నిజామాబాద్, వెలుగు : గ్రామ పంచాయతీ ఎలక్షన్లో ఏకగ్రీవాలు చాలా క్లియర్గా ఉండాలని, బెదిరింపులు, ఒత్తిడి, ప్రలోభాలకు దిగితే చర్యలు తీసుకుంటామని కలెక్టర్ వినయ్కృష్ణారెడ్డి తెలిపారు. శనివారం ఆర్వోలతో నిర్వహించిన మీటింగ్లో మాట్లాడారు. ఏకగ్రీవాలు జరిగిన చోట తమను ఎవరూ ఒత్తిడి చేయలేదని పోటీ నుంచి తప్పుకున్న వారి నుంచి డిక్లరేషన్ తీసుకుంటామన్నారు. తాను ఎవరినీ బెదిరించడంగానీ, ప్రలోభపెట్టడం గానీ చేయలేదని ఏకగ్రీవమైన అభ్యర్థి నుంచి నుంచి లెటర్ తీసుకుంటామన్నారు.
ఇందుకోసం ఏర్పాటు చేసిన మానిటరింగ్ కమిటీ క్షుణ్ణంగా పరిశీలించి నో అబ్జెక్షన్ చెప్పాకే అఫీషియల్ రిజల్ట్ ప్రకటిస్తామన్నారు. నియమావళికి విరుద్ధంగా ఏకగ్రీవం జరిగినట్లు తెలితే సీఈసీ ఎన్నికను రద్దు చేసే అవకాశం ఉందన్నారు. నామినేషన్ పేపర్స్ స్కాన్ చేసి ఆన్లైన్లో అప్లోడ్ చేయాలని, విత్డ్రా టైంలో చాలా జాగ్రత్తగా ఉండాలన్నారు. చివరగా బ్యాలెట్ పేపర్పై నోటా సింబల్ కూడా ప్రింట్ చేయించాలని సూచించారు. పంచాయతీ ఎన్నికల నేపథ్యంలో సోమవారం ప్రజావాణి రద్దు చేసినట్లు ప్రకటించారు.
