బీహార్ లో ఓటర్ అధికార యాత్ర తిరిగి ప్రారంభమైంది. మంగళవారం (ఆగస్టు26) బీహార్ లోని సుపాల్ లో సాగుతున్న ఓటర్ అధికార్ యాత్రలో కాంగ్రెస్ నేత రాహుల్ గాంధీతో కలసి ప్రియాంకగాంధీ, తెలంగాణ సీఎం రేవంత్ రెడ్డి, డిప్యూటీ సీఎం మల్లు భట్టి విక్రమార్క సహా పలువురు మంత్రులు ఈ యాత్రలో పాల్గొన్నారు. ఆర్జేడీనేత తేజస్వి యాదవ్, ఇండియా బ్లాక్‌కు చెందిన ఇతర ప్రతినిధులతో పాటు నేతలంగా SUV పైకప్పుపై కూర్చుని ప్రజలకు అభివాదం చేశారు.
ఒకరోజు విరామం తీసుకున్న వోట్ అధికార్ యాత్ర మంగళవారం తిరిగి ప్రారంభమైంది. ఆదివారం అరారియాలో జరిగిన విలేకరుల సమావేశంలో రాహుల్ గాంధీమాట్లాడుతూ..బీహార్‌లోని అన్ని భారత కూటమి నియోజకవర్గాలు రాబోయే అసెంబ్లీ ఎన్నికల కోసం ఐక్యంగా పనిచేస్తున్నాయన్నారు. మంచి ఫలితాలుంటాయని చెప్పారు.
ప్రతిపక్ష కూటమిలోని అన్ని నియోజకవర్గాలు ఐక్యంగా పనిచేస్తున్నాయి. మేం సైద్ధాంతికంగా,రాజకీయంగా కలుపుకుపోతున్నామన్నారు. పరస్పరం ఒకరినొకరు గౌరవించుకుంటూ పోతున్నామన్నారు. బీహార్ ఎన్నికల సందర్భంగా ఇండియా కూటమి త్వరలో మేనిఫెస్టోను విడుదల చేస్తుందని రాహుల్ గాంధీ అన్నారు.
►ALSO READ | అనంత్ అంబానీ వంతారాపై.. సిట్ విచారణకు సుప్రీంకోర్టు ఆదేశం
కేంద్రంలోని ఎన్డీయే కూటమి ప్రభుత్వంపై కూడా రాహుల్ గాంధీ తీవ్ర విమర్శలు చేశారు. రాష్ట్రంలో కొనసాగుతున్న స్పెషల్ ఇంటెన్సివ్ రివిజన్ (SIR) ఓటర్ల జాబితా బీజేపీకి అనుకూలంగా ఓట్లను దొంగిలించేందుకు ఎన్నికల కమిషన్ చేసిన సంస్థాగత ప్రయత్నం అని రాహుల్ ఆరోపించారు.
ఆగస్టు 17న ససారాం నుంచి ప్రారంభమైన 16 రోజుల ఈ యాత్ర సెప్టెంబర్ 1న పాట్నాలో జరిగే భారీ ర్యాలీతో ముగుస్తుంది. రాష్ట్రవ్యాప్తంగా 13వందల కిలోమీటర్లకు పైగా సాగే ఈ యాత్ర.. ఇప్పటివరకు గయాజీ, నవాడా, షేక్‌పురా, లఖిసరాయ్, ముంగేర్, కతిహార్ ,పూర్నియా జిల్లాల గుండా సాగింది. ఇది మధుబని, దర్భంగా, సీతామర్హి, పశ్చిమ చంపారన్, సరన్, భోజ్‌పూర్ ,పాట్నా మీదుగా కొనసాగనుంది.
