హైదరాబాద్, వెలుగు: ట్రిపుల్ ఆర్ సౌత్ పార్ట్ అలైన్ మెంట్ ఖరారు చేసేందుకు ప్రభుత్వం నియమించిన అధికారుల కమిటీ సెక్రటేరియెట్లో తొలిసారి సమావేశమైంది. ఆర్ అండ్ బీ స్పెషల్ సీఎస్ వికాస్ రాజ్ అధ్యక్షతన జరిగిన ఈ భేటీలో రెవెన్యూ ప్రిన్సిపల్ సెక్రటరీ నవీన్ మిట్టల్, ప్రభుత్వ సలహాదారు శ్రీనివాస రాజు, ఉమ్మడి మెదక్, రంగారెడ్డి, మహబూబ్ నగర్, నల్గొండ జిల్లాల కలెక్టర్లు, అడిషనల్ కలెక్టర్లు హాజరయ్యారు.
అలైన్మెంట్ ఖరారులో పలు సమస్యలు వస్తున్నందున వాటి పరిష్కారానికి ప్రభుత్వం ఈ కమిటీ ఏర్పాటు చేసింది. సంగారెడ్డి నుంచి మొదలై శంకర్పల్లి, చేవెళ్ల, ఆమన్గల్, కందుకూరు, షాద్నగర్, ఇబ్రహీంపట్నం మీదుగా చౌటుప్పల్ వరకు మొత్తం 182 కిలో మీటర్లలో నిర్మాణం కానున్నది. సాగేతర భూముల మీదుగా సౌత్ పార్ట్ అలైన్మెంట్ ఖరారు చేయాలని అధికారులకు సీఎం రేవంత్ రెడ్డి ఆదేశించారు. అయితే, గతంలో అనుకున్న రూట్లో కాకుండా వేరే రూట్ ఖరారు కానున్నట్లు తెలుస్తున్నది.
భూ సేకరణకు సంబంధించి పలు ప్రాంతాల్లో రైతుల నుంచి వ్యతిరేకత వస్తున్నది. ఈ నేపథ్యంలో వారి అభ్యంతరాలను కలెక్టర్లు తెలుసుకుని అధికారుల కమిటీకి అందజేయాలని ప్రభుత్వం ఆదేశించింది. ఇప్పటి దాకా వచ్చిన అభ్యంతరాలను కలెక్టర్లు, స్పెషల్ సీఎస్ దృష్టికి తీసుకెళ్లినట్లు తెలుస్తున్నది.
