- జనరల్ సీట్లలోనూ.. టికెట్లు కావాలి
- ఆదివాసీ కాంగ్రెస్ మహాసభలో నేతల డిమాండ్
- ఎస్టీలకు బీఆర్ఎస్ చేసిందేమీ లేదు
- ఆదివాసీల వల్లే వేరే రాష్ట్రాల్లో కాంగ్రెస్ గెలిచింది: ఆదివాసీ కాంగ్రెస్ నేషనల్ చైర్మన్ మోగే
- 79 అసెంబ్లీ సీట్లలో గెలుపును నిర్ణయించేది ఆదివాసీ ఓట్లే: బెల్లయ్య నాయక్
- ఎస్టీలకు కేంద్ర, రాష్ట్ర ప్రభుత్వాలు
- అన్యాయం చేస్తున్నయ్: మాణిక్రావ్ ఠాక్రే
హైదరాబాద్, వెలుగు: ఈసారి అసెంబ్లీ, లోక్సభ ఎన్నికల్లో ఆదివాసీలు, గిరిజనులకు జనరల్ స్థానాల్లోనూ టికెట్లను కేటాయించాలని కాంగ్రెస్ ఎస్టీ నాయకులు డిమాండ్ చేశారు. రిజర్వేషన్ కేటగిరీతో పాటు జనరల్లోనూ పార్టీ హైకమాండ్ సముచిత ప్రాధాన్యం కల్పించాలన్నారు. ఆదివారం గాంధీభవన్లోని ప్రకాశం హాల్లో ఆదివాసీ కాంగ్రెస్ రాష్ట్ర చైర్మన్ బెల్లయ్య నాయక్ ఆధ్వర్యంలో ఆదివాసీ గిరిజన మహాసభ జరిగింది. ఈ సందర్భంగా ఆదివాసీ కాంగ్రెస్ నేషనల్ చైర్మన్ శివాజీ రావ్ మోగే మాట్లాడుతూ.. చత్తీస్గఢ్, రాజస్థాన్, మధ్యప్రదేశ్లో ఆదివాసీల వల్లే కాంగ్రెస్ గెలిచిందన్నారు. రాష్ట్రంలో ఆదివాసీల కోసం బీఆర్ఎస్ చేసిందేమీ లేదని విమర్శించారు. ఆదివాసీల అభివృద్ధి కాంగ్రెస్తోనే సాధ్యమని, వారిపై గాంధీ కుటుంబానికి ప్రేమ అని చెప్పారు. వారికి భూమి హక్కులు కల్పించింది కాంగ్రెస్ పార్టీనేనని తెలిపారు. తెలంగాణలో అసెంబ్లీ ఎన్నికలతో పాటు, లోక్సభ ఎన్నికల్లో ఆదివాసీలకు రిజర్వేషన్ కోటాతో పాటు జనరల్ స్థానాల్లోనూ టికెట్లు కేటాయించాలని ఆయన డిమాండ్ చేశారు.
జనరల్ సీట్లలోనూ టికెట్లు కావాలి
పార్టీ రాష్ట్ర వ్యవహారాల ఇన్చార్జి మాణిక్ రావు ఠాక్రే మాట్లాడుతూ.. ఆదివాసీలు, గిరిజనులకు కేంద్ర, రాష్ట్ర ప్రభుత్వాలు అన్యాయం చేస్తున్నాయని మండిపడ్డారు. ‘‘బీజేపీ, బీఆర్ఎస్ ఒక్కటే అనేందుకు లిక్కర్ స్కామ్ కేసు నుంచి కేసీఆర్ కూతురు కవితను తప్పించడమే నిదర్శనం” అని ఆరోపించారు. ఆదివాసీలు, గిరిజనుల అభివృద్ధికి కాంగ్రెస్ పార్టీ కట్టుబడి ఉందన్నారు. భారత్ జోడో యాత్ర సందర్భంగా ఆదివాసీ సమస్యలపై రాహుల్ గాంధీ పూర్తి స్థాయిలో స్టడీ చేశారని చెప్పారు. ఆదివాసీ, గిరిజన కమిటీలను ఏర్పాటు చేసి వారికి కాంగ్రెస్ అందుబాటులో ఉంటున్నదని తెలిపారు. ‘‘దేశంలో ఆర్ఎస్ఎస్ రాజనీతి కొనసాగుతున్నది. రిజర్వేషన్లను ఎత్తేసేందుకు ప్రయత్నాలు జరుగుతున్నయ్ హిందూ, ముస్లిం, ఆదివాసీ, గిరిజన తెగల మధ్య చిచ్చు పెడుతున్నరు” అని ఆయన దుయ్యబట్టారు. కర్నాటకలో ఆదివాసీలు కాంగ్రెస్కు మద్దతిచ్చారని, అదే స్ఫూర్తితో తెలంగాణలోనూ అండగా ఉండాలని ఏఐసీసీ జనరల్ సెక్రటరీ రోహిత్ చౌదరి కోరారు.
కేసీఆర్ మాయ మాటలుచెప్తున్నడు: బెల్లయ్య నాయక్
రాష్ట్రంలోని 79 అసెంబ్లీ స్థానాల్లో గెలుపోటములను నిర్ణయించేది ఆదివాసీ, గిరిజనుల ఓట్లేనని ఆదివాసీ కాంగ్రెస్ రాష్ట్ర చైర్మన్ బెల్లయ్య నాయక్ అన్నారు. దేశంలోని చాలా రాష్ట్రాల్లో ఆదివాసీ అభ్యర్థులు జనరల్ స్థానాల్లో పోటీ చేసి గెలిచారని, అదే స్ఫూర్తితో రాష్ట్రంలోనూ వారికి జనరల్ స్థానాల్లోనూ టికెట్లు ఇవ్వాలని ఆయన కోరారు. మాయమాటలతో గిరిజనులను కేసీఆర్ మోసం చేస్తున్నారని ఫైర్ అయ్యారు. సంక్షేమ పథకాల అమలులో మొండి చెయ్యి చూపిస్తున్నారని అన్నారు. డబుల్ బెడ్రూం ఇండ్ల మంజూరులో అన్యాయం చేశారని తెలిపారు. కాంగ్రెస్ పార్టీలో గ్రూపులున్నాయంటూ కేసీఆర్ తప్పుడు ప్రచారం చేస్తున్నారని మండిపడ్డారు. కేసీఆర్కు బుద్ధి చెప్పేందుకు ప్రజలు సిద్ధంగా ఉన్నారని ఆయన హెచ్చరించారు.
ఎస్సీ, ఎస్టీలనుకేసీఆర్ విడదీస్తుండు: బలరాం నాయక్
గిరిజనుల అభివృద్ధే లక్ష్యంగా ఎస్సీ, ఎస్టీ సబ్ప్లాన్ను కాంగ్రెస్ పార్టీ తన హయాంలో అమలు చేసిందని కేంద్ర మాజీ మంత్రి బలరాం నాయక్ అన్నారు. అయితే, రాష్ట్రంలో కేసీఆర్ సర్కార్ మాత్రం ఎస్సీ, ఎస్టీలను విభజించే ప్రయత్నం చేస్తున్నదని.. దళిత, గిరిజన, ఆదివాసీలకు తప్పుడు హామీలిచ్చి టైంపాస్ చేస్తున్నదని ఆయన ఆరోపించారు. వచ్చే ఎన్నికల్లో జనాభా ప్రాతిపదికన ఆదివాసీలు, గిరిజనులకు సీట్ల కేటాయింపులు ఉండాలన్నారు.
హక్కుల కోసం పోరాడాలి: రాములు నాయక్
ఆదివాసీలంతా ఐక్యంగా ఉండి హక్కుల కోసం పోరాడాల్సిన అవసరం ఉందని మాజీ ఎమ్మెల్సీ రాములు నాయక్ పిలుపునిచ్చారు. తెలంగాణ రాష్ట్ర ఏర్పాటులో వారి పాత్ర కూడా కీలకమైందని తెలిపారు. ఎన్నికల నేపథ్యంలో రాష్ట్రంలో టికెట్ల పోటీ తీవ్రంగా ఉందని, సీట్ల కేటాయింపులో కాంగ్రెస్ అధిష్ఠానం ఆదివాసీలకు సముచిత స్థానం కల్పించాలని ఆయన కోరారు. ఎన్నికల్లో ఆదివాసీలకు జనరల్స్థానాల్లో పోటీ చేసేలా అవకాశం ఇవ్వాలని, జనరల్లో 12 సీట్లిస్తే గెలిపించి చూపిస్తామని చెప్పారు.
