గంగాధర, వెలుగు: ఇందిరమ్మ ఇంటి పథకం నిరుపేదల జీవితాల్లో వెలుగులు నింపిందని, సీఎం రేవంత్రెడ్డి సహకారంతో నియోజకవర్గంలోని పేద, మధ్యతరగతి ప్రజల సొంతింటి కలను నిజం చేస్తున్నామని కరీంనగర్ డీసీసీ అధ్యక్షుడు, చొప్పదండి ఎమ్మెల్యే మేడిపల్లి సత్యం అన్నారు. సోమవారం గంగాధర మండలం మధురానగర్ ప్రజా కార్యాలయంలో బూరుగుపల్లికి చెందిన ఆరుగురు లబ్ధిదారులకు ఇందిరమ్మ ఇండ్ల మంజూరు పత్రాలను ఆయన అందజేశారు.
ఈ సందర్భంగా ఆయన మాట్లాడుతూ చొప్పదండి నియోజకవర్గంలో ఇప్పటికే 3,500 ఇందిరమ్మ ఇళ్లను మంజూరు చేశామని, మరో 2 వేల ఇండ్లను మంజూరు చేయించి ఇండ్లు లేని నిరుపేదలకు కేటాయిస్తామని పేర్కొన్నారు. కార్యక్రమంలో తహసీల్దార్ రజిత, ఎంపీడీవో రాము, కాంగ్రెస్ మండల అధ్యక్షుడు మంత్రి మహేందర్, సర్పంచులు కళ్యాణ్, ఆనందం, అజయ్ రావు, వీరేశం, తిరుపతి, భాస్కర్ పాల్గొన్నారు.
