గజ్వేల్, వెలుగు : దేశంలో అందరికీ ఒకే న్యాయం ఉండాలని కేంద్రం యూనిఫాం సివిల్ కోడ్(యూసీసీ)ను తెస్తోందని దుబ్బాక ఎమ్మెల్యే రఘునందన్రావు తెలిపారు. సిద్దిపేట జిల్లా గజ్వేల్ పట్టణంలో ఇటీవల రెండు వర్గాల మధ్య జరిగిన ఘర్షణలో అరెస్ట్ అయిన వారి కుటుంబాలను బుధవారం ఆయన పరామర్శించారు. అనంతరం మీడియాతో మాట్లాడుతూ దేశంలో చాలా సమస్యల పరిష్కారానికి యూసీసీ ఉపయోగపడుతుందని తెలిపారు. గజ్వేల్ లో జరిగిన సంఘర్షణలో ఓ వర్గానికి ఒక న్యాయం, మెజారిటీ వర్గ ప్రజలకు మరో న్యాయం జరిగిందని ఆరోపించారు.
సీఎం సొంత నియోజకవర్గంలో మెజార్టీ ప్రజలను అణచివేయాలని చూడటం దురదృష్టకరమన్నారు. కులం, మతం, ప్రాంతాల ఆధారంగా చట్టం మారకుడదని చెప్పారు. అందుకే యూనిఫామ్ సివిల్ కోడ్ తెచ్చే దిశగా కేంద్రం ప్రయత్నం చేస్తుందని తెలిపారు. వచ్చే ఎన్నికలు భారతీయులకు, ఇండియా అని పేరు పెట్టుకున్న యూపీఏ ప్రజావ్యతిరేక కూటమికి మధ్య జరిగే యుద్ధం అన్నారు. కార్యక్రమంలో బీజేపీ జిల్లా అధ్యక్షుడు దూది శ్రీకాంత్రెడ్డి, రాష్ట్ర నాయకుడు కప్పర ప్రసాద్ రావు పాల్గొన్నారు.
