ఉద్యోగులకు చెన్నై ఐటీ కంపెనీల ఆర్డర్
12 కంపెనీల్లోని 5 వేల మందికి ఆదేశాలు
ఇంటి దగ్గర్నుంచే పనిచేస్తే ఎంత బాగుంటుంది? బయటకు అనకపోయినా చాలా మంది ఉద్యోగులు మనసులో అనుకునే మాట మాత్రం ఇదే. ఇప్పుడు కొన్ని ఐటీ కంపెనీలు, కొందరికి ఆ చాన్స్ కూడా ఇస్తున్నాయి. ఇప్పుడు చెన్నైలోని చాలా ఐటీ కంపెనీలూ ఉద్యోగులకు ఈ బంపర్ ఆఫర్ ఇచ్చాయి. కారణం.. నీళ్లు! అదెలా కారణమంటారా.. కరువు అట్లుంది మరి. ఎండాకాలంలో నీళ్లు దొరకడం గగనమైపోతోంది. చాలా ఐటీ కంపెనీలకు నీళ్లు రావట్లేదు. దీంతో‘‘బాబ్బాబూ.. ఆఫీసులో నీళ్లు రావట్లేదు. ఇంటి దగ్గర్నుంచే పని చేసి పెట్టండి” అంటూ ఉద్యోగులను కంపెనీలు కోరాయి. ఓల్డ్ మహాబలిపురం రోడ్ (ఓఎంఆర్)లోని 12 కంపెనీలు దాదాపు 5 వేల మంది ఉద్యోగులకు ఈ ఆర్డర్లు వేశాయని ఆయా కంపెనీలకు చెందిన ఉద్యోగులు చెబుతున్నారు.
‘‘నాలుగేళ్ల క్రితం కూడా ఇలాగే జరిగింది. అయితే, ప్రైవేట్ ట్యాంకర్లు నీళ్లు సప్లై చేయకుండా ధర్నాకు దిగడంతో ఈ పరిస్థితి ఏర్పడింది. మళ్లీ ఇప్పుడు నీటి సమస్యతో ఉద్యోగులను ఇంటి దగ్గర్నే పనిచేయాల్సిందిగా కంపెనీలు ఆదేశించాయి” అని ఓ వ్యక్తి చెప్పారు. ఓఎంఆర్లో దాదాపు 600 ఐటీ, ఐటీఈఎస్ కంపెనీలున్నాయి. నీటిని పొదుపుగా వాడేందుకు కొన్ని కంపెనీలు ఉద్యోగులకు నిబంధనలు పెట్టాయి. ఉదాహరణకు షోలింగనల్లూర్లోని ఫోర్డ్ బిజినెస్ సర్వీసెస్.. ఉద్యోగులే తాగునీరు తెచ్చుకునేలా నిబంధన పెట్టింది. అలాగే చాలా కంపెనీలూ చేస్తున్నాయి. చాలా కంపెనీలు 55 శాతం నీటి అవసరాలను ట్రీట్ చేసిన నీటితోనే తీర్చుకుంటున్నాయని గ్రీన్విరాన్మెంట్ అనే నీటి నిర్వహణ కంపెనీ సీఈవో, కోఫౌండ్ వరుణ్ శ్రీధరన్ చెప్పారు.
ప్రస్తుతం నగరంలో మురుగు నీటి శుద్ధిపై బాగా దృష్టి పెట్టారన్నారు. నీళ్లు లేక అతి కష్టమ్మీద పనిచేస్తున్నామని ఓ ఐటీ కంపెనీ అడ్మిన్ మేనేజర్ చెప్పారు. ఇంకా ఎంత కాలం ఈ కష్టాలుంటాయోనని ఆవేదన చెందారు. ఆస్తి పన్నుల్లో 30 శాతం నీళ్లు, మురుగు శుద్ధి కోసమే చెల్లిస్తున్నా ఫలితం రావట్లేదన్నారు. ప్రతి వేసవిలో ఓఎంఆర్కు రోజూ 3.2 కోట్ల లీటర్ల నీళ్లు అవసరమవుతాయి. అందులోనూ 60 శాతం నీళ్లు ఐటీ కంపెనీలే వాడుకుంటాయి. ఇప్పుడు నీటి కరువు రావడంతో చెన్నై అధికారులకు నీళ్లు వచ్చేలా చూడాల్సిందిగా విన్నపం పెట్టుకున్నారు. కానీ, వాళ్లూ చేతులెత్తేశారు. సిప్కాట్ ఐటీ పార్క్లో 46 కంపెనీలున్నాయి. వాటికి రోజూ 20 లక్షల లీటర్ల నీళ్లు అవసరం. ఆ అవసరాలు తీర్చుకునేందుకు 17 బావులను ఏర్పాటు చేశారు. ఇప్పుడు వాటి నుంచీ 10 లక్షల లీటర్లకు మించి రావడం లేదు.
