హైదరాబాద్, వెలుగు .సీఎం కేసీఆర్ గురువారం కాళేశ్వరం ప్రాజెక్టును సందర్శించనున్నారు. మేడిగడ్డ బ్యారేజీని పరిశీలించి, వచ్చే వానాకాలంలో నీటిని తరలించే అంశంపై ఇంజనీర్లతో సమీక్షించనున్నారు. ఈ మేరకు సీఎం బుధవారం రాత్రి 7.45 గంటలకు ప్రగతిభవన్‌ నుంచి రోడ్డు మార్గంలో కరీంనగర్‌కు బయల్దేరారు. రాత్రికి కరీంనగర్‌ (తీగలగుట్టపల్లి)లోని ఉత్తర తెలంగాణ భవన్‌లో బస చేస్తారు. గురువారం ఉదయం 9 గంటలకు కరీంనగర్‌ నుంచి హెలికాప్టర్‌లో కాళేశ్వరానికి బయల్దేరుతారు. 10 గంటలకు కాళేశ్వర ముక్తీశ్వరస్వామిని దర్శించుకుని ప్రత్యేక పూజలు చేస్తారు. తర్వాత మేడిగడ్డ బ్యారేజీకి చేరుకుని పరిశీలిస్తారు. అక్కడే ఇంజనీర్లతో నీటి లిఫ్టింగ్‌పై సమీక్షిస్తారు. లంచ్ చేశాక హెలికాప్టర్‌లో తిరిగి కరీంనగర్‌కు చేరుకుంటారు. ఉత్తర తెలంగాణ భవన్‌లో కాసేపు విశ్రాంతి తీసుకుని సాయంత్రం హైదరాబాద్‌కు బయల్దేరుతారు. చీకటిపడే లోపే సీఎం తిరుగు ప్రయాణమైతే హెలిక్యాప్టర్‌ ద్వారా వస్తారని.. చీకటి పడితే రోడ్డు మార్గాన వస్తారని సీఎంవో వర్గాలు వెల్లడించాయి.
