హిందూ ధర్మంలో హనుమంతుడు ఆపద్బాంధవుడిగా, భక్తుల కోరికలను తీర్చే అభయాంజనేయ స్వామిగా పూజించబడతాడు. హనుమజ్జయంతి మంగళవారం రావడం విశేషమని పండితులు చెబుతున్నారు. ఈ రోజున భక్తితో పూజిస్తే ధైర్యం, ఆరోగ్యం, విజయం, ఐశ్వర్యం లభిస్తాయని భక్తుల నమ్మకం.
హిందూ ధర్మంలోని ముక్కోటి దేవతలలో హనుమంతుడికి ప్రత్యేకమైన స్థానం ఉంది. కష్టాల్లో ఉన్నవారికి ఆపద్బాంధవుడిగా, భక్తుల కోరికలను తీర్చే అభయాంజనేయ స్వామిగా ఆయనను భక్తిశ్రద్ధలతో ఆరాధిస్తారు. . ఈసారి మే 12 (మంగళవారం) హనుమజ్జయంతి రావడం విశేషంగా పండితులు చెబుతున్నారు. ఈ పవిత్ర రోజున హనుమంతుడిని విధిగా పూజిస్తే ధైర్యం, ఆరోగ్యం, విజయం, ఐశ్వర్యం వంటి సకల శుభఫలితాలు కలుగుతాయని భక్తుల నమ్మకం. మంగళవారం హనుమజ్జయంతి రావడం మరింత శుభసూచకమని జ్యోతిష నిపుణులు పేర్కొంటున్నారు.
పూజ విధానం
హనుమజ్జయంతి రోజున ఉదయాన్నే స్నానం చేసి శుద్ధంగా పూజ ప్రారంభించడం మంచిదని భావిస్తారు. ఉపవాసం ఉంటానని సంకల్పం చేసుకొని భక్తితో పూజ చేయాలి. పసుపు లేదా కాషాయం రంగు వస్త్రాలు ధరించడం శుభప్రదం.
పూజలో సింధూరం, తమలపాకులు, అరటిపండ్లు ముఖ్యంగా సమర్పిస్తారు. “శ్రీరామదూతాయ హనుమతే నమః” అనే మంత్రాన్ని జపిస్తూ నువ్వుల నూనెతో దీపం వెలిగించడం శుభకరంగా భావిస్తారు. ఐదు వత్తుల దీపం వెలిగించి అరటిపండ్లు నైవేద్యంగా పెట్టడం సంప్రదాయం.
ప్రత్యేక సమర్పణలు
హనుమంతుడికి సింధూరం, తమలపాకులు, అరటిపండ్లు ఎంతో ఇష్టమైనవిగా చెబుతారు. ముఖ్యంగా తమలపాకులతో చేసిన మాలలు, వడమాలలు సమర్పించడం ప్రత్యేక ఫలితాలను ఇస్తుందని విశ్వాసం ఉంది. ఇవి శాంతి, ఆరోగ్యం, గ్రహదోష నివారణకు సహాయపడతాయని భక్తులు నమ్ముతారు.
ఆలయాల్లో ఆచారాలు
ఈ రోజున హనుమాన్ ఆలయాల్లో ప్రత్యేక పూజలు, సుందరకాండ పారాయణం, భజనలు నిర్వహిస్తారు. భక్తులు తమలపాకుల మాలలు, వడమాలలు సమర్పిస్తారు. ఆలయానికి అరటిపండ్లు సమర్పించడం కూడా శుభకరంగా భావిస్తారు.
తమలపాకులు ఎందుకు ఇష్టమంటే..?
అశోకవనంలో ఉన్న సీతమ్మ వారిని కలసి, శ్రీరామచంద్రుని సందేశాన్ని హనుమంతుడు తెలియజేసినప్పుడు ఆమె అపార ఆనందంతో హనుమంతునికి కృతజ్ఞతగా తమలపాకుల మాలను సమర్పించారట. ఆ సంఘటన కారణంగానే హనుమంతుడికి తమలపాకులు అత్యంత ప్రీతికరమైనవిగా భావిస్తారు.
భక్తి ప్రాధాన్యం
హనుమంతుని పూజలో ప్రధానమైనది భక్తి. ఆయన శ్రీరాముని పట్ల చూపిన అచంచల భక్తి కారణంగానే ఆదర్శ భక్తుడిగా నిలిచారు. అందుకే హనుమజ్జయంతి రోజున మనస్ఫూర్తిగా ఆరాధన చేయడం ముఖ్యమని పండితులు సూచిస్తారు.
Disclaimer: పైన అందించిన సమాచారం కేవలం అవగాహన కోసం మాత్రమే. ఈ కథనాన్ని పురాణాల ప్రకారం పండితులు.. నిపుణుల సలహాలతో పాటు ఇంటర్నెట్ లో అందుబాటులో ఉన్న సమాచారం వినియోగించి రూపొందించబడింది. ఈ సమాచారాన్ని V6 వెలుగు యాజమాన్యం లేదా ఉద్యోగులు ధృవీకరించరు. మీకున్న ఆధ్యాత్మిక నిపుణులను సంప్రదించటం ఉత్తమం.
