యాసంగి ధాన్యం కొనుగోలుకు ములుగు జిల్లాలో 144 సెంటర్లు
మొదటి విడతగా 22 కేంద్రాలను ప్రారంభించిన కలెక్టర్ ఇలా త్రిపాఠి
ఏటూరునాగారం, వెలుగు : యాసంగి వడ్లను చివరి గింజ వరకూ కొనుగోలు చేస్తామని ములుగు కలెక్టర్ ఇలా త్రిపాఠి అన్నారు. ఇందుకోసం జిల్లాలో 144 సెంటర్లను ఏర్పాటు చేయనున్నట్లు తెలిపారు. సోమవారం ఏటూరునాగారం మండల కేంద్రంలోని ఆకులవారి గణపురంలో జీసీసీ ఆధ్వర్యంలో ఏర్పాటు చేసిన ధాన్యం కొనుగోలు కేంద్రాన్ని అడిషనల్ కలెక్టర్ మహేందర్ జీతో కలిసి కలెక్టర్ ప్రారంభించారు.
అనంతరం స్థానిక రైతు వేదికలో జిల్లా పౌరసరఫరాల శాఖ ఆధ్వర్యంలో ధాన్యం కొనుగోలుపై నిర్వాహకులకు ఏర్పాటు చేసిన శిక్షణా తరగతుల కార్యక్రమంలో కలెక్టర్మాట్లాడారు. ములుగు జిల్లా వ్యాప్తంగా రైతుల నుంచి ధాన్యాన్ని సేకరించడానికి 144 కొనుగోలు కేంద్రాలను ఏర్పాటు చేస్తుండగా, మొదటి విడతలో భాగంగా సోమవారం ములుగు మండలంలో 3, వెంకటాపూర్ 3, గోవిందరావుపేట 3, తాడ్వాయి 3, ఏటూరునాగారం 3, మంగపేట 2, వెంకటాపురం 2 , కన్నాయిగూడెం 1, వాజేడు ఒక కేంద్రాన్ని అందుబాటులోకి తెచ్చామన్నారు. ఏప్రిల్ రెండో వారంలో మరో 73, మూడో వారంలో మిగితా 49 కేంద్రాలను ప్రారంభిస్తామని కలెక్టర్ తెలిపారు.
గ్రేడ్ ఏ రకం ధాన్యానికి రూ.2,203, సాధారణానికి రూ.2,183 మద్దతు ధరతో ప్రభుత్వం రైతుల నుంచి ధాన్యం కొనుగోలు చేస్తుందన్నారు. ఇతర రాష్ర్టాల్లో పండించిన ధాన్యం మన జిల్లాలోకి రాకుండా తెలంగాణ, ఛత్తీస్గడ్ సరిహద్దులో వాజేడు మండలం పేరూరులో చెక్ పోస్ట్ ఏర్పాటు చేశామని తెలిపారు. కార్యక్రమంలో జిల్లా సివిల్ సప్లై మేనేజర్ రాంపతి, డీఏవో విజయ్ చంద్ర, డీసీవో సర్దార్ సింగ్, గిరిజన సహకార సంస్థ మేనేజర్ దేవా, తహసీల్దార్జగదీశ్వర్ తదితరులు పాల్గొన్నారు.
