షోపియాన్లో ఎన్ఎస్ఏ అజిత్ ధోవల్ పర్యటన
స్థానికులతో ముచ్చట్లు, రోడ్డు పక్కనే లంచ్
శ్రీనగర్: ‘‘అల్లాహ్ దయతో ఇకపై అంతా మంచే జరుగుతుంది. సేఫ్టీ, సెక్యూరిటీకి మాదే బాధ్యత. మీ పిల్లలు, వాళ్ల తర్వాతి తరాల వాళ్లూ ఇక్కడే ప్రశాంతంగా లైఫ్ లీడ్ చేస్తూ, ప్రంపంచంలో తమకంటూ గొప్ప పేరు తెచ్చుకుంటారు..”అంటూ కాశ్మీరీలకు భరోసా ఇచ్చారు నేషనల్ సెక్యూరిటీ అడ్వైజర్ అజిత్ ధోవల్. పాకిస్థాన్ సరిహద్దుకు దగ్గరగా ఉండే దక్షిణ కాశ్మీర్లో బుధవారం ఆయన పర్యటించారు. షోఫియాన్ జిల్లా కేంద్రంలో స్థానికులతో మాట్లాడారు. ఆర్టికల్ 370 రద్దు, రాష్ట్ర విభజనపై ఎవరూ ఆందోళన చెందాల్సిన అవసరంలేదని, కొద్ది రోజుల్లోనే పరిస్థితులు చక్కబడతాయని అన్నారు. ఎవరెవరు ఏమేం పనులు చేస్తారో, వాళ్ల జీవితాలెలా గడుస్తున్నాయో దోవల్ ఒక్కొకర్నీ అడిగి తెలుసుకున్నారు. ఉద్రిక్తత తగ్గిన వెంటనే షాపులు ఓపెన్ చేసుకోవచ్చని తెలిపారు. ఈలోపే కాశ్మీరీ సంప్రదాయ వంటకం ‘వజ్వాన్’ రెడీ కావడంతో అక్కడున్నవాళ్లతో కలిసి ధోవల్ రోడ్డు పక్కనే లంచ్ చేశారు.
కాశ్మీర్ పోలీసులు గ్రేట్
దక్షిణ కాశ్మీర్ పర్యటనలో భాగంగా సీఆర్పీఎఫ్, జమ్మూకాశ్మీర్ పోలీస్ టీమ్లతోనూ అజిత్ ధోవల్ మాట్లాడారు. ఎక్కడ, ఎలాంటి సమస్య వచ్చినా డీల్ చేసేది సీఆర్పీఎఫ్ బలగాలేనని, ఆ రకంగా దేశసేవలో ముందుంటారని గుర్తుచేశారు. లోకల్ పోలీసులతో ముచ్చటిస్తూ.. ‘‘ప్రజల కోసం మీరు ప్రాణాలకు తెగించి పోరాడుతారు. చాలా సార్లు మన త్యాగాలకు గుర్తింపు కూడా దొరకదు. తీవ్రవైన ఒత్తిళ్లు ఉన్నా డ్యూటీ విషయంలో కమిట్మెంట్ చూపిస్తారు. అందుకే మీరంటే నాకు చాలా గౌరవం. జమ్మూకాశ్మీర్ పోలీసులు నిజంగా గ్రేట్. దేశంలో మీకంటూ ప్రత్యేక గుర్తింపు ఉంటుంది’’అని ధోవల్ అన్నారు. మంగళవారం లోక్సభలో కాశ్మీర్ విభజన బిల్లు పాసైన కొద్దిసేపటికే కాశ్మీర్లో ప్రత్యక్షమైన అజిత్ ధోవల్.. కాన్ఫిడెన్స్ బిల్డింగ్ మెజర్స్(సీబీఎం)లో భాగంగా స్థానికులతో మమేకమయ్యారు.
