జనగామ జిల్లాలో గ్రీవెన్స్ అర్జీలను వెంటనే పరిష్కరించాలి : కలెక్టర్ భాషా షేక్

జనగామ అర్బన్, వెలుగు: ప్రజావాణిలో వచ్చిన దరఖాస్తులను పరిశీలించి చర్యలు తీసుకోవాలని జనగామ కలెక్టర్ భాషా షేక్​అధికారులను ఆదేశించారు. సోమవారం కలెక్టరేట్​లో నిర్వహించిన ప్రజావాణిలో అడిషనల్​కలెక్టర్లు పింకేశ్​కుమార్, రోహిత్​సింగ్ తో కలిసి ప్రజల వద్ద నుంచి 58 దరఖాస్తులు స్వీకరించారు. అనంతరం కలెక్టర్​అధికారులతో రివ్యూ నిర్వహించారు. ఈ నెల 9 నుంచి 11 వరకు జిల్లాలోని మూడు నియోజకవర్గాలలో మహిళా సమాఖ్య సమావేశాలు నిర్వహించాలన్నారు.

 ఇందిరమ్మ ఇండ్ల నిర్మాణాలకు జీపీఎస్​ సిస్థం ద్వారా నేరుగా లబ్ధిదారుడికే ఇసుక అందజేయాలని ఆదేశించారు. స్కూల్​, అంగన్​వాడీ, పీహెచ్​సీల్లో విస్తృతంగా మొక్కలు నాటించాలన్నారు. ఫ్రైడే డ్రైడే కార్యక్రమాలు నిర్వహించి సీజనల్​వ్యాధులను అరికట్టేలా ప్రజలకు విస్తృత అవగాహన కల్పించాలన్నారు. ఆర్డీవో గోపీరాం, డిప్యూటీ కలెక్టర్లు సుహాసిని, హనుమంత్ నాయక్, డీఆర్డీవో వసంత, జిల్లా అధికారులు తదితరులు పాల్గొన్నారు. 

టీబీ రహిత గ్రామ పంచాయతీలుగా ప్రకటించాలి

జనగామ అర్బన్, వెలుగు:  టీబీ రహిత గ్రామ పంచాయతీలుగా ప్రకటించాలని సంబంధిత అధికారులను కలెక్టర్​రిజ్వాన్​ భాషా షేక్ ఆదేశించారు. టీబీ ముక్త్​ భారత్​అభియాన్​తో పాటు ఎన్సీడీ ప్రోగ్రాం అమలు తీరును డీఎంహెచ్​వో డాక్టర్​మల్లిఖార్జున్​రావుతో కలిసి పీహెచ్​సీ, సబ్​సెంటర్లు, డాక్టర్లు, వైద్య సిబ్బందితో సోమవారం కలెక్టరేట్​లో రివ్యూ నిర్వహించారు. జిల్లాను టీబీ రహిత సమాజంగా మార్చేందుకు వైద్యాధికారులు కృషి చేయాలన్నారు. హాస్పిటల్​కు వచ్చే పేషెంట్లను పరిశీలిస్తూ అనుమానితులకు పరీక్షలు నిర్వహించి టీబీ కేసులను గుర్తించాలన్నారు. అవసరమున్న చోట క్యాంపులు నిర్వహించి కేసులు నమోదు చేయాలన్నారు. నిరుపేదలకు కార్పొరేట్​స్థాయిలో వైద్య సదుపాయాలు అందించే బాధ్యత అధికారులపై ఉందన్నారు.

ఇందిరా మహిళా శక్తి విజయోత్సవాలు నిర్వహించాలి

రాష్ట్ర ప్రభుత్వం ప్రతిష్టాత్మకంగా మహిళలతో నిర్వహిస్తున్న ఇందిరా మహిళా శక్తి విజయోత్సవాలను జిల్లాలో ఘనంగా జరగాలని కలెక్టర్​సూచించారు. కలెక్టరేట్​లో ఏర్పాటు చేసిన జిల్లా సమైక్య సమావేశానికి అడిషనల్ కలెక్టర్ పింకేశ్​కుమార్​తో కలిసి హాజరై అధికారులకు దిశానిర్దేశం చేశారు. రాష్ట్ర ప్రభుత్వం కోటి మంది మహిళల్ని కోటీశ్వరులుగా చేయాలన్న సంకల్పంలో భాగంగా స్వయం సహాయక సంఘాల మహిళలు అన్ని అంశాల్లో సాధికారత సాధించేలా ఇందిరా​ మహిళా శక్తి కార్యక్రమాన్ని ప్రారంభించామన్నారు. ఈ నెల 10 నుంచి 16 వరకు జరిగే సంబరాల్లో కళాజాత ద్వారా అవగాహన కార్యక్రమాలు చేపట్టాలన్నారు.