- నేషనల్ లైవ్స్టాక్ మిషన్ ద్వారా 50 % సబ్సిడీ
- యూనిట్ కాస్ట్ రూ.12 లక్షల నుంచి రూ.కోటి వరకు..
- గొల్లకుర్మలతో పాటు అన్ని సామాజిక వర్గాలకు చాన్స్
మంచిర్యాల, వెలుగు: మాంసం ఉత్పత్తులను పెంచడానికి కేంద్ర ప్రభుత్వం నేషనల్ లైవ్స్టాక్మిషన్(ఎన్ఎల్ఎం) ద్వారా గొర్రెలు, మేకలు, కోళ్ల పెంపకానికి చేయూతనిస్తోంది. యూనిట్ విలువ రూ.12 లక్షల నుంచి రూ. కోటి కాగా, అందులో సర్కారు 50 % సర్కారు సబ్సిడీ అందిస్తోంది. గొల్లకుర్మలకే కాకుండా అన్ని సామాజిక వర్గాలకు చెందినవారు అర్హులే. పశుసంవర్థక శాఖ ద్వారా ఈ స్కీంను అమలు చేస్తోంది. ఈ పథకంపై అంతగా ప్రచారం, అవగాహన లేకపోవడంతో ఔత్సాహికుల నుంచి స్పందన కొరవడింది. ఇప్పటివరకు మంచిర్యాల జిల్లాలో 13 దరఖాస్తులు రాగా, నాలుగు యూనిట్లు గ్రౌండింగ్ అయ్యాయి.
ఐదు విభాగాలుగా యూనిట్లు
ఎన్ఎల్ఎం ద్వారా ఇంతకుముందు రూ. కోటి విలువైన యూనిట్లను మాత్రమే మంజూరు చేశారు. ఇందులో రూ.50 లక్షలు సబ్సిడీ, రూ.40 లక్షలు బ్యాంక్ లోన్, మిగతా రూ.10 లక్షలు లబ్ధిదారుల వాటాగా ఉండేది. ఈ యూనిట్ కింద 500 గొర్రెలు, 25 పొట్టేళ్లు ఇచ్చేవారు. యూనిట్కాస్ట్ఎక్కువగా ఉండడంతో బ్యాంకులు ష్యూరిటీ లేకుండా లోన్లు ఇవ్వడం లేదు. దీంతో కేంద్ర ప్రభుత్వం ఇటీవల ఎన్ఎంల్ఎం రూల్స్ను సరళతరం చేస్తూ మార్పులు చేసింది. యూనిట్లను ఐదు విభాగాలుగా విభజించింది. 105 గొర్రెలకు రూ.12 లక్షలు, 210 గొర్రెలకు రూ.40 లక్షలు, 315 గొర్రెలకు రూ.60, 420 గొర్రెలకు రూ.80 లక్షలు, 525 గొర్రెలకు రూ.కోటి. ఇందులో ఏ యూనిట్ను ఎంచుకున్నా 50 శాతం సబ్సిడీ లభిస్తుంది. మేకలు, గొర్రెలే కాకుండా దేశవాళీ కోళ్లు, పందుల పెంపకం కూడా చేపట్టవచ్చు. వీటి యూనిట్ కాస్ట్ రూ.50 లక్షలకే పరిమితం.
రెండు నుంచి పదెకరాల భూమి
ఎంపిక చేసుకున్న యూనిట్ను బట్టి రెండు నుంచి పదెకరాల భూమి అవసరం ఉంటుంది. సొంత భూమి లేకుంటే లీజుకు తీసుకోవచ్చు. చుట్టూ ఫెన్సింగ్వేసి, షెడ్లు నిర్మించి అందులోనే మేత ఏర్పాట్లు కూడా చేసుకోవాలి. బ్యాంక్ లోన్ కోసం కాన్సెంట్ తీసుకోవాలి. అన్ని ఒరిజినల్ డాక్యుమెంట్లు జత చేస్తూ ఆన్లైన్లో nlm.udyamimitra.in వెబ్సైట్లో అప్లై చేసుకోవాలి. అప్లికేషన్హార్డ్కాపీలను జిల్లా పశుసంవర్థక శాఖ ఆఫీసులో సమర్పించాలి.
ఎంపిక విధానం
ఎన్ఎల్ఎంకు రాష్ట్ర స్థాయిలో యానిమల్హజ్బెండరీ డైరెక్టర్నోడల్ఆఫీసర్గా వ్యవహరిస్తారు. లబ్ధిదారుల ఎంపికకు రాష్ట్ర, కేంద్ర స్థాయిల్లో రెండు కమిటీలు ఉంటాయి. ఆన్లైన్లో వచ్చిన దరఖాస్తులను క్షుణ్ణంగా పరిశీలించి లబ్ధిదారులను ఎంపిక చేస్తారు. బ్యాంక్లోన్శాంక్షన్అయిన తర్వాత 25 శాతం, యూనిట్ గ్రౌండింగ్ సమయంలో మిగతా 25 శాతం సబ్సిడీ వస్తుంది. బ్యాంక్లోన్అవసరం లేదనుకుంటే లబ్ధిదారులు సొంతంగా కూడా పెట్టుబడి పెట్టుకోవచ్చు.
సద్వినియోగం చేసుకోవాలి
కేంద్ర ప్రభుత్వం ఎన్ఎల్ఎం ద్వారా గొర్రెలు, మేకలు, కోళ్లు, పందుల పెంపకంతో పాటు ఫీడ్ అండ్ఫాడర్ ప్లాంట్ ఏర్పాటు చేసుకోవచ్చు. అన్ని యూనిట్లపైనా 50 శాతం సబ్సిడీ లభిస్తుంది. జిల్లాలో 13 దరఖాస్తులు రాగా నాలుగు యూనిట్లు శాంక్షన్ అయ్యాయి. లాభదాయకమైన ఈ పథకాన్ని ఔత్సాహికులు సద్వినియోగం చేసుకోవాలి.
- రమేష్, జిల్లా పశువైద్య అధికారి
