భూ నిర్వాసితులపై మంత్రి ఇంద్రకరణ్రెడ్డి వ్యాఖ్యలు
నిర్మల్‍, వెలుగు: నష్ట పరిహారం డబ్బులు ఇస్తే రైతులు ఖర్చు చేస్తారంటూ రాష్ట్ర దేవాదాయ, అటవీశాఖ మంత్రి ఇంద్రకరణ్రెడ్డి అన్నారు. మంగళవారం సీఎం కార్యదర్శి స్మితసబర్వాల్‍తో కలిసి మామడ మండలం పోన్కల్‍ వద్ద నిర్మిస్తున్న సదర్మట్బ్యారేజీని సందర్శించారు. ఈ సందర్భంగా భూ నిర్వాసితులు అక్కడకు రావడంతో మంత్రి వారితో మాట్లాడారు. విలువైన భూములు కోల్పోయామని, పైగా పరిహారానికి దూరమవుతున్నామని రైతులు కన్నీటి పర్యంతమయ్యారు. నష్ట పరిహారం చెల్లిస్తే అప్పులు తీర్చుకునేవారిమని వాపోయారు. దాంతో ఇంద్రకరణ్రెడ్డి ప్రభుత్వం దగ్గర డబ్బులు ఉన్నాయని, ఇంతకుముందే ఇచ్చి ఉంటే ఈపాటికి ఖర్చయిపోయేవని, అందుకే ఇవ్వలేదని అన్నారు. త్వరలో ఇస్తామని చెప్పారు.
ముఖ్యమంత్రి కార్యాలయ కార్యదర్శి వస్తే కాస్తయిన న్యాయం జరుగుతుందేమోనన్న ఆశతో వచ్చామని, కానీ ఏం చెప్పకుండానే వెళ్లిపోయారని ఈ సందర్భంగా పలువురు రైతులు ఆవేదన వ్యక్తం చేశారు. మా భూమి పైసలు మాకే ఇవ్వడం లేదని మహిళ రైతులు కన్నీళ్లు పెట్టుకున్నారు. ఇంట్లో పిల్లల పెళ్లిళ్లు చేయలేకపోతున్నామని కొందరంటే.. అప్పుల చేసినవారు ఇండ్లమీదకొస్తున్నారంటూ మరికొంత మంది రైతులు వారి బాధను వెళ్లగక్కారు.
