‘‘మరో ‘1984’ జరిగేందుకు ఆస్కారం ఇవ్వొద్దు. ముఖ్యంగా కోర్టు, మీ (ఢిల్లీ పోలీస్) పర్యవేక్షణలో అలా జరగనివ్వొద్దు. మనం చాలా అప్రమత్తంగా ఉండాలి” అని ఢిల్లీ హైకోర్టు సూచించింది. ఒక్క ఢిల్లీలోనే 3 వేల మంది చావులకు కారణమైన 1984 అల్లర్లను ప్రస్తావిస్తూ ఈ కామెంట్లు చేసింది. అప్పటి పరిస్థితి ఇప్పుడు రాకుండా అలర్ట్గా ఉండాలని అధికారులను ఆదేశించింది. సీఏఏ (సిటిజన్షిప్అమెండ్మెంట్ యాక్ట్) వ్యతిరేక, అనుకూల ఆందోళన తీవ్ర హింసకు దారి తీసిన పరిస్థితులపై విచారణ జరిపిన హైకోర్టు.. ఈశాన్య ఢిల్లీ గొడవల్లో గాయపడ్డ వారిని తరలించేందుకు పోలీసులు వెంటనే చర్యలు తీసుకున్నారని ప్రశంసించింది. అర్ధరాత్రి సమయంలోనే ఆదేశాలిచ్చామని.. పోలీసులు ఆ వెంటనే అమలు చేశారని.. గాయపడ్డవారిని రక్షించారని చెప్పింది. ఐబీ ఆఫీసర్ను చంపడం దురదృష్టకరమని జస్టిస్ ఎస్.మురళీధర్, జస్టిస్ అనూప్ జె.భంభణిల బెంచ్ విచారం వ్యక్తం చేసింది. విక్టిమ్స్, దర్యాప్తు సంస్థల మధ్య కో ఆర్డినేషన్కు అడ్వొకేట్ జుబేదా బేగమ్ను అమికస్ క్యూరీగా నియమించింది. ట్రామా స్ర్టెస్తో బాధపడుతున్న వారికి ఉపశమనం కలిగించేందుకు క్వాలిఫైడ్ ప్రొఫెషనల్స్ను ఏర్పాటు చేయాలని ఇన్స్టిట్యూట్ ఆఫ్ హ్యూమన్ బిహేవియర్, అల్లయిడ్ సైన్సెస్ (ఐహెచ్బీఏఎస్) డైరెక్టర్ను ఆదేశించింది. ఢిల్లీలో జరుగుతున్న గొడవల్లో ఇప్పటిదాకా ఢిల్లీ పోలీస్ ఆఫీసర్, ఐబీ ఆఫీసర్ సహా 27 మంది చనిపోగా.. 200 మందికి పైగా గాయపడ్డారు.
అర్ధరాత్రి ఫోన్ కాల్.. ప్రత్యేక విచారణ
చిన్న ఆస్పత్రి నుంచి జీటీబీ(గురు తేజ్ బహదూర్) ఆసుపత్రికి బాధితులను తరలించడం సాధ్యం కావడం లేదంటూ అడ్వొకేట్ సరూర్ మందర్ నుంచి జస్టిస్మురళీధర్కు మంగళవారం రాత్రి కాల్ వచ్చింది. దీంతో జస్టిస్మురళీధర్ తన ఇంట్లో అర్ధరాత్రి 12:30 గంటలకు ప్రత్యేక విచారణ చేపట్టారు. బాధితులను తరలించేందుకు, ఎమర్జెన్సీ ట్రీట్మెంట్ అందించేందుకు ఏర్పాట్లు చేయాలని వెంటనే పోలీసులకు ఆదేశాలు జారీ చేశారు. పోలీసులు మొత్తం బలగాలను మోహరించాలని, జీటీబీ ఆసుపత్రిలో చికిత్స అందించేందుకు వీలు కాకపోతే.. లోక్ నాయక్ జై ప్రకాష్ నారాయణ్ హాస్పిటల్, లేదా మౌలానా ఆజాద్ ఆస్పత్రి లేదా ఇంకేదైనా ఆసుపత్రికి తరలించాలని సూచించారు. గాయపడ్డ వారు ఎంత మంది? వారికి ఎలాంటి ట్రీట్మెంట్ ఇచ్చారు? తదితర వివరాలతో స్టేటస్ రిపోర్టు ఇవ్వాలని అధికారులను
ఆదేశించారు.
డాక్టర్కు ఫోన్ చేసి..
న్యూ ముస్తఫాబాద్లోని అల్ హింద్ ఆస్పత్రి డాక్టర్ అన్వర్తో జడ్జిలు ఫోన్లో మాట్లాడారు. ఆస్పత్రిలో రెండు డెడ్ బాడీలు ఉన్నాయని, 22 మంది గాయపడ్డ వారు ఉన్నారని కోర్టుకు ఆయన తెలిపారు. పోలీసుల సాయం కోసం మంగళవారం సాయంత్రం 4 గంటల నుంచి ప్రయత్నిస్తున్నానని, కానీ ఎలాంటి స్పందన లేదని వివరించారు. దీంతో కోర్టు వెంటనే ఆస్పత్రి దగ్గరకు వెళ్లాలని పెద్దాఫీసర్లకు ఆర్డర్లు ఇచ్చింది. అక్కడికి వెళ్లిన అధికారులు.. బాధితులను ఇతర ఆస్పత్రులకు తరలించారు. జడ్ కేటగిరీ భద్రత ఉన్న ప్రజాప్రతినిధులు.. బాధితులను పరామర్శించేందుకు వెళ్లాలని, చట్టం పనిచేస్తున్నదన్న కాన్ఫిడెన్స్ను వాళ్లలో నింపాలని సూచించింది.
కపిల్ మిశ్రా వీడియో ప్లే చేయండి
విద్వేష వ్యాఖ్యలు చేసిన కపిల్ మిశ్రాపై ఎఫ్ఐఆర్ నమోదు చేయాలని, హింసకు కారణమైన వారిని అరెస్టు చేయాలని దాఖలైన పిటిషన్పై కోర్టు విచారణ జరిపింది. కపిల్ మిశ్రాకు సంబంధించిన వీడియోను చూశారా? అని ఢిల్లీ పోలీసుల తరఫున విచారణకు హాజరైన సొలిసిటర్ జనరల్ తుషార్ మెహతాను, పోలీసులను హైకోర్టు ప్రశ్నించింది. తాను టీవీ చూడనని మోహతా సమాధానమిచ్చారు. ‘‘కేంద్ర మంత్రి అనురాగ్ ఠాకూర్, బీజేపీ ఎంపీ పర్వేశ్ వర్మ.. విద్వేష వ్యాఖ్యలు చేశారు. కానీ కపిల్ మిశ్రా అలా మాట్లాడలేదు” అని ఓ పోలీసు అధికారి వివరించారు. దీంతో కోర్టు సీరియస్ అయింది. ‘‘ఢిల్లీ పోలీసుల వ్యవహారాలను చూసి నిజంగా ఆశ్చర్యపోతున్నా.. కపిల్ మిశ్రా వీడియోక్లిప్ను ప్లే చేయండి” అని కోర్టు సిబ్బందిని జస్టిస్ మురళీధర్ ఆదేశించారు. తర్వాత కపిల్ మిశ్రా, అనురాగ్ ఠాకూర్, అభయ్ వర్మ, పర్వేశ్ వర్మల వీడియో క్లిప్లను కోర్టులో ప్లే చేశారు. విద్వేష వ్యాఖ్యలు చేశారన్న ఆరోపణలు ఎదుర్కొంటున్న వారిపై ఎఫ్ఐఆర్ నమోదు చేయడానికి లేట్ చేయొద్దని పోలీసులను కోర్టు ఆదేశించింది. ఇలాంటి విషయాల్లో పోలీసులు నెమ్మదిగా స్పందిస్తున్నారని ఆగ్రహం వ్యక్తం చేసింది.
జాగ్రత్తగా నిర్ణయం తీసుకోండి
విద్వేష వ్యాఖ్యలు చేశారన్న ఆరోపణలపై బీజేపీ నేతలు కపిల్ మిశ్రా, అనురాగ్ ఠాకూర్, పర్వేశ్ వర్మపై ఎఫ్ఐఆర్ నమోదు చేసే విషయంలో జాగ్రత్తగా నిర్ణయం తీసుకోవాలని ఢిల్లీ పోలీసులను హైకోర్టు ఆదేశించింది. బుధవారం జస్టిస్ మురళీధర్, జస్టిస్ తల్వంత్ సింగ్ల బెంచ్ విచారణ జరిపింది. పోలీస్ కమిషనర్తో భేటీ అవుతానని, వీడియో క్లిప్లను చూస్తానని, సరైన నిర్ణయం తీసుకుంటానని స్పెషల్ కమిషనర్ ప్రవీర్ రంజన్ ఇచ్చిన హమీని కోర్టు నోట్ చేసుకుంది. అలాగే కేసులో ప్రతివాదాలకు నోటీసులు జారీ చేసింది. తదుపరి విచారణ గురువారం జరపనుంది.
అల్లర్లపై 18 ఎఫ్ఐఆర్లు
ఈశాన్య ఢిల్లీ ప్రశాంతంగా ఉందని డిప్యూటీ పోలీస్ కమిషనర్ (సౌత్ఈస్ట్) మన్దీప్ రంధావా చెప్పారు. ఈనెల 23 నుంచి అట్టుడికిన నార్త్ఈస్ట్ ఢిల్లీలో బుధవారం ఒక్క అవాంఛనీయ సంఘటనా జరగలేదని మీడియాకు తెలిపారు. అల్లర్లకు సంబంధించి 18 ఎఫ్ఐఆర్లు నమోదుచేసినట్టు చెప్పారు. చాంద్బాగ్, మౌజ్పూర్, జఫ్రాబాద్లాంటి ప్రాంతాల్లో 106 మందిని అరెస్టు చేశామన్నారు. అల్లర్లలో గాయపడ్డవారు గురు తేజ్ బహదుర్ హస్పిటల్, ఎల్ఎన్జేపీ హాస్పిటల్, రామ్మనోహర్లోహియా హాస్పిటల్, ఇతర హెల్త్కేర్ సెంటర్లలో ట్రీట్మెంట్ తీసుకుంటున్నారు.
సెక్యూరిటీ సిబ్బంది ఫ్లాగ్ మార్చ్
ఢిల్లీలో అల్లర్లు జరిగిన చాంద్ బాగ్, జఫ్రాబాద్, భజన్పురా, యమునా విహార్, మౌజ్పూర్లో సెక్యూరిటీ ఫోర్స్ బుధవారం ఫ్లాగ్ మార్చ్ జరిపింది. ఈ ఏరియాల్లోని షాపులు, స్కూళ్లు మూతపడ్డాయి. వీధుల్లో జనసంచారం లేదు. చాంద్బాగ్లో పెద్ద ఎత్తున ఫోర్స్ను దింపారు.ఈ ఏరియాలో రోడ్లమీదకు రావడానికి జనాన్ని అనుమతించడంలేదు. సెక్యూరిటీ కోసం కొన్ని దారుల్ని తామే మూసేశామని స్థానికులు చెప్పారు.
