యాదాద్రి, వెలుగు : రైతులు వడ్లను బయట వ్యక్తులకు అమ్మకుండా కొనుగోలు కేంద్రాలకు తేవాలని, మద్దతు ధర పొందాలని కలెక్టర్ హనుమంతు జెండగే కోరారు. జిల్లాలోని వీరవెల్లి, కొరటికల్, ఆత్మకూర్ (ఎం), ఆలేరు వ్యవసాయ మార్కెట్ కమిటీల్లో కొనుగోలు కేంద్రాలను పరిశీలించి రైతులతో మాట్లాడారు. ఈ సందర్భంగా రైతులు పలు సమస్యలను ఆయన దృష్టికి తెచ్చారు. ప్యాడీ క్లీనర్ యంత్రాలు సరిగా అందిస్తలేరని, టార్పాలిన్లు అందడం లేదని తెలిపారు. స్థలం లేక వడ్లను ఆరబెట్టుకోవడంలో ఇబ్బంది కలుగుతోందని చెప్పారు.
ఈ కారణంగా తేమ విషయంలో కొంత ఇబ్బంది కలుగుతోందని వివరించారు. రైతుల సమస్యలు విన్న ఆయన అన్ని సమకూరుస్తామని చెప్పారు. రైతుల ముందే మార్కెట్, అగ్రికల్చర్ ఆఫీసర్లకు ఆదేశించారు. ప్రతి ఒక్కరి నుంచి వడ్లను కొనుగోలు చేస్తామని, ఎలాంటి కంగారు పడవద్దని కలెక్టర్ కోరారు. టార్పాలిన్లు, గన్నీ బ్యాగుల పరిస్థితిని ఎప్పటికప్పుడు పరిశీలించాలని ఆదేశించారు.
అడిషనల్ కలెక్టర్ పీ బెన్ షాలోమ్, ఆర్డీవో అమరేందర్, జిల్లా మార్కెటింగ్ అధికారి సబిత, సివిల్ సప్లయ్ డీఎం.గోపీకృష్ణ, జిల్లా పౌర సరఫరాల అధికారి శ్రీనివాసరెడ్డి, జిల్లా సహకార శాఖ ఇన్చార్జి అధికారి పి.ప్రవీణ్ కుమార్, తహశీలుదార్లు అంజిరెడ్డి, శ్రీనివాసరెడ్డి, వ్యవసాయ శాఖ అసిస్టెంట్ డైరెక్టర్లు, మార్కెట్ కమిటీల సెక్రటరీలు ఉన్నారు.
