సైబర్ మోసాలు రోజుకో రకంగా వెలుగులోకి వస్తున్నాయి. మొన్నటిదాకా ఫెడెక్స్ ఫ్రాడ్, డిజిటల్ అరెస్టులు అంటూ అమాయకులను మోసం చేసిన కేటుగాళ్లు ఇప్పుడు డేటింగ్ యాప్స్ పేరుతో మోసాలకు పాల్పడుతున్నారు. అది కూడా ట్రాన్స్ జెండర్లే ఎక్కువగా ఈ తరహా మోసాలకు పాల్పడుతుండటం గమనార్హం. బెంగుళూరులో మరో డేటింగ్ యాప్ ఫ్రాడ్ వెలుగులోకి వచ్చి. డేటింగ్ యాప్ ఇన్విటేషన్ పేరుతో ఓ వ్యక్తి నుంచి రూ. 20 లక్షలు కాజేశారు ట్రాన్స్ జెండర్లు. ఇందుకు సంబంధించి వివరాలిలా ఉన్నాయి...
బెంగుళూరులోని నాగరాబావిలో అక్టోబర్ 23వ తేదీన జరిగిన ఈ ఘటన ఆలస్యంగా వెలుగులోకి వచ్చింది. తన కుటుంబంతో కలిసి ఆ ఇంట్లో నివసిస్తున్న ఒక ప్రైవేట్ కంపెనీ ఉద్యోగి అయిన రోహిత్ (పేరు మార్చబడింది), తన స్నేహితుడైన హర్షవర్ధన్‌కు తాళాలు అప్పగించి హెసరఘట్టలోని తన సొంత ఇంటికి వెళ్ళాడు. రోహిత్ తన ఫ్రెండ్ ని ఒకరోజు ఇంట్లో ఉండమని తమిళనాడుకు బయలుదేరాడు.
ఈ క్రమంలో రోహిత్ ఫ్రెండ్ హర్షవర్ధన్ ఒక డేటింగ్ యాప్ లో ఓ మహిళతో పరిచయం పెంచుకొని.. ఆమెను రోహిత్ ఇంటికి ఆహ్వానించాడు.అయితే.. డేటింగ్ యాప్ లో మహిళగా పేర్కొన్న ట్రాన్స్ జెండర్ ముఖానికి మాస్క్ ధరించి ఇంటికి వచ్చింది. ఆ తర్వాత మరో ట్రాన్స్ జెండర్ ని ఇంటికి పిలిచి.. ఇద్దరు కలిసి హర్షవర్ధన్ ను కత్తులతో బెదిరించి దోపిడీకి పాల్పడ్డారు. ఇద్దరు ట్రాన్స్ జెండర్లు కలిసి రూ.20 లక్షలు విలువైన బంగారు ఆభరణాలు దోచుకొని వెళ్లారు.
ఈ ఘటనపై చంద్రలేఅవుట్ పోలీసులకు ఫిర్యాదు చేశాడు బాధితుడు. బాధితుడి ఫిర్యాదుతో కేసు నమోదు చేసిన పోలీసులు నజియా, సయ్యద్ మౌషీన్ అనే ట్రాన్స్ జెండర్లను అదుపులోకి తీసుకున్నారు.
