కోరలు మార్చిన కరోనా.. రెండు మ్యుటేషన్లతో ఆగమాగం చేస్తున్న కొత్తరకం వైరస్

కణాలకు సులువుగా అంటుకునేలా స్పైక్స్ ప్రొటీన్స్ లో మార్పులు ఇమ్యున్ సిస్టమ్ కు దొరక్కుండా ఓ ప్రొటీన్‌​ మాయం శరవేగంగా ఒకరి నుంచి మరొకరికి వ్యాప్తి ప్రస్తుతమున్న వ్యాక్సిన్లు దానిపై పనిచేస్తాయంటున్న సైంటిస్టులు మరిన్ని మ్యుటేషన్లు జరిగితే మాత్రం కంట్రోల్ తప్పినట్టే లండన్: దక్షిణ ఇంగ్లండ్​ ప్రాంతంలో కరోనా వైరస్​ వేగంగా విస్తరిస్తుండటంతో అక్కడి సైంటిస్టులు స్టడీ చేసి కొత్త రకం కరోనా వైరస్​ను గుర్తించారు. శాంపిల్స్​పై సెప్టెంబర్​ నుంచి రీసెర్చ్​ చేసి.. ఈ రకం వైరస్​ 70 శాతం వేగంగా అంటుకుంటోందని తేల్చారు. బ్రిటన్​లో నమోదవుతున్న కొత్త కేసుల్లో చాలావరకు కొత్త రకం వైరస్​ సోకినవేనని నిర్ధారించారు. దీనిపై వరల్డ్​ హెల్త్​ ఆర్గనైజేషన్ (డబ్ల్యూహెచ్‌వో)​కు బ్రిటన్​ సమాచారం ఇచ్చింది. డబ్ల్యూహెచ్‌వో కూడా ప్రపంచ దేశాలను అలర్ట్​ చేయడంతో అంతటా కలకలం చెలరేగింది. కొన్ని యూరోపియన్​ కంట్రీస్​ ఇప్పటికే బ్రిటన్​ నుంచి రాకపోకలు బంద్​ పెట్టాయి. చాలా దేశాలు కూడా అదేదారిపట్టాయి. మరోవైపు కొన్ని ఇతర దేశాల్లోనూ కొత్త రకం వైరస్​ కేసులు బయటపడటం ఆందోళన రేపుతోంది. కొత్త వైరస్​పై ఇంటర్నెట్​లో విపరీతంగా సెర్చింగ్​ జరుగుతోందని గూగుల్​ కూడా ప్రకటించింది. అసలు ఈ కొత్త రకం ఏంటి, దాని ఎఫెక్ట్​ ఎలా ఉంటుందన్న దానిపై ఇంకా ఎలాంటి స్పష్టత లేదు. అయితే ఇప్పటివరకు అందుబాటులో ఉన్న డేటా ఆధారంగా సైంటిస్టులు కొన్ని అంచనాలు వేశారు. ఈ మూడు కారణాలతో.. సాధారణంగా చాలా వరకు వైరస్​లు పరిస్థితులను తట్టుకునేందుకు మార్పు (మ్యుటేషన్) చెందుతూ ఉంటాయి. అయితే వాటి జన్యు క్రమం, బేసిక్​ లక్షణాల్లో మాత్రం పెద్దగా తేడా ఉండదు. కొన్ని రకాలు కొంత బలంగా, మరికొన్ని బలహీనంగా మారుతుంటాయి. కరోనా వైరస్​ కూడా ఇప్పటివరకు ఇలా వందల రకాలుగా మ్యుటేషన్​ చెందినట్టు సైంటిస్టులు గుర్తించారు. కొన్నిసార్లు మాత్రం వైరస్ లలో మార్పు ఎక్కువగా వస్తుంది. దీనివల్ల ఆ వైరస్​ను అడ్డుకొనేందుకు, చంపేసేందుకు రూపొందించే మందులు, వ్యాక్సిన్లు సరిగా పనిచేయని పరిస్థితి వస్తుంది. ప్రస్తుతం బ్రిటన్​లో గుర్తించిన కొత్త రకం కూడా ఎక్కువగా మ్యుటేషన్లకు గురైనట్టుగా సైంటిస్టులు భావిస్తున్నారు. ప్రధానంగా మూడు కారణాల వల్ల కొత్త వైరస్ పై తీవ్ర ఆందోళన వ్యక్తమవుతోంది. ఇప్పటికే ఉన్న కరోనా వైరస్​ రకాలను మించి.. కొత్త రకం విపరీతంగా వ్యాపిస్తోంది. బ్రిటన్​లో ఈ కొత్త రకాన్ని గుర్తించినప్పుడు కొందరికి అది పరిమితమైనా.. ఇప్పుడు నమోదవుతున్న కొత్త కేసుల్లో చాలా మందిలో ఈ రకం వైరస్​ ఉంటోంది. కొత్త రకం వైరస్​లో మ్యుటేషన్లు దానికి చాలా ముఖ్యమైన ‘స్పైక్స్​(కొమ్ములు)’లో వచ్చాయి. కరోనా వైరస్​ ఈ స్పైక్స్​ ఆధారంగానే మన శరీరంలోని కణాలకు అంటుకుని విస్తరిస్తుంది. ఈ స్పైక్స్​ను బలహీనం చేసే దిశగానే చాలా వరకు వ్యాక్సిన్లను డెవలప్​ చేస్తున్నారు. కొత్త రకం వైరస్​లో వచ్చిన మ్యుటేషన్లపై ల్యాబ్​లో రీసెర్చ్​ చేసినప్పుడు.. ఈ వైరస్​ శరీరంలోని కణాలకు అతుక్కునే కెపాసిటీ బాగా పెరిగిందని గుర్తించారు. అయితే ఈ కొత్త రకం వైరస్​కు సంబంధించి ఇంకా స్పష్టత రాలేదని.. మరింతగా రీసెర్చ్​ చేసి, ఎఫెక్ట్స్​ ఎలా ఉంటాయో తేల్చాల్సి ఉందని కొవిడ్​ జినోమిక్స్​ యూకే కన్సార్షియం సైంటిస్ట్​ నిక్​ లోమన్​ చెప్పారు. ఈ రీసెర్చ్​కు చాలా టైం పడుతుందని.. వైరస్​ విపరీతంగా వ్యాపిస్తున్న ఈ టైంలో నెలల పాటు వెయిట్​ చెయ్యలేమని పేర్కొన్నారు. ఇంతకుముందు రెండు సార్లు ఇట్లనే.. ఇప్పుడు బ్రిటన్​లో జరిగిన మ్యుటేషన్​ తరహాలోనే ఇంతకుముందు కూడా కరోనా వైరస్​లో మార్పులు జరిగి కొత్త రకాలు ఏర్పడ్డాయి. అసలు చైనాలోని వుహాన్​లో మొదటిసారిగా గుర్తించిన కరోనా వైరస్​కు.. ప్రస్తుతం ప్రపంచవ్యాప్తంగా విస్తరించిన వైరస్​లకు చాలా తేడా ఉంటుంది. చైనా నుంచి యూరప్​ దేశాలకు వ్యాపించిన కరోనా వైరస్.. ఈ ఏడాది ఫిబ్రవరి నెలలో మ్యుటేట్అయింది. అంతకుముందటి రకంతో పోలిస్తే వేగంగా విస్తరించే కెపాసిటీ ఉన్న ఆ రకానికి ‘డీ614జీ’గా పేరు పెట్టారు. ఇది యూరప్​ నుంచి ప్రపంచ దేశాలన్నింటికీ పాకింది. మార్చి, ఏప్రిల్​ నెలల్లో స్పెయిన్​లో మరో రకం అత్యంత వేగంగా వ్యాపించింది. ‘ఏ222వీ’గా పేరు పెట్టిన ఈ వైరస్.. యూరప్​ అంతటా విస్తరించింది. అయితే అప్పటికే విమానాల నిలిపివేత, లాక్​డౌన్లు మొదలవడంతో.. దూర దేశాలకు వ్యాపించలేదు. ఎంత వేగంగా వ్యాపిస్తోంది? బ్రిటన్​లో కొత్త రకం కరోనా వైరస్​తొలి కేసును సెప్టెంబర్​లో గుర్తించారు. తర్వాత ఈ కేసుల సంఖ్య పెరిగింది. నవంబర్​లో లండన్​లో నమోదైన మొత్తం కరోనా కేసుల్లో పావు వంతు కొత్త రకానివే ఉండగా.. ఈ నెల మొదట్లో సగానికిపైగా, ఇప్పుడు 80 శాతం కేసులు కొత్త రకానివే ఉంటున్నట్టు సైంటిస్టులు గుర్తించారు. అంటే కొత్త రకం వైరస్​ విస్తరణ చాలా వేగంగా ఉంటోంది. ఆదివారం బ్రిటన్​ ప్రధాని బోరిస్​ జాన్సన్​ కూడా కొత్త వైరస్.. 70 శాతం ఎక్కువ వేగంగా వ్యాపిస్తోందని ప్రకటించారు. మిగతా కరోనా వైరస్​ రకాలన్నింటికన్నా కొత్త రకం ఎక్కువ స్పీడ్​గా విస్తరిస్తోందని చెప్పారు. ఇది ప్రమాదకరమా? కొత్త రకం వైరస్​ అత్యంత వేగంగా వ్యాపిస్తోందేగానీ.. దానివల్ల ప్రమాదం ఎక్కువగా ఉన్నట్టు ఆధారాలేమీ లేవని సైంటిస్టులు, డాక్టర్లు చెప్తున్నారు. డెత్​రేటు కూడా ఏమీ పెరగలేదని అంటున్నారు. అయితే వేగంగా, ఎక్కువ మందికి వైరస్​ సోకడంతో హాస్పిటళ్లు నిండిపోతాయని.. అవసరమైన వారికి ట్రీట్​మెంట్​ అందక సమస్యలు తలెత్తుతాయని, డెత్స్​ పెరిగే ప్రమాదం ఉందని స్పష్టం చేస్తున్నారు. ఎక్కడెక్కిడికి చేరింది? బ్రిటన్​లో కొత్త రకం వైరస్​ను గుర్తించినా.. అది బ్రిటన్​లోనే మ్యుటేట్​ అయిన వైరసా, లేక కరోనా రకాలను గుర్తించలేని ఏదైనా వేరే దేశం నుంచి వచ్చిందా అన్నది తేల్చాల్సి ఉందని సైంటిస్టులు చెప్తున్నారు. మొదట్లో బ్రిటన్​ దక్షిణ ప్రాంతంలో కొత్త రకం కేసును గుర్తించారు. తర్వాత ఒక్క ఐర్లాండ్​ ఏరియా తప్ప ఆ దేశమంతటా వ్యాపించింది. ఇక ప్రపంచవ్యాప్తంగా వైరస్​ల జెనెటిక్​ కోడ్స్​ను మానిటర్​ చేసే ‘నెక్ట్స్​ స్ట్రెయిన్’ సంస్థ.. ఈ కొత్త రకం వేరే దేశాలకు వెళ్లిందా, లేదా అన్న దానిపై స్టడీ చేసింది. డెన్మార్క్, ఆస్ట్రేలియా, నెదర్లాండ్స్, ఇటలీ దేశాల్లో ఈ కొత్త రకం వైరస్​ కేసులు నమోదైనట్టు తేల్చింది. బ్రిటన్​లో వచ్చిన కొత్త రకం కరోనా తరహాలోనే.. సౌతాఫ్రికాలో కూడా మరో కొత్త రకం వైరస్​ను గుర్తించారు. ఈ రెండు కొత్త వైరస్​లలో జరిగిన మ్యుటేషన్లు చాలా వరకు ఒకేలా ఉన్నా.. ఈ రెండూ వేరేనని తేల్చారు. చాలా దేశాలకు వైరస్​ జెనెటిక్స్​ కోడ్స్​ను, మ్యుటేషన్లను గుర్తించే కెపాసిటీ లేనందున.. ఇంకా ఎన్ని దేశాలకు ఈ వైరస్​లు వ్యాపించాయో తెలియాల్సి ఉంది. ఎలా మారి ఉంటది? బ్రిటన్​లో గుర్తించిన కొత్త రకం వైరస్​లో అసాధారణంగా మ్యుటేషన్లు జరిగాయి. ఇమ్యునిటీ అతి తక్కువగా ఉన్న వ్యక్తి శరీరంలో వైరస్​ ఇలా మ్యుటేట్​ అయి ఉంటుందని సైంటిస్టులు భావిస్తున్నారు. అలాంటి వారి శరీరం వైరస్​తో పోరాడ లేదని.. అది వైరస్​ మ్యుటేషన్లకు గ్రౌండ్​గా మారిపోతుందని అంటున్నారు. ‘ఇప్పుడొచ్చిన వ్యాక్సిన్లు పనిచేస్తయా? కరోనా వ్యాక్సిన్లు ప్రస్తుతానికి కొత్త రకం వైరస్​ నుంచి కూడా రక్షణ కల్పించగలవని సైంటిస్టులు చెప్తున్నారు. ఇప్పుడొస్తున్న చాలా వ్యాక్సిన్లు.. వైరస్​పై ఉండే స్పైక్స్​తోపాటు ఇతర భాగాలను కూడా టార్గెట్​ చేసేలా మన శరీరంలోని ఇమ్యున్​ సిస్టమ్​ను ప్రేరేపిస్తాయని కేంబ్రిడ్జ్​ యూనివర్సిటీ ప్రొఫెసర్​ రవి గుప్తా తెలిపారు. ‘‘స్పైక్స్​లో మ్యుటేషన్లు వచ్చినా కూడా ఇమ్యున్​సిస్టమ్​ వైరస్​ను గుర్తించి చంపేస్తుంది. అయితే వైరస్​కు మరిన్ని మ్యుటేషన్లు వస్తే మాత్రం కష్టమే. వ్యాక్సిన్ల నుంచి వైరస్​ తప్పించుకునే చాన్స్​ ఉంది. అలాగైతే మరింతగా ఇన్ఫెక్ట్​ అవుతూనే ఉంటుంది. కరోనా వైరస్​కు ఈ కెపాసిటీ ఉంది. అయితే కరోనా మ్యుటేషన్లకు తగినట్టుగా మనం వ్యాక్సిన్లను కూడా ఈజీగానే మార్చగలం.” అని వివరించారు. కొత్త వైరస్​లో వచ్చిన మ్యుటేషన్​ ఏమిటి? వైరస్​ ఇన్​ఫెక్ట్​ అయ్యేందుకు వాటికి ఉండే ‘స్పైక్స్​(కొమ్ముల వంటి నిర్మాణాలు)’ కీలకం. వైరస్​లు ఆ స్పైక్స్​ తోనే మన శరీరంలోని కణాలకు అతుక్కుని.. కణాల పైపొరకు రంధ్రం చేస్తాయి. తర్వాత వైరస్​ జెనెటిక్​ మెటీరియల్​కణం లోపలికి వెళ్లి ఆక్రమించుకుంటుంది. కణంలోని జెనెటిక్ మెటీరియల్, ఇతర భాగాలను వాడుకుని వేల సంఖ్యలో వైరస్​లు ఉత్పత్తి అవుతాయి. ఇవి మరిన్ని కణాలకు అతుక్కుని.. మరింతగా వైరస్​ పెరిగిపోతుంది. దీంతో వైరస్​ ఇన్ఫెక్ట్​ అయిన ఆర్గాన్స్​ దెబ్బతింటాయి. ఇట్లా వైరస్​ వ్యాప్తికి కీలకమైన స్పైక్స్​లో కీలకమైన రెండు మ్యుటేషన్లు జరిగినట్టు సైంటిస్టులు తేల్చారు. కరోనా వైరస్​ స్పైక్స్ శరీరంలోని కణాలకు మొదట అతుక్కునేందుకు తోడ్పడే ప్రొటీన్​లో మ్యుటేషన్​ వచ్చినట్టు గుర్తించారు. ఈ మ్యుటేషన్​కు ‘ఎన్501వై’ అని పేరు పెట్టారు. ఈ మార్పు వల్ల వైరస్​ మరింత సులువుగా, వేగంగా కణాలకు అతుక్కుంటోందని తేల్చారు. ఇక రెండో మ్యుటేషన్​లో.. వైరస్​ స్పైక్స్​లో ముందు నుంచీ ఉన్న ‘హెచ్69/వీ70’ అనే ప్రొటీన్​ మాయమైందని సైంటిస్టులు గుర్తించారు. దీనివల్ల వైరస్​ వ్యాప్తి రెండింతలు పెరిగినట్టుగా తేలిందని కేంబ్రిడ్జ్​ యూనివర్సిటీ ప్రొఫెసర్​ రవి గుప్తా వెల్లడించారు. ఈ ‘హెచ్69/వీ70’ ప్రొటీన్​ను మన శరీరంలోని ఇమ్యున్​ సిస్టమ్​ గుర్తించి, వైరస్​పై దాడి చేసి చంపేస్తుందని.. ఇప్పుడీ ప్రొటీన్​ లేకపోవడంతో వైరస్​పై ఇమ్యున్​ సిస్టం సమర్థవంతంగా పనిచేయలేదని వివరించారు.