ఆఫర్లు, డిస్కౌంట్లతో జాగ్రత్త! అంతా డార్క్ ప్యాటర్న్ మాయ.. అంటే..

• డార్క్​ ప్యాటర్నులతో జాగ్రత్త
• డ్రిప్​ప్రైసింగ్తో కంపెనీల మోసాలు
• ​హెచ్చరించిన కేంద్ర ప్రభుత్వం 
• ఫిర్యాదుకు ప్రత్యేక హెల్ప్​లైన్​

న్యూఢిల్లీ: హైదరాబాద్​కు చెందిన నిరంజన్​ ఒక ఫుడ్​ డెలివరీ యాప్​ ద్వారా బిర్యానీ కోసం వెతికాడు. ధర రూ.200 కనిపించడంతో మంచి ఆఫర్​ అనుకున్నాడు. పేమెంట్​ పేజీకి వెళ్లాక రూ.280 చూపించడంతో షాకయ్యాడు.  ప్లాట్​ఫారమ్​ ఫీజు, డెలివరీ ఫీజు, డొనేషన్​ వంటివి చేర్చడంతో మొత్తం బిల్లు అమాంతం పెరిగింది.  చాలా ఈ–-కామర్స్ ప్లాట్​ఫారాలు ఇలా చేస్తుండటంతో కేంద్రం కూడా రంగంలోకి దిగింది. ఇందుకోసం డ్రిప్​ ప్రైసింగ్​వంటి డార్క్​ ప్యాటర్న్​ పద్ధతులను వాడుతున్నాయని కేంద్ర వినియోగదారుల వ్యవహారాల శాఖ తెలిపింది.  

కొనేటప్పుడు తక్కువ ధరను చూపుతూ.. పేమెంట్ ​చేసే సమయంలో ధరను పెంచిచూపడాన్ని డ్రిప్ ​ప్రైసింగ్​అంటారు. డిస్కౌంట్ ఉన్నప్పటికీ, ఈ డ్రిప్​ ప్రైసింగ్ విధానం ఫైనల్​ బిల్లును పెంచుతుంది. డీల్ చాలా బాగున్నట్లు అనిపిస్తుంది కానీ చివరిలో చూపించే చార్జీలు ధరను పెంచుతాయి.  కొన్ని సంస్థలు జీఎస్టీని తగ్గించామని చెబుతాయి కానీ పాత మొత్తాన్నే వసూలు చేస్తాయి. ఫ్రీ డెలివరీ అంటూ ఊరిస్తూనే చివరికి ఆ చార్జీనీ వసూలు చేస్తాయి. డార్క్​ప్యాటర్న్​లపై ​ 1915 నంబరుకు ఫిర్యాదు చేయవచ్చు. 

ఇలా దోచేస్తారు.. 

 ఒక ప్రొడక్టును కొనుగోలు చేసేటప్పుడు, అదనపు సేవలు లేదా వస్తువుల (ఉదాహరణకు, ప్రయాణ బీమా, డొనేషన్, ఎక్స్​ట్రా వారంటీ) కోసం బాక్సులు డిఫాల్ట్​గా టిక్ అయి ఉంటాయి. గమనించకుండా చెకౌట్ చేస్తే, జేబుపై అదనపు భారం పడుతుంది. ఫ్రీ ట్రయల్​పేరుతోనూ అదనంగా వసూలు చేస్తారు. కంపెనీ ఏదైనా సబ్​స్క్రిప్షన్​కోసం ఫ్రీ ట్రయల్​ను అందిస్తూనే, మీ క్రెడిట్​కార్డు వివరాలు ఇవ్వాలని అడుగుతారు. ట్రయల్ ముగిసిన తర్వాత,  రిమైండర్ లేకుండానే పూర్తి-స్థాయి సబ్‌స్క్రిప్షన్‌గా మారుతుంది. దీంతో ప్రతి నెలా కార్డు నుంచి డబ్బులు కట్​అవుతాయి.   క్రెడిట్ కార్డ్ లేదా డిజిటల్ వాలెట్ వంటి వాటితో చెల్లిస్తే , చివరిలో అదనంగా  కన్వీనియన్స్ ఫీజు లేదా  ప్రాసెసింగ్ ఫీజు వసూలు చేస్తాయి. డెలివరీ, టికెట్, బుకింగ్ వంటివి కొనేటప్పుడు టిప్​ను కూడా ఫైనల్​బిల్లుకు కలుపుతాయి.

డార్క్​ ప్యాటర్న్​ అంటే...

ఆన్‌లైన్ ప్లాట్‌ఫారమ్‌లలో యూజర్లను మోసం చేయడానికి లేదా వారు కోరని పనులు చేసేలా చేయడానికి  రూపొందించిన మోసపూరిత డిజైన్ పద్ధతులనే డార్క్​ప్యాటర్న్స్​​అంటారు. ఈ ట్రిక్స్ యూజర్ ఎక్స్​పీరియెన్స్​ను తమకు అనుకూలంగా మార్చుకుని, వినియోగదారులకు తెలియకుండానే కంపెనీలకు లాభం చేకూరుస్తాయి.