలని ఆదేశించింది. వచ్చే మూడేళ్లలో పుష్కలంగా నీళ్లుండేలా స్కూళ్లలో మంచి నీటి నిర్వహణ విధానాలు పాటించాలని సూచించింది. హైదరాబాద్, చెన్నై, బెంగళూరు సహా 21 నగరాల్లో వచ్చే ఏడాది నీటి కటకట ముప్పు పొంచి ఉందని నీతి ఆయోగ్ హెచ్చరించిన నేపథ్యంలోనే స్కూళ్లలో నీటి నిర్వహణకు సంబంధించిన విధానాలకు బోర్డు గైడ్లైన్స్ రూపొందించింది. అందులో భాగంగా స్కూళ్లలో పాటిస్తున్న పాత విధానాలకు స్వస్తి చెప్పాలని సూచించింది. నీటిని మెరుగ్గా వాడుకునే శక్తి ఉన్న కొత్త పరికరాలను పెట్టాలని చెప్పింది. సెన్సర్లతో కూడిన ఆటోమేటిక్ ట్యాప్లను బిగించాలని సూచించింది. అవసరాలకు తగ్గట్టు డబుల్ ఫ్లష్ ట్యాంకులను ఏర్పాటు చేసుకోవాలని చెప్పింది. ‘‘నీళ్లు లేని స్కూలు అనేది ఉండడానికి వీల్లేదు. కాబట్టి సీబీఎస్‌‌‌‌‌‌‌‌ఈతో ఉన్న అన్ని స్కూళ్లు పెట్టిన రూల్స్ అన్నింటినీ విధిగా పాటించాల్సిందే.
వచ్చే మూడేళ్లలో పెట్టిన లక్ష్యాలను చేరాల్సిందే. ఆ లక్ష్యాలను అందుకుంటే ఆ స్కూలు నీటి పరిరక్షణపై ఎంత బాధ్యతతో ఉందో తెలుస్తుంది” అని సీబీఎస్ఈ సీనియర్ అధికారి ఒకరు చెప్పారు. తాగడానికి, బాత్రూంలకు, గార్డెన్లకు, ఆట స్థలాలకు స్కూళ్లు ఎక్కువగా నీళ్లు వాడుతుంటాయని, వాడడమే కాకుండా నీటిని ఆదా చేసుకోవడం, కాపాడుకోవడమూ వాటి బాధ్యతేనని అన్నారు. నీటి సంరక్షణ కోసం ‘స్కూల్ వాటర్ మేనేజ్మెంట్ కమిటీ’లను ఏర్పాటు చేసుకోవాల్సిందిగా అన్ని స్కూళ్లకు ఆయన పిలుపునిచ్చారు. ఆ కమిటీల్లో స్కూలు ఓనర్లు, టీచర్లు, స్టూడెంట్లు, నాన్ టీచింగ్ స్టాఫ్, స్టూడెంట్ల తల్లిదండ్రులను భాగస్వాములను చేయాలన్నారు. స్కూల్లో నీటి వాడకంపై ఆ కమిటీదే పూర్తి బాధ్యతన్నారు. ఎప్పటికప్పుడు నీటి వినియోగంపై సమీక్షలు జరపాలన్నారు. అలాగైతేనే నీటిని వృథా చేయకుండా మెరుగ్గా వాడుకునేందుకు వీలవుతుందన్నారు.
