- రైస్ మిల్లర్ల దోపిడీకి మంత్రి కొప్పుల బాసట వేసిండు
- దోచుకున్న‌ది ఇప్పిస్తే పాలాభిషేకం చేస్తా
- రైతుబంధుపై శ్వేతపత్రం విడుదల చేయాలి:ఎమ్మెల్సీ జీవన్ రెడ్డి
జగిత్యాల : తరుగు పేరిట రైతుల నుండి 40 కిలోల బ్యాగుకు రెండు కిలోల చొప్పున తరుగు తీయాలంటూ మంత్రి కొప్పుల ఈశ్వర్ ఆదేశాలివ్వడం దారుణం అని ఎమ్మెల్సీ జీవన్ రెడ్డి అన్నారు. ఆదివారం తన నివాసంలో ఏర్పాటు చేసిన సమావేశంలో ఎమ్మెల్సీ జీవన్ రెడ్డి మాట్లాడుతూ… రైతు సంక్షేమ ప్రభుత్వం అని చెప్పుకునే మంత్రి కొప్పుల ఈశ్వర్ రైతుల నుంచి కొనుగోలు చేసే వరి ధాన్యం లో తరుగు తీయలంటూ టెలీ కాన్ఫరెన్స్ లో అధికారులకు, ప్రజాప్రతినిధులకు ఆదేశాలు ఇచ్చిన ఆడియోను మీడియా సమావేశంలో బయట పెట్టారు. కొనుగోలు కేంద్రాల ద్వారా నాలుగున్నర లక్షల మెట్రిక్ టన్నుల వరి ధాన్యాన్ని కొనుగోలు చేయగా అదనంగా తూకం పేరిట రెండు లక్షల 25 వేల క్వింటాళ్లు సేకరించారని దీని విలువ సుమారు 40 కోట్లు ఉంటుందన్నారు. ఈ నలభై కోట్లు ఎవరి జేబుల్లోకి పోయాయో మంత్రి చెప్పాలని డిమాండ్ చేశారు.
ఓ వైపు రైతులను ఇబ్బంది పెట్టిన రైస్ మిల్ ను బ్లాక్ లిస్టులో పెట్టాలని బయట కార్యక్రమాలల్లో చెబుతున్న ఈశ్వర్.. లోలోపట అధికారులకు కోత విధించాలంటూ ఆదేశాలివ్వడం ఏంటని జీవన్ రెడ్డి ప్ర‌శ్నించారు. మంత్రికి రైతులపై చిత్తశుద్ధి ఉంటే ధర్మ కాంటా రసీదును ఇప్పించాలని డిమాండ్ చేశారు. దాన్యం కొనుగోలు వ్యత్యాసాన్ని గుర్తించి ఆ నష్టాన్ని రైతులకు చెల్లిస్తే మంత్రి ఈశ్వర్ కు పాలాభిషేకం చేస్తాం అన్నారు. రైతుల కష్టాలు కి పూర్తి బాధ్యత జిల్లా మంత్రి ఈశ్వర్ దే అన్నారు. ఐదెకరాల భూమి ఉన్న రైతులకు ఎంతమందికి రైతుబంధు చెల్లించారని శ్వేత పత్రం విడుదల చేయాలని అన్నారు. రుణమాఫీ విడతలవారీగా చేయాలని ప్రభుత్వానికి సూచించారు.
వరద కాలువకు కాకతీయ కాలువ లింకు చేస్తే.. ఎస్ ఆర్ ఎస్ పి కి 25 టీఎంసీలు నీరు చేరుతుందని దీని ద్వారా పెద్దపల్లి జగిత్యాల జిల్లాలో రెండున్నర లక్షల ఎకరాలు సాగవుతుందని ఎమ్మెల్సీ జీవన్ రెడ్డి అన్నారు. దీని కోసం రూ.8 కోట్లు అడిగితే నాలుగు కోట్లు మాత్రమే విడుదల చేశారన్నారు. తెలంగాణలో సూక్ష్మ బిందుసేద్యం కనుమరుగైందని, పండ్లతోటల పెంపకానికి సలహాలు, సూచనలు ఇచ్చే ఉద్యానవన శాఖ ఉద్యోగులను తొలగించడంతో పండ్ల తోటల సాగు ప్రశ్నార్థకంగా మారిందని అన్నారు. ప్రతిపక్షాలు సూచనలు చేస్తే రాజకీయ ఆరోపణగా పరిగణించకుండా వాస్తవాలను గ్రహించి పరిశీలించాలని మంత్రులకు సూచించారు.
