- కాంగ్రెస్ ఎమ్మెల్సీ అద్దంకి దయాకర్
హైదరాబాద్, వెలుగు: తెలంగాణోద్యమంలో అమరులైన 1,200 మంది త్యాగాల కంటే కేసీఆర్ దీక్ష ఎక్కువనా అని కాంగ్రెస్ ఎమ్మెల్సీ అద్దంకి దయాకర్ ప్రశ్నించారు. శనివారం సీఎల్పీలో ఆయన మీడియాతో మాట్లాడారు. అమరులైన శ్రీకాంతా చారి, యాదయ్య, ఇషాన్ రెడ్డి, కానిస్టేబుల్ కిష్టయ్య త్యాగాల కన్నా కేసీఆర్ దీక్ష ఎలా ఎక్కువని ఫైర్ అయ్యారు. కేసీఆర్ దీక్ష వల్లే తెలంగాణ వచ్చిందని బీఆర్ఎస్ నేతలు చెప్పుకుంటున్నారని, అసలు కేసీఆర్ దీక్ష ఎలా చేశారు, ఎలాంటి ఫ్లూయిడ్స్ తీసుకున్నారో అందరికి తెలుసని తెలిపారు.
కేసీఆర్ దీక్ష గురించి పీసీసీ అధ్యక్షుడు మహేశ్ గౌడ్ మాట్లాడితే కేటీఆర్ ఎగిరెగిరి పడుతున్నారని, సాగరహారం రోజున కేసీఆర్, కేటీఆర్ ఎక్కడున్నారని అద్దంకి ప్రశ్నించారు. మిలియన్ మార్చ్ ను కూడా కేసీఆర్ వ్యతిరేకించారని, తల్లి కడుపున పుట్టి, ఆ తల్లి కడుపునే కాల్చే ప్రయత్నం కేసీఆర్ చేశారని మండిపడ్డారు. సోనియా గాంధీ వల్లనే తెలంగాణ వచ్చిందని కేసీఆర్ చెప్పిన మాటలను అద్దంకి గుర్తు చేశారు.
