కొవిడ్ అలలు అలలుగా తరుముకొస్తోంది. ఇప్పుడు వ్యాక్సినే కరొనా వైరస్కు విరుగుడని డాక్టర్లు చెబుతున్నారు. ఈ వ్యాక్సిన్ హెల్దీగా ఉన్నవాళ్లకేనా? హెల్త్ ప్రాబ్లమ్స్ ఉన్నవాళ్లు కూడా తీసుకోవచ్చా? అని చాలామందికి డౌట్. అన్ని సమస్యల కంటే కరోనా సమస్యే ప్రాణాంతకం కాబట్టి వ్యాక్సిన్కే జై కొట్టండని డాక్టర్లంటున్నారు. అయినా ఎన్నో భయాలు. ఏ ప్రాబ్లమ్ ఉన్నవాళ్లు ఎలాంటి జాగ్రత్తలు తీసుకోవాలో కేర్ హాస్పిటల్ జనరల్ ఫిజిషియన్ డాక్టర్ నవోదయ చెబుతున్నారు.
కొవిడ్ తగ్గిన తర్వాత ఎన్ని రోజులకు వ్యాక్సిన్ తీసుకోవాలి.?
కొవిడ్ నుంచి కోలుకున్నవాళ్లలో యాంటీ బాడీస్ మూడు నెలల వరకు ఉంటాయి. కాబట్టి వ్యాక్సిన్ తీసుకున్నా ఉపయోగం ఉండదు. మూడు నెలల తర్వాత వ్యాక్సిన్ తీసుకుంటే ఇంకొంతకాలం సేఫ్టీగా ఉండొచ్చు.
బీపీ ఉన్నవాళ్లు తీసుకుంటే ఇబ్బందులు ఉంటాయా?
బీపీ పేషెంట్స్ వ్యాక్సిన్ తీసుకోవచ్చు. అయితే తీసుకునే ముందు బీపీ చెక్ చేసుకోవాలి. వ్యాక్సిన్ కోసం వెళ్లినప్పుడు సడన్గా బీపీ పెరగొచ్చు. కాబట్టి తప్పకుండా బీపీ పేషెంట్స్ బీపీ చెక్ చేసుకుని మాత్రమే వ్యాక్సిన్ తీసుకోవాలి. బీపీ170/180 మధ్య ఉంటే కాసేపు అక్కడే కూర్చుని, బీపీ తగ్గాక వ్యాక్సిన్ వేయించుకోవాలి.
ఇన్సులిన్ ఆపాలా?
షుగర్ పేషెంట్స్ కొవిడ్ వ్యాక్సిన్ తీసుకునే రోజు కూడా ఇన్సులిన్ తీసుకోవాలి. వ్యాక్సిన్ ఇచ్చే విధానం సరిగా ఉండాలి. షుగర్ పేషెంట్స్కి ఇన్ఫెక్షన్లు రావడం చాలా సాధారణం. వస్తే తగ్గవు. కాబట్టి వ్యాక్సిన్ ఇచ్చేచోట స్పిరిట్తో సరిగా క్లీన్ చేయాలి. షుగర్ పేషెంట్స్కి చాలా కేర్ఫుల్గా వ్యాక్సిన్ ఇవ్వాలి కాబట్టి మెడికల్ స్టాఫ్కి వ్యాక్సిన్ తీసుకునేముందు ‘షుగర్ పేషెంట్’ అని గుర్తుచేస్తే మంచిది. తర్వాత రోజుల్లో కూడా ఇన్సులిన్ని రెగ్యులర్గా తీసుకున్నట్లే తీసుకోవాలి.
కీమో తీసుకున్న వాళ్లు ఎప్పుడు తీసుకోవాలి?
కీమో చేసిన తర్వాత ఇన్ని రోజులకు తీసుకోవాలన్న నియమం లేదు. వీలునిబట్టి, డాక్టర్ సలహాతో క్యాన్సర్ పేషెంట్స్ వ్యాక్సిన్ తీసుకోవాలి. క్యాన్సర్ పేషెంట్స్, ఆర్గాన్ ట్రాన్స్ప్లాంట్ చేయించు కున్న వాళ్లు, సర్జరీ చేయించుకున్న వాళ్లు, ఆస్తమా, న్యూరో ప్రాబ్లమ్ ఉన్నవాళ్లు కొవిడ్ వ్యాక్సిన్ తీసుకోవచ్చు. వ్యాక్సిన్ తీసుకున్నాక ఏదైనా ఇబ్బంది వస్తే ట్రీట్మెంట్ చేస్తున్న డాక్టర్ని మాత్రమే కన్సల్ట్ అవ్వాలి. వాళ్లు చెప్పినట్లుగా మందులు వాడాలి.
అలర్జీ పేషెంట్స్ తీసుకోవచ్చా?
కొవిడ్ వ్యాక్సిన్ తీసుకుంటే అలర్జీ రాదు. అలర్జీలతో బాధపడుతున్నవాళ్లు కూడా కొవిడ్ వ్యాక్సిన్ తీసుకోవచ్చు. ఈ వ్యాక్సిన్ వల్ల అప్పటికే ఉన్న అలర్జీ పెరగడం కూడా ఉండదు.
ఆపరేషన్ వాయిదా వేయాలా?
ఒంట్లో రోగం, కరోనా వైరస్ ఈ రెండింటిలో ఏది ఎక్కువ ప్రమాదమో చూసుకుని వ్యాక్సిన్ తీసుకోవాలి. వ్యాక్సిన్ తీసుకున్నవాళ్లలో సెకండ్ డోస్ తీసుకున్న రెండు వారాల తర్వాత మాత్రమే కరోనా వైరస్ నుంచి కాపాడే యాంటీ బాడీస్ డెవలప్ అవుతాయి.
రెండు డోసులు తీసుకోవడానికి ఉన్న పిరియడ్, యాంటీ బాడీస్ డెవలప్ అయ్యే టైమ్ని బట్టి ఆపరేషన్ని మూడు నెలలు వాయిదా వేసుకోవడం మంచిది. ఆపరేషన్ చేయాల్సిన అవసరం ఉందని డాక్టర్స్ చెబితే వెంటనే వ్యాక్సిన్ వేయించుకోవాలి. కొన్ని ప్రాబ్లమ్స్కి ఆపరేషన్ వాయిదా వేయడం కుదరదు. కాబట్టి వెంటనే ఆపరేషన్ చేయించు కోవాలి. కొవిడ్ పేషెంట్స్కి ట్రీట్మెంట్ చేయని హాస్పిటల్ లో చేరితే సేఫ్టీగా ఉంటుంది.
డాక్టర్ నవోదయ
కన్సల్టెంట్ జనరల్ ఫిజిషియన్,
కేర్ హాసిప్టల్ , బంజారాహిల్స్ , హైదరాబాద్
