- ఈ నెల 16న జిల్లాలో పర్యటన
నిర్మల్, వెలుగు: సీఎం రేవంత్ రెడ్డి ఈనెల 16న నిర్మల్ జిల్లాలో పర్యటించి మామడ మండలం పొన్కల్ వద్ద నిర్మించిన సదర్మాట్ బ్యారేజీని ప్రారంభించనున్నారు. మొదట సీఎం హైదరాబాద్ నుంచి హెలిక్యాప్టర్లో ఆదిలాబాద్ వెళ్లి అక్కడ చనాక కొరాట ప్రాజెక్టు పంప్ హౌస్ను ప్రారంభించనున్నారు. అక్కడి నుంచి సీఎం పొనకల్ వద్దకు చేరుకొని సదర్మాట్ బ్యారేజీ నుంచి యాసంగి పంటలకు నీటిని విడుదల చేయనున్నారు.
మధ్యాహ్నం రెండు గంటలకు నిర్మల్లో ఏర్పాటు చేసే బహిరంగ సభలో సీఎం పాల్గొనున్నారు. ఈ పర్యటనకు సంబంధించిన రూట్మ్యాప్, షెడ్యూల్ విడుదలైంది. కార్యక్రమంలో సీఎంతో పాటు రాష్ట్ర ఇరిగేషన్ మంత్రి ఉత్తమ్కుమార్ రెడ్డి కూడా పాల్గొననున్నారు.
ఏర్పాట్ల పరిశీలన
సీఎం పర్యటన నేపథ్యంలో సదర్ మాట్ వద్ద, నిర్మల్ లో బహిరంగ సభ వద్ద ఏర్పాట్లను సోమవారం కాంగ్రెస్ జిల్లా ఇన్చార్జ్ తాహెర్ బిన్ హందాన్, నిర్మల్ నియోజకవర్గ ఇన్చార్జ్ శ్రీహరి రావు పర్యవేక్షించారు. సీఎం బహిరంగ సభను విజయవంతం చేయాలని, రైతులు, కాంగ్రెస్ నాయకులు, కార్యకర్తలు పెద్ద సంఖ్యలో తరలిరావాలని పిలుపునిచ్చారు. మార్కెట్ కమిటీ చైర్మన్లు భీంరెడ్డి, హాది, లైబ్రరీ సంస్థ చైర్మన్ అర్జున్ మంద్ తదితరులు పాల్గొన్నారు.
