- తన పాన్ కార్డ్ మిస్యూజ్ అయిందని యువకుడి ఫిర్యాదు
- దాంతో కంపెనీ రిజిస్టర్.. ఖాతా ఓపెన్.. కోట్లలో లావాదేవీలు
గ్వాలియర్ (మధ్యప్రదేశ్): మధ్యప్రదేశ్‌‌‌‌లోని గ్వాలియర్ జిల్లాలో ఓ కాలేజీ స్టూడెంట్ పేరిట ఉన్న అకౌంట్ లో రూ.46 కోట్ల లావాదేవీలు జరిగాయి. ఈ లావాదేవీలకు సంబంధించి అతనికి ఇన్కం ట్యాక్స్, జీఎస్టీ నుంచి ఆ మొత్తానికి ట్యాక్స్ నోటీసు వచ్చింది. దీంతో కంగుతిన్న అతను తన పాన్ కార్డును ఎవరో మిస్యూజ్ చేశారని శుక్రవారం పోలీసులకు ఫిర్యాదు చేశారు. 25 ఏండ్ల ప్రమోద్ కుమార్ కాలేజీ స్టూడెంట్.. ఇన్కం ట్యాక్స్, జీఎస్టీ నుంచి అతని పాన్ కార్డ్ ద్వారా ఒక కంపెనీ రిజిస్టర్ అయిందని, ఖాతా నుంచి రూ.46 కోట్ల లావాదేవీలు జరిగాయాని.. దానికి సంబంధించిన ట్యాక్స్ కట్టాలంటూ నోటీసులు వచ్చాయి. 2021లో ముంబై, ఢిల్లీలో ఆ కంపెనీ కార్యకలాపాలు నిర్వహించినట్లు నోటీసుల్లో పేర్కొన్నాయి. ‘‘నేను గ్వాలియర్‌‌లో కాలేజీ స్టూడెంట్ను. ఆదాయపు పన్ను, జీఎస్టీ నుంచి నోటీసు వచ్చింది. నా పాన్ కార్డు ద్వారా ఒక కంపెనీ రిజిస్టర్ అయి.. 2021లో ముంబై, ఢిల్లీలో నిర్వహించినట్టు తెలిసింది. ఇదంతా ఎట్ల జరిగిందో నాకు తెలియదు. నా పాన్ కార్డ్ మిస్ యూజ్ అయింది” అని అన్నారు. ఇన్కం ట్యాక్స్ వారి నుంచి నోటీసు అందగానే సంబంధిత ఆఫీసర్లతో మాట్లాడినట్లు కుమార్ తెలిపారు. ఆ తర్వాత పలుసార్లు పోలీసులకు ఫిర్యాదు చేసేందుకు ప్రయత్నించినా ఎలాంటి చర్యలు తీసుకోలేదన్నారు. శుక్రవారం ఏఎస్పీ ఆఫీసుకు వెళ్లి మరోసారి కంప్లైంట్చేసినట్లు చెప్పారు. ఏఎస్పీ షియాజ్ కేఎం మీడియాతో మాట్లాడుతూ.. తన పాన్ కార్డును మిస్యూజ్ చేసి, దాని ద్వారా ఒక కంపెనీని రిజిస్టర్ చేసి, ఈ లావాదేవీలు జరిపినట్టు ఒక యువకుడి నుంచి ఫిర్యాదు వచ్చిందన్నారు. ఆ బ్యాంకు ఖాతా ద్వారా రూ.46 కోట్లకు పైగా లావాదేవీలు జరిగినట్లు తెలిపారు. దీనికి సంబంధించిన డాక్యుమెంట్లను తనిఖీ చేస్తున్నామని చెప్పారు.
