హైదరాబాద్, వెలుగు: అసెంబ్లీ ఎన్నికల్లో కాంగ్రెస్తోనే కలిసి పోటీ చేయాలని సీపీఐ నిర్ణయం తీసుకున్నట్టు తెలిసింది. ఒక ఎమ్మెల్యే, ఎమ్మెల్సీ సీటు ఇస్తామని కాంగ్రెస్ చేసిన ప్రతిపాదనకు ఆ పార్టీ నేతలు ఓకే చెప్పినట్టు సమాచారం. శుక్రవారం రాత్రి హైదరాబాద్లో పీసీసీ చీఫ్ రేవంత్ రెడ్డిని సీపీఐ నేతలు కె.నారాయణ, చాడ వెంకట్ రెడ్డి, పల్లా వెంకట్ రెడ్డి తదితరులు కలిశారు. ఈ సందర్భంగా పొత్తులపై క్లారిటీ ఇవ్వాలని కోరారు. ఈ క్రమంలో సీపీఐకి ఒక ఎమ్మెల్యే, ఎమ్మెల్సీ సీటు ఇస్తామని రేవంత్ ఆఫర్ చేసినట్టు తెలిసింది.
కొత్తగూడెం సీటు ఇవ్వాలని సీపీఐ నేతలు కోరగా, సానుకూలంగా స్పందించినట్టు సమాచారం. దీనిపై హైకమాండ్తో మాట్లాడి స్పష్టత ఇస్తామని చెప్పినట్టు తెలుస్తోంది. అయితే నల్గొండ జిల్లా కమిటీ ఒత్తిడి మేరకు మునుగోడులో ఫ్రెండ్లీ కాంటెస్ట్పై సీపీఐ ప్రతిపాదన చేయగా, దాన్ని రేవంత్ వ్యతిరేకించినట్టు తెలిసింది. మరోవైపు కొత్తగూడెం సీటుపై కాంగ్రెస్ నుంచి ఇప్పటి వరకు స్పష్ట త రాకపోవడంతో సీపీఐలో ఆందోళన నెలకొంది. చివరి నిమిషం వరకు పొత్తు ఉంటుందని సంకేతాలు ఇచ్చి, చివర్లో సీటు ఇవ్వకపోతే పరిస్థితి ఏంటనే ప్రశ్న తలెత్తుతోంది. అయితే, కొత్తగూడెం సీటు ఇవ్వకపోయినా, కాంగ్రెస్తోనే సీపీఐ కలిసివెళ్లే అవకాశాలు లేకపోలేదన్న వాదనలు వినిపిస్తున్నాయి.
ఇయ్యాల సీపీఎం అభ్యర్థుల ప్రకటన..
17 స్థానాల్లో పోటీ చేస్తామని ప్రకటించిన సీపీఎం... ఆదివారం అభ్యర్థులను ప్రకటించనుంది. ఉదయం 9 గంటలకు సీపీఎం స్టేట్ఆఫీస్లో మేనిఫెస్టోతో పాటు అభ్యర్థుల జాబితాను పార్టీ రాష్ట్ర కార్యదర్శి తమ్మినేని వీరభద్రం విడుదల చేయనున్నారు.
