- మాజీ ఉపరాష్ట్రపతి వెంకయ్యనాయుడు, మంత్రి వివేక్ నివాళులు
- జూబ్లీహిల్స్ మహాప్రస్థానంలోముగిసిన అంత్యక్రియలు
హైదరాబాద్, వెలుగు: దేశ పౌల్ట్రీ రంగ దిగ్గజం, శ్రీనివాస ఫార్మ్స్ గ్రూప్ చైర్మన్ చిట్టూరి జగపతిరావు(92) కన్నుమూశారు. శనివారం హైదరాబాద్లోని తన నివాసంలో ఆయన తుదిశ్వాస విడిచారు. సాయంత్రం జూబ్లీహిల్స్లోని మహాప్రస్థానంలో ఆయన అంత్యక్రియలు ముగిశాయి. సీజే రావుకు ఇద్దరు కూతుళ్లు, ఒక కుమారుడు ఉన్నారు. కుమారుడు సురేశ్ చిట్టూరి తండ్రి నెలకొల్పిన శ్రీనివాస ఫార్మ్స్కు ఎండీగా ఉన్నారు. నేషనల్ ఎగ్ కో ఆర్డినేషన్ కమిటీ(ఎన్ఈసీసీ) వ్యవస్థాపకుడైన సీజే రావు పౌల్ట్రీ రంగంలో విశేష సేవలు అందించారు. ఏపీలోని తూర్పుగోదావరి జిల్లా కుళ్లా గ్రామంలో జన్మించిన ఆయన 6 వేల కోళ్లతో పౌల్ట్రీని ప్రారంభించి అంచెలంచెలుగా ఎదిగారు. దాదాపు142.8 బిలియన్ల గుడ్లను ఉత్పత్తి చేయటంతో పాటు 8 మిలియన్ల మందికి ఉద్యోగ అవకాశాలు కల్పించారు. 2023లో “ఇంటర్నేషనల్ ఎగ్ పర్సన్ ఆఫ్ ది ఇయర్” అవార్డు పొందిన తొలి ఆసియా వ్యక్తిగా సీజే రావు చరిత్రలో నిలిచారు. ఐపీజీఏ లైఫ్ టైమ్ అచీవ్ మెంట్, పౌల్ర్టీ లెజెండ్ వంటి అవార్డులను అందుకున్నారు. ఆయన1965లో ఉప్పల్ లో10 ఎకరాల విస్తీర్ణంలో శ్రీనివాస ఫార్మ్స్ స్టార్ట్ చేశారు. వ్యాపార రంగంలో ఎదుగుతూనే, ఎన్నో సేవా కార్యక్రమాలు కూడా నిర్వహించారు.
దూరదృష్టి ఉన్న వ్యాపారవేత్త: మంత్రి వివేక్
సీజే రావు మృతి పట్ల పలువురు రాజకీయ రంగ ప్రము ఖలు సంతాపం ప్రకటించారు. జూబ్లీహిల్స్లోని సీజే రావు నివాసంలో ఆయన భౌతికకాయానికి మాజీ ఉప రాష్ట్రపతి వెంకయ్యనాయుడు, రాష్ట్ర గనులు, కార్మిక శాఖ మంత్రి వివేక్ వెంకటస్వామి నివాళులు అర్పించారు. ఈ సందర్భంగా మంత్రి వివేక్ మాట్లాడుతూ.. ఎన్నో అడ్డంకులను అధిగమించి పౌల్ట్రీ రంగ అభివృద్ధికి సీజే రావు కృషి చేశారని కొనియాడారు. దూరదృష్టి ఉన్న వ్యాపార వేత్తల్లో ఆయన ఒకరని అన్నారు. ఆయనతో తనకు ఉన్న అనుబంధాన్ని మంత్రి గుర్తు చేసుకున్నారు.
