- సెన్సిటీవ్ పోలింగ్ సెంటర్లపై పోలీస్ నిఘా
- నెల రోజుల్లో 1900 మంది బైండోవర్
- రౌడీల పొలిటికల్ లింక్లపై ఆరా
నిజామాబాద్, వెలుగు: ఎలాంటి గొడవలు లేకుండా పార్లమెంట్ ఎన్నికలను ప్రశాంతంగా నిర్వహించడంపై జిల్లా పోలీసు యంత్రాంగం ఫోకస్ పెడుతోంది. 507 పోలింగ్ సెంటర్లను సెన్సిటివ్ గా గుర్తించి వాటి మీద ప్రత్యేకంగా నిఘా పెట్టింది. పొలిటికల్ పార్టీలతో లింక్లున్న రౌడీషీటర్ల కదలికలను ఎప్పటికప్పుడు తెలుసుకునేందుకు ఏర్పాట్లు చేసింది. పోలీస్ కమిషనర్ కల్మేశ్వర్ వారి మూమెంట్స్ను ఏరోజుకారోజు ఆయా పోలీసుస్టేషన్ల నుంచి తెప్పించుకుంటున్నారు. జిల్లాలోని రౌడీ షీటర్లకు ఇప్పటికే కౌన్సిలింగ్ఇచ్చిన ఆయన ఎన్నికల సందర్భంగా ఎలాంటి గొడవలు జరిగినా కఠినంగా వ్యవహరిస్తామని గట్టి వార్నింగ్ ఇచ్చారు. నిజామాబాద్ లోక్సభ పరిధిలో జగిత్యాల జిల్లాకు చెందిన రెండు అసెంబ్లీ సెగ్మెంట్లు ఉన్నాయి, ఆ జిల్లా పోలీసు అధికారుల సమన్వయంతో సీపీ పరిస్థితులను సమీక్షిస్తున్నారు.
సెన్సిటివ్ సెంటర్లపై అలర్ట్
నిజామాబాద్ పార్లమెంట్ స్థానం పరిధి ఏడు అసెంబ్లీ సెగ్మెంట్లు ఉన్నాయి. 17,01,573 మంది ఓటర్లుండగా.. 1,807 పోలింగ్ సెంటర్లు ఏర్పాటు చేశారు. ఇందులో 507 సెంటర్లు సమస్యాత్మకంగా గుర్తించారు. 171 ఏరియాల్లో ఉన్న ఈ పోలింగ్ సెంటర్లపై పోలీసులు నిఘా పెట్టారు. ఈ సెంటర్లతో పాటు నియోజకవర్గమంతటా లా అండ్ ఆర్డర్ కు విఘాతం రాకుండా యాక్షన్ ప్లాన్ తయారు చేశారు.
గొడవలకు పాల్పడేవారికి హెచ్చరిక చేయడంతోపాటు ఓటర్లకు భరోసా కల్పించేందుకు సెన్సిటివ్ ప్రాంతాల్లో ఇప్పటికే కేంద్రబలగాలతో ఫ్లాగ్ మార్చ్ నిర్వహించారు. జిల్లాలోని పోలీస్ రికార్డుల్లో 326 మందిపై రౌడీ షీట్లు ఉన్నాయి. వారందరికి సీపీ కల్మేశ్వర్ గత నెల 2న కౌన్సిలింగ్ ఇచ్చారు. ఎవరి పనులు వాళ్లు చేసుకుని ఇంటి దగ్గరే ప్రశాంతంగా ఉండాలని, శాంతిభద్రతలకు భంగం కలిగించే ప్రయత్నం చేస్తే జైలుకు పంపుతామని వార్నింగ్ ఇచ్చారు. గతంలో ఎప్పుడూ లేనట్టుగా నెలరోజుల్లో 1,900 మందిని రూ.2 లక్షల బాండ్పేపర్తో బైండోవర్ చేశారు. వారిలో మార్పురాకపోతే నేరుగా జైలుకు పంపుతామని స్పష్టం చేశారు.
నిఘా కోసం స్పెషల్ టీమ్స్
పొలిటికల్ బ్యాక్గ్రౌండ్ ఉండి గొడవలకు దిగుతున్న వారి వివరాలను సెగ్మెంట్ల వారీగా పోలీసులు తయారు చేశారు. వారికి ఆయా పార్టీలతో సంబంధాలున్నాయా.. ఎన్నికల ప్రచారంలో పాల్గొంటున్నారా.. ఎప్పుడేం చేస్తున్నారు అన్న వివరాలను స్టేషన్ల వారీగా తెప్పించుకుంటున్నారు. ఇందుకోసం సీపీ ప్రత్యేకంగా టీంలను ఏర్పాటు చేశారు. ఇటీవల హత్యకు గురైన ఇద్దరు రౌడీషీటర్ల గ్యాంగ్లకు చెందిన అజ్జు, అంజాద్ ఈనెల11న కత్తులతో హల్చల్ చేయడం, ఒకరిపై దాడి చేయడాన్ని.. సోమవారం అక్రం అనే వ్యక్తి ఫెరోజ్ఖాన్అనే వ్యక్తిపై కత్తులతో దాడి చేసి గాయపర్చడాన్ని సీపీ సీరియస్తీసుకున్నారు. ఎన్నికల సమయంలో ఇలాంటి ఘటనలు జరగకుండా జాగ్రత్త పడుతున్నారు.
