- రూ.14 కోట్లతో జీ + 3 బిల్డింగ్
- రూ.10 కోట్లతో ఎక్విప్మెంట్
మెదక్, వెలుగు: మెదక్ జిల్లా ప్రజలకు మరింత మెరుగైన అత్యవసర వైద్య సేవలు అందుబాటులోకి రానున్నాయి. రోడ్డు ప్రమాదాలు, అగ్ని ప్రమాదాలు, పాము కాటు తదితర అత్యవసర పరిస్థితుల్లో హైదరాబాద్ వెళ్లాల్సిన పనిలేకుండా జిల్లా కేంద్రమైన మెదక్ పట్టణంలో క్రిటికల్ కేర్ విభాగం రెడీ అయ్యింది.
అన్నీ సేవలు అందుబాటులోకి..
మెదక్ పట్టణంలో గతంలో ఉన్న ఏరియా ఆస్పత్రి 2016లో మెదక్ కేంద్రంగా ప్రత్యేక జిల్లా ఏర్పాటయ్యాక జిల్లా ప్రభుత్వాస్పత్రిగా అప్ గ్రేడ్ అయ్యింది. ఆ తర్వాత ఐసీయూ, డయాలసిస్, టీ హబ్, ఆక్సిజన్ ప్లాంట్వంటి వైద్య సేవలు అందుబాటులోకి వచ్చాయి. జిల్లా ప్రభుత్వాస్పత్రికి అనుబంధంగా పట్టణ శివారులో మాతా శిశు సంరక్షణ కేంద్రం(ఎంసీహెచ్) ఏర్పాటైంది. దీంతో జిల్లా ప్రజలకు వైద్య సేవలు మెరుగయ్యాయి. 2024లో మెదక్ లో ప్రభుత్వ మెడికల్ కాలేజీ మంజూరు అయ్యింది. ఆ తర్వాత కొన్నాళ్లకు నర్సింగ్ కాలేజీ కూడా మంజూరైంది.
ఈ క్రమంలో తెలంగాణా వైద్య విధాన పరిషత్(టీవీవీపీ) పరిధిలో ఉన్న జిల్లా ప్రభుత్వాస్పత్రి, ఎంసీహెచ్ డైరెక్టర్ ఆఫ్ మెడికల్ఎడ్యుకేషన్(డీఎంఈ) పరిధిలోకి వెళ్లాయి. జిల్లా ప్రభుత్వాస్పత్రి గవర్నమెంట్జనరల్హాస్పిటల్ (జీజీహెచ్), ఎంసీహెచ్ లు టీచింగ్ హాస్పిటల్లుగా మారగా, వివిధ విభాగాల స్పెషలిస్ట్ డాక్టర్లు అందుబాటులోకి వచ్చారు.
ఇప్పుడు రూ.14 కోట్లతో..
ఇటీవల గవర్నమెంట్ జనరల్ హాస్పిటల్ కు అనుబంధంగా క్రిటికల్ కేర్ విభాగం మంజూరైంది. రూ.14 కోట్లతో పట్టణ శివారు లోని మాతా శిశు సంరక్షణ కేంద్రం పక్కనే జీ + 3 బిల్డింగ్ నిర్మించారు. 108 బెడ్స్ కెపాసిటీతో నిర్మించిన క్రిటికల్ కేర్ హాస్పిటల్ లో ఎమర్జెన్సీ విభాగం, ఐసీయూ, ఆర్థోపెడిక్ వార్డు, ఈఎన్ టీ వార్డు, మానసిక వైద్య చికిత్స వార్డు, పురుషులకు, మహిళలకు వేర్వేరుగా సర్జికల్వార్డుతోపాటు, డయాలసిస్ సెంటర్, ఆపరేషన్ థియేటర్, స్కానింగ్ రూమ్, ఎక్స్ రే రూమ్, ఆర్వో ప్లాంట్ ఏర్పాటు చేశారు.
త్వరలో ప్రారంభం..
క్రిటికల్ కేర్ హాస్పిటల్ లోని ఆయా విభాగాల్లో రూ.10 కోట్లతో ఎక్విప్ మెంట్ సమకూర్చారు. కార్పొరేట్ హాస్పిటల్ తరహాలో ఆయా విభాగాల్లో బెడ్స్, ఆక్సిజన్ సరఫరాకు ఏర్పాట్లు చేశారు. త్వరలో క్రిటికల్ కేర్ హాస్పిటల్ ను ప్రారంభించనున్నారు. ఇది అందుబాటులోకి వస్తే అత్యవసర పరిస్థితుల్లో బాధితులకు మెదక్ లోనే మెరుగైన వైద్యం అందనుంది.
