ఓ ఎనిమిది గంటలు పని చేసి ఇంటికి వస్తేనే అలసిపోయామంటూ కూలబడిపోతాం. వేరే పని చేయాలంటే వెనకడుగేస్తాం. వ్యక్తిగత జీవితం, అభిరుచులు, అవసరాల మధ్య సమతుల్యతను సాధించడం కష్టం. అలాంటిది ఓ ఆటో డ్రైవర్ పొద్దంతా డ్రైవింగ్ చేసి మిగతా సమయంలో తన వ్యక్తిగత అభిరుచిని ప్రపంచం ముందుంచుతున్నాడు. దీనికి సంబంధించిన ఓ వీడియో నెట్టింట వైరల్ గా మారింది.
బెంగళూర్కు చెందిన ఉబర్ డ్రైవర్ జనార్దన్ ప్రత్యేకతే ఇది. జనార్దన్ తన విధులు ముగించుకున్న తర్వాత ఖాళీ సమయాల్లో పర్సనల్ ఫైనాన్స్, తదితర అంశాలపై యూట్యూబ్ వీడియోలు చేస్తున్నాడు. ఎక్కడ పెట్టుబడి పెట్టాలి, ఏ స్టాక్లో ఇన్వెస్ట్ చేయాలి, ఏ స్టాక్ మంచిది తదితర అంశాలపై ఆయన చేస్తున్న వీడియోలు వీక్షకులను ఆకట్టుకుంటున్నాయి. వ్యక్తిగత అభిరుచి ఉంటే కష్టమైనా ఇష్టంతో ఏదైనా చేయవచ్చని జనార్ధన్ నిరూపిస్తున్నాడు.
స్టాక్ మార్కెట్ ఒడిదుడుకులపై ఆసక్తి...
జనార్దన్ బీకాం పూర్తి చేశాడు. నిత్యం స్టాక్ మార్కెట్ హెచ్చు తగ్గులపై ఆసక్తి చూపుతూ ఉంటాడు. ఇది వరకు ఆయన ప్రత్యక్షంగా ప్రజలకు సలహాలు ఇచ్చేవారు. కానీ దాన్నే వ్యక్తిగత అభిరుచిగా మార్చుకుని "గోల్డ్ జనార్దన్ ఇన్వెస్టర్" అనే యూట్యూబ్ ఛానల్ క్రియేట్ చేశాడు. అర్థశాస్ర్తంలో సంక్లిష్టతలను సులువుగా వివరించడం అతని మరో ప్రత్యేకత. ప్రస్తుతం అతని ఛానల్కి 3500 మంది సబ్ స్ర్కైబర్లు ఉండగా, ఇప్పటివరకు ఆయన 100కి పైగా వీడియోలు చేశాడు.
