సూర్యాపేట వెలుగు: మెదక్ జిల్లా రామాయంపేట తల్లీకొడుకుల సూసైడ్ ఘటనలో ఏ7గా ఉన్న సీఐ నాగార్జున గౌడ్ డ్యూటీలో జాయిన్అయ్యారు. ఈ కేసులో మిగిలిన ఆరుగురు నిందితులు కోర్టు విచారణను ఎదుర్కొంటూ నిజామాబాద్జిల్లా జైలులో ఉండగా, ఇన్నాళ్లూ పరారీలో ఉన్న సీఐ మాత్రం బుధవారం సూర్యాపేట జిల్లాలో మంత్రి జగదీశ్రెడ్డి పాల్గొన్న ఓ కార్యక్రమంలో ప్రత్యక్షం అయ్యారు. ఏడుగురు వ్యక్తుల వల్లే తాము చనిపోతున్నామంటూ మృతుడు సంతోష్ సూసైడ్కు ముందు నిందితుల పేర్లు, ఫొటోలను ఫేస్బుక్లో పోస్ట్ చేశాడు. సెల్ఫీ వీడియో, సూసైడ్ నోట్ ఆధారంగా పోలీసులు ఏడుగురిపై కేసు నమోదు చేశారు. వీరిలో తుంగతుర్తి సీఐ నాగార్జున గౌడ్ ఏ7గా ఉన్నారు.
పరారీలో ఉన్న సీఐ డ్యూటీలో ప్రత్యక్షం
ఈ కేసుకు సంబంధించి ఆరుగురు నిందితులను ఇప్పటికే కామారెడ్డి పోలీస్స్టేషన్లో లొంగిపోయారు. కేసులో సీఐ నాగార్జున గౌడ్ పేరు బయటకు వచ్చినప్పటి నుంచి ఆయన కనిపించకుండా పోయారు. ఆరుగురు నిందితులు కామారెడ్డిలో లొంగిపోయిన రోజే నాగార్జున గౌడ్ కూడా లొంగిపోతారని ప్రచారం జరిగినా లొంగిపోలేదు. దీంతో ఆరుగురు నిందితులను కోర్టులో ప్రవేశపెట్టిన పోలీసులు, సీఐ నాగార్జునగౌడ్ను పరారీలో ఉన్నట్లు చూపుతూ వచ్చారు. మరోవైపు ఆరుగురు నిందితులకు జుడిషియల్ కస్టడీ పొడిగించిన కోర్టు బెయిల్ నిరాకరించింది. దీంతో ప్రస్తుతం వీరంతా నిజామాబాద్జైలులో ఉన్నారు. మరోవైపు సీఐ నాగార్జున గౌడ్పై పోలీస్ఉన్నతాధికారులు కనీసం శాఖాపరమైన చర్యలు కూడా తీసుకోలేదు. దీంతో నాలుగు రోజుల క్రితమే ఆయన తుంగతుర్తి పోలీస్ స్టేషన్ లో డ్యూటీలో రీ జాయిన్ అయ్యారు. బుధవారం మంత్రి జగదీశ్ రెడ్డి పాల్గొన్న ఓ కార్యక్రమంలో ప్రత్యక్షమయ్యారు. నూతనకల్ మండలంలోని పిల్పకుంట్ల గ్రామంలో జరిగిన వివేకానంద విగ్రహావిష్కరణలో మంత్రి పాల్గొనగా, సీఐ నాగార్జున గౌడ్ బందోబస్తు డ్యూటీలో పాల్గొన్నారు.
