ములుగు, వెలుగు : ప్రజాస్వామ్యంలో పాలకులను ప్రశ్నిస్తే..సమస్యలపై, ఇండ్ల కోసం అడిగితే అరెస్ట్ చేస్తరా? మంత్రులు వస్తే ప్రజలు పోలీస్స్టేషన్లలో ఉండాలా?’ అంటూ మహిళా కాంగ్రెస్ జాతీయ ప్రధాన కార్యదర్శి, ములుగు ఎమ్మెల్యే సీతక్క సర్కారుపై ఫైర్అయ్యారు. గురువారం ములుగులో మెడికల్ కాలేజీ శంకుస్థాపనకు మంత్రులు హరీశ్రావు, దయాకర్ రావు, సత్యవతి రాథోడ్ రాగా పోలీసులు ఆశా కార్యకర్తలు, అంగన్వాడీ ఉద్యోగులు, కొండాయి నుంచి ఇండ్ల కోసం వచ్చిన మహిళలను అదుపులోకి తీసుకొని పోలీస్స్టేషన్కు తరలించారు. ఈ సందర్భంగా కొందరు మహిళలకు స్వల్ప గాయాలయ్యాయి.
ఈ విషయం తెలుసుకున్న ఎమ్మెల్యే సీతక్క వారిని పోలీస్స్టేషన్లో పరామర్శించారు. తర్వాత వారితో కలిసి పోలీస్ స్టేషన్ నుంచి ఏరియా దవాఖాన వరకు వెళ్లి జాతీయ రహదారిపై రాస్తారోకో చేశారు. దీంతో గంటపాటు వాహనాల రాకపోకలు నిలిచిపోయాయి. డీఎస్పీ రవీందర్ అక్కడికి వచ్చి ఆందోళన విరమించాలని కోరడంతో సీతక్క కాంగ్రెస్, సీపీఐ నాయకులు, అంగన్వాడీ, ఆశా వర్కర్లు, కొండాయి గ్రామ మహిళలతో కలిసి కలెక్టరేట్కు ర్యాలీగా వెళ్లారు. కలెక్టరేట్ ముందు ఆందోళన నిర్వహించిన తర్వాత ఇన్చార్జి అడిషనల్కలెక్టర్ డీఎస్.వెంకన్నకు వినతిపత్రం అందజేశారు. అప్పటికే మంత్రుల ప్రోగ్రాం ముగియడంతో పోలీసులు ఊపిరి పీల్చుకున్నారు.
ఈ సందర్భంగా సీతక్క మాట్లాడుతూ మంత్రులు ములుగుకు వస్తే ప్రజలను అరెస్ట్ చేసి పోలీస్ స్టేషన్లలో పెడుతున్నారని, ఇదేం పద్ధతని ప్రశ్నించారు. కార్మికులంతా మంత్రి హరీశ్రావును కలిసేందుకు వస్తే కలవనివ్వకుండా భయపెట్టడం ఏమిటన్నారు. మంత్రి సత్యవతి రాథోడ్ తమ అంగన్వాడీలు బాగా పనిచేస్తున్నారని పొగుడుతూనే అణిచివేస్తున్నారని ఈ ధోరణి సరికాదన్నారు. ప్రభుత్వ కార్యక్రమాన్ని అధికార పార్టీ కార్యక్రమంగా నిర్వహించమేమిటన్నారు. జిల్లా అధికారులు గులాబీ జెండాను తమ ఎజెండాగా వ్యవహరించారని విమర్శించారు. ఎన్ని కేసులు పెట్టినా తగ్గేది లేదని, పోరాటం కొనసాగుతుందన్నారు. ఈ ఆందోళనలో కాంగ్రెస్ జిల్లా అధ్యక్షుడు పైడాకుల అశోక్, మార్కెట్ కమిటీ మాజీ చైర్మన్, టీపీసీసీ సభ్యుడు మల్లాడి రాంరెడ్డి, కిసాన్సెల్ జిల్లా అధ్యక్షుడు గొల్లపెల్లి రాజేందర్గౌడ్, యూత్ కాంగ్రెస్జిల్లా అధ్యక్షుడు బానోతు రవిచందర్, మండల అధ్యక్షుడు ఎండీ.చాంద్పాషా, పట్టణ అధ్యక్షుడు చింతనిప్పుల భిక్షపతి, ఏఐటీయూసీ జిల్లా కార్యదర్శి జంపాల రవీందర్ పాల్గొన్నారు.
